واتەواچەو دەم پارتی ئایشەگوڵ دۆغانە پەشڕاسشکەرڎۆ کە ڕابەر ئاپۆ نامەش پەی قەندیل، ئۆرووپای و سەرنیشت و ۋەرکۊتوو سووریای کیاستەن و واتش: "ئاڎۍ ۋێشا ئەرەیاۋناشا. ئێمەیچ ئینەما تەئکید کەرڎۆ."
واتەواچەو پارتو یەکسانی و دیموکراسی گەلا (دەم پارتی) پېوەس بە گلېرۊبیەو دەسەو ڕاوەبەری مېیانی (مەیەکە)ی مېیانو گرڎی دەم پارتی کۆنگرێوە ڕۆنامەوانیش ڕێکوست.
جە قسەکاشەنە ئایشەگوڵە سەرنجش وست سەرو دەسسەرەرەگێرتەی شارەوانی گۊرە شارو وانی و ئاماژەش پانەی دا کە نزیکەو ١٠ ساڵان ئی دەسەڵاتە هەوڵ مڎۆ جە ڕاو سەپنای قەیومیوە دەسسەرو ئیرادەو هۊرچنیاو گەلیرە گێرۆ. دۆغانە ئەرەیاۋناش گرڎو ئی هەوڵا پەی ئانەینۍ ڕا جە سەرکۊتەی کوردا بگیریۆ.
نامەو ڕابەر ئاپۆی یاوا بە لایەن و کەسا پەیوەندیداری
جە بەردەوامینە دۆغانە دەربارەو ئا مشتومڕا؛ کە ڕابەر ئاپۆ دماو دیدار و گلېرۊبیەکا نامەش پەی قەندیلی کیاستەن، ئینەش وات: "گەرەکما ڕاسەوخۆ دەربارەو ئی مژارەیە زانیاری بڎەو. بەڵێ ڕاسا نامەو ئېژا ئۆجالانی یاوان بە قەندیل، ئۊرووپا، سەرنیشت و ۋەرکۊتوو سووریای و کەسانی پەیوەندیداری. ئاڎۍ ۋێشا ئینەشا ئەرەیاۋنا، ئێمەیچ تاکیدش مکەرمېوە. نامە یاوان بە ۋەرپەرسا کەجەکەی جە قەندیل، ۋەرپەرسا قەسەدەی جە سەرنیشت و ۋەرکۊتوو سووریای و ۋەرپەرسا کەجەدەکە-ئۆرووپای و کەنەکەی جە ئۆرووپا. گەرەکمانە بزانیۆ جگە جە شاندو ئیمراڵیی دەم پارتی جە ئیمراڵی حیچ چەمپنەکۊتەیۍ و گلېرۆبیەیۍ ئێمە ئەنجام نەدریان."
