هامسەرۊکوو تەڤگەروو ئازادی گلێرگەو کوردستانی (تەڤگەروو ئازادی) سەلام عەبدوڵڵا بە بۊنەو نۊیەمین ساڵیادوو ئەرەمەرزنای تەڤگەروو ئازادییوە قسێش پەی ئاژانسوو هەواڵوو فوراتی (ANF)ی کەرڎۍ و واتش:

"ئا قۊناغەو تەڤگەروو ئازادیی گلێرگەو کوردستانیش دلێنە وەش بی، قۊناغێوە بۍ، کە تەرسەی فرە جیددیە سەروو پانیشتی و عێراقیوە بۍ. هێزێوە تاریکپەرسی پێسە داعشی بەرزرتەرین ئاستوو دەسەڵاتیشنە بۍ، تەنانەت دیمەنێوە دەروونیی پەڕ جە تەرس و تۊقنای ئەفسانەییش مەنتێقەکەنە کەرد بی بە چێویوە کە هەرگیز  دلێنە نەشۊ، بێگومان ئی ئەفسانە بە دەسوو کوڕا و کناچاو کوردی دلێنە بریا.  پانیشتوو کوردستانی و عێراقنە، ئێمە پاسە زانێنمۍ، کە پارتە سیاسییەکۍ مەتاوا ئا دۊخە کە مەنتێقەکەنە هەن چارەسەرش کەرا، هەرپاسە دۊخوو گەلوو مەنتێقەکەی، بەتایبەتی گەلوو عێراقی و دلۍ گەلوو عێراقینە بەتایبەتی گەلوو کوردی، دەسشاوە ناڵنۊ.

ئا دۊخە پێویسییش بە ئالترناتیڤێوە بێ؛ چونکوم کێشەکە پێوەندییش بە هۊشیاری و دیای سیستموو دەسەڵاتداریوە هەن پەی راوەبەرڎەی گلێرگەی، کە بە هۊشیاری و دیاێوە غەلەتۊ بەسیێنێوە. هەمان وەختەنە ئا ئاڵۊزیۍ کە بێنۍ پا حەوڵ  و وانایوا چارەسەرۍ نەبێنۍ.  

با گێڵووە سەروو خاڵێوە تەرۍ تا بابەتەکەی ڕۊشنتەر کەرووە، گردوو ئا گرفتا، کە عێراقنە هەنۍ و ئا گرڎە ناکۊکییا، کە جە ڕووەو ئابووری، کۊمەڵایەتی و سیاسییوە هەنۍ، ئەگەر جە ئەنجامنە وینمێشا و بەسمێشاوە بە هۊکارێوە یان خاڵێوە بنەڕەتیێوە، متاومۍ فرە بە ئاسانی ئانەیە واچمۍ، کە خەڵکوو عێراقی بێبەشێنۍ جە ئیسفادەکاو پێوەژیوای. ئەگەر کەمێوە زیاتەر دلۍ بابەتەکەینە قووڵۍ بیمێوە؛ سیستموو دەوڵەتی بە هەردووە کەتەگۊری و یاگۍ وێشۊ پێسە دەسەلاتداری و پێسە ئۊپۊزسیۊنی، دلێشنە داراو ئا هێزەیە نییەنۍ، کە بتاوا، قۊرتەکا چارەسەرۍ کەرا. چونکوم  فۊڕموو دەوڵەتی فۊڕمێوەن کە سەروو گلێرگەیوە ئەرەمەرزیان. یان سیستمێوە کۊمەڵایەتی نییا، یانۍ سیستمێوەن،ک بەروو گلێرگەیۊ بنیات نریان.

ئەگەر دەوڵەت پێسە ئۊرگان و بوونەوەرێوە زیندەی بشناسمۍ، یانۍ ئەگەر پێناسێوە بایۊلۊژییش پەی کەرمۍ، پێسە مشەوەرێوە پاسنەن  سەروو ڕەنج و ونەو گلێرگەیۊ مژیوۊ.  سیستموو دەوڵەتی جە سروشتوو وێشنە سیستمێوە چینایەتیین. ئانە کە جە گرووپوو ڕاوەبەرڎەکەیشنە، یا ئا چینە کە دەسەڵاتدارا، ڕاسیینە دلێشنە پاوانواز و دژە دینامیزمووگلێرگەین. بەگردین فۊڕموو دەوڵەتی، وەروو ئانەی فۊڕمێوە سیاسی و کۊمەڵایەتیی دەسەڵاتین، بێگومان دلۍ ژیوگەو دەسەڵاتینە، ئەگەر دەسەڵاتێوە بۊ، مشۊم دەسەڵاتدارێوەیچ بۊ، یانۍ دیالێکتیکێوە نەرێنی بابەتوو گفتوگۊکەین. یان ئەگەر کەسێوە دەوڵەمەند بۊ، مشۊم هەژارێوەیچ بۊ، چونکوم دۊڵەمەندیی ئادیشا سەروو بنەماو هەژاریی چند کەسێوەن.

ڕاسیینە ئانە کە فرە مشکیلەن و پێویسا قسێش سەرۊ کەرمۍ، دیای ئۊپۊزسیۊنین. کێشەدارتەرا جە دیای دەسەڵاتی. یانۍ جە پێکئاماو  سیستموو دەوڵەتینە دووۍ کەتەگۊریۍ هەنۍ ئۊپۊزسیۊن و دەسەڵات، یاگۍ ئۊپۊزسیۊنی یاگێوە فرە قۊرتاوییەنە. چونکوم ئۊپۊزسیۊن وێش تەمەنوو دەسەڵاتی درێژ کەرۊوە.جە وینای ئۊپۊزسیۊنیوە هەڵای یاگەداروو دەسەڵای دەسەڵاتا. ئامانجوو ئۊپۊزسیۊنی بەدەسئارڎەی دەسەڵاتین جە (بییەی بە دەسەڵاتی). یانۍ گردوو ئا هێز و لایەنا، کە جە قۊناغوو دەسەڵاتداریینە پەڵەو دەسەڵاتیشا وەر کەوتەن و پیسۍ با  و جە سەرنجەکاو گلێرگەی دوورۍ گناوە، جارێوە تەر وێشا جە یاگۍ ئۊپۊزسیۊنینە ویەرنا و وێشا پاک کەراوە و بەرڎەوام جە بازنەو  گلێرگەینە سووڕیاوە و ئینەیچ مشکیلێوە تەری جددی وەش کەرۊ.  

پەوکای داواو ئێمە ئانێنە، کە چا دیایە بەیمۍ بەرۊ. چونکوم ئێمە ئینایمۍ چا بروێنە ئا وینایۍ کە ئامانجشا بنیاتنیای دەوڵەتین، پێویسا کە ڕەخنە کریا.

تەڤگەروو ئازادیی گلێرگەو کوردستانی خەتەی یەرەمەنە، نە ئۊپۊزسیۊنا و نە دەسەڵاتا. سیستمێوە کۊمەڵایەتی و سیاسی یاگەدارا. مەیدانوو یەرەمین پەی چارەسەرکەرڎەی، گردوو ئا ناکۊکی، کێشە و ئاڵۊزییا، کە مەنتێقەکەنە هەنۍ جە ڕووەو ئابووری، سیاسی، کۊمەڵایەتی و هتد... ،یوە ئێمە پڕۊژیوە تازە و ئەنەیاواێوە تازە و خەیاڵێوە جیاوازما هەن پەی چارەسەروو گردوو ئا قۊرتا کە هەنۍ. پەوکای تەڤگەروو ئازادیی گلێرگەو کوردستانی پەیوەندییش پا مەسەلێوە هەن کە کە باسم کەرد.

یانۍ 'عێراقییەکێچ جە پێکوەژیوای بێبەشێنێ'، نیشتیمان یاگۍ پێوەوەژیوای گردوو پێکئاما جیاوازەکانە. دلۍ سیستموو تەڤگەروو ئازادیی  گلێرگەو کوردستانینە حەریۊ داراو ئۊتۊنۊمیی وێشا، گرد کەس ئۊتۊنۊمیی هەنش. چونکوم جە سیستموو دەوڵەت نەتەوەینە یان جە پڕۊسەو وەشکەرڎەی سیستموو دەوڵەت نەتەوەینە، کە دلێشنە ناسیۊنالیزم دەورێوە بنەڕەتی گێڵنۊ، یا وەشکەرڎەی دەوڵەتی جە ڕاو ناسیۊنالیزمیوە، ڕاسینە دلێشنە گردوو ئا ڕەنگ و جیاوازییا گلێرگەی ئاسمیلە کەرۊ، پەوکای چێوە ئینە هۊشیاریین، هۊشیاریێوە کێشەدارا و تەڤگەروو ئازادیی گلێرگەو کوردستانیچ مەیدان و ساحێوەن پەی پێوەژیوای هەقەتینی، پەی بنیاتنیای پەیوەندیێوە هامژیوای جە ژیوگەنە. پەوکای ئی کتێبخانە کە تەڤگەروو ئازادیی گلێرگەو کوردستانی پانیشتنە سەرمەشقشا هەردووە پەیمانۍ کۊمەڵایەتی و سیاسیۍ گێرۊ وێش، ئی مەیدانە، یا کتێبخانەیە کە نوێنەرایەتیی نەتەوەی دیموکراتیک/کۊنفیدراڵیزموو دیموکراسی کەرۊ، تەڤگەروو ئازادی ئا فکر و خەیاڵەیە دلێشنە ورگێرۊ. ئێمە باوڕما چانەن ئی خەیاڵە پەی چارەسەروو گردوو ئا ئازار و نەوەشی و گرفتانە، کە هەنۍ چێگە، بەتایبەت عێراقنە.

 وینمۍ کە ملەملۍ مەزهەبی و نەتەوەیۍ هەنۍ، وەختۍ ئا ڕەنگ و جیاوازییۍ دلۍ گلێرگەی مۊزایکێوەشا وەش کەرڎەن. گردما ئینایمۍ حەوڵێنە پەی وەشکەرڎەی یۊبییەی گردوو ڕەنگ و جیاوازییەکاو دلۍ گلێرگەی پەی وەشکەرڎەی دەسێوە قەوەتی. تا بتاومۍ چێروو قورسایی ئا گردوو کێشە و ناڕەحەتییانە، کە خەڵکوو عێراقی مانیا و بێهومێد کەرۊ ورزمۍ. چونکوم  تەڤگەروو ئازادی چی خاڵێنە وێش ئشناسان و یاگەداری هەقەتینوو سیستموو دەسەلاتدارین، بەتایبەتی ئۊپۊزسیۊنەکۍ ئیساتۍ قۊرتۍ فرێشا جە ڕووەو سیاسی، کۊمەڵایەتی و گرد  ڕووێوە وەشۍ کەرڎێنۍ.