کۆنفرانسو یەکڕیزی و یەکهەڵوێسی کوردی جە وەرنیشتوو کوردەسانینە بە ئەنجامنامێوە دمایش ئاما، دلێشنە قەرار دریا بە زووترین کات شاندێوە هامبەشو کوردی ئەرەمزیۆنە پری دیالۆگی و ئەرەنیشتەی چنی لایەنە پەیوەندیدارەکا.
کۆنفرانسو "یەکڕیزی و یەکهەڵوێسی کوردی جە وەرنیشتوو کوردەسانینە" کە ئی بەیانییە بە بەشداری ٤٠٠ نوێنەرێ و حەر چوار پارچەو کوردەسانی و چبەرو وڵاتی جە پارکو ئازادیی شارو قامیشلۆو وەرنیشتوو کوردەسانینە دەسش پنەکەرد، بە وانایۆ ئەنجامنامێوە دمایش ئاما.
ئەنجامنامەکە جەلایەنو محەمەد ئیسماعیل و فۆزا یوسفیۆ ونریاور.
ئەنجامنامەکە پی جۆرەنە:
""کۆنفرانسو یەکڕیزی و یەکهەڵوێسی کوردیی جە وەرنیشتوو کوردەسانینە جە ٢٦ـی نیسانی ٢٠٢٥ جە شارو قامیشلۆینە دماو دیالۆگی درێژخایەنی و هەوڵدای سوپاس کەردەو هەڤاڵا و برایا، بە بەشداری پارتە کوردییەکا، رێکوزیاکا گلێرگەو مەدەنی، تەڤگەرەکا و ڕێکوزیاکا ژەنا و چالاکێ سەربەخۆو گلێرگەو کوردی جە ناوچە جیاوازە کوردییەکا سووریاینە، بە ئامانجو پەسەندکەردەو لوا پەی یۆگێرتەو کوردا سەرو ئەرەمەزنارەو سووریایێ تازەی و بەشداریکەردەی جە متەرەو ئایندەو سووریا و چارەسەرکەردەو کێشەو کوردی، چی قۆناغە گرنگەو تاریخو سووریاینە، دماو وڕاو ڕژێمو ستەمکاری جە دیمەشقەنە جە ٨ـو کانوونو یوەمی ٢٠٢٤، ئی ڕژێمەی کە ئازادیی و کەرامەتو گەلوو سووریای بە گرڏو پێکئامایە نەتەوەیی، ئاینی و کۆمەڵایەتییەکاش پاشێل کەرد و وڵاتش جە سەرتاسەرو جوگرافیاو سووریاینە وێران کەرد، بە ملیۆنان کەسێس جە گەلەکەیش کوشتێ، ئاوارە و پەنابەرێش کەردێ، حەر چنە گەلوو سووریا پەت وڕناو ئا ڕژێمەیە و دمای ئاردەی بە ستەمکارییەکا و دەسئاردەو ئازادیی و کەرامەتو وێش قوربانی گۆرەش دا، گەلوو کوردی جە سووریانە جە ڕووبەڕووبییەیۆ ئی ڕژێمەینە قوربانی گۆرە و بە هەزاران گەشمەرڏێش دینێ. گەلوو کوردی دەیان ساڵێ ئەورکۆشایش کەرد پەی ئانەی ستەمو نەتەوەیی سەرو وێشۆ لابەرۆنە و مافە نەتەوەییەکاش بەدەس بارۆنە.
سەرو بنەماو وەرپرسیارێتی تاریخی و جوابدایۆ پەی پەنەوازییەکا قۆناغو ئیسەی
بەشداربیەکێ لوا پەی وێشا پەی کۆنفرانسەکەی پێشکەش کەرد، پێسەو بەڵگەنامێوە ئەرەمەزنارەی کە ئیرادێوە بەکۆمەڵ بەر وزۆنە و نزیکبییەیۆ حەقەتینە پەی چارەسەرێوە دادپەروەرانە و وەرفراوان پەی کێشەو کوردی جە چوارچێوەو سووریایێ یۆگێرتەی، بە شناسنامە و فرە-ئیتنیکی، فرە-ئاینی و فرە-کلتووری و فرە-نەتەوەیی کە دەستوورەکەو مافە نەتەوەییەکا گەلوو کوردی گەرەنتی مکەرۆ، پابەندا بە پەیمان و ڕێککەوتنە مییاندەوڵەتییەکا مافەکا مرۆڤی، ئازادیی و مافەکا ژەنا پارێزنۆنە و ڕا مڏۆنە کە بە کاریگەری بەشداری گرڏو ئەرەمەزیێرە سیاسیەکا، کۆمەڵایەتی و سەروازییەکا بانە، پەسەند کریا.
بە پەسەندکەردەو ئی بۆچوونە هامبەشەو کوردا، کۆنفرانس داواو پەسەندکەردەی پێسەو بنەمێوە پەی دیالۆگی نەتەوەیی مکەرۆ، چی جە بەینو هێزە سیاسییەکا کوردی وێشنە بۆ، چی جە بەینو یاڏشا و ڕاوەبەرایەتی تازە و شامی و گرڏو هێزە نەتەوەییەکا تەرو سووریاینە بۆ. بەشداری ئەرەمەزنارەو سووریایێ تازەی مشۆم گرڏ و گەلوو کوردی جە وێ گێرۆنە، بەبێ ئانەی یۆ جە پێکئامایرکا لابریۆنە یان پەشگۆشش وسۆنە، دوور جە زیهنیتەتو یەک لایەنەی جە ویر کەردەیۆ و پراکتیکەنە، کە ڕوومەت و مافەکاشا بە دەستوور بەبێ هیچ جۆرە جیاوازیێ پارێزیۆنە، کە سووریا ڕێز جە پەیوەندییەکا هەرێمی و مییاندەوڵەتی گێرۆنە و فاکتەرێوە ئارام و ئاسایش بۆنە جە ناوچەکەنە.
جە ئەنجامەنە، کۆنفرانس قەرارش دا کە جە زووترین کاتەنە شاندێوە هامبەشی کوردی ئەرەمەزنۆرە پەی ئانەی سەرو ئی بنەمێ جابەجێ کەردەو ئی بۆچوونەی پەی حەقیقەتێ سیاسی هەرمانە بکەرۆ، چنی لایەنە پەیوەندیدارەکا ئەرەنیشتەیرە و دیالۆگ بکەرۆ پەی ئانەی یاەۆنە بە ناوەڕۆکو ئا بۆچوونەی و مسۆگەرش کەرۆنە".
