ئەنجوومەنو کۆنگرەو ستاری شارو قامیشلۆینە، بە مەڵامەو ٢ەمین ساڵڕۆو ئەرەپرای 'ژەنێ، ژیوای، ئازادی' کە بە کوشتەو ژینا ئەمینێ جە وەرکەوتو کوردسانی دەسش پنەکەرد و تا هێندوس وەڵا بییەنۆ، جە شارو قامیشلۆی بەیاننامێوەش واناوە.

جە دەستپێکو بەیاننامەکەینە ئاماژە پانەیە دریان کە هێزەکا دەسەڵاتداری و سەرمایەداریی، کۆیلایەتی سەرو ژەنێرە سەپنا و وچیا: "بەهەزاران ساڵێن ژەنی کۆیلە کریۆ چەوەسیۆوە، دلێنەمشۆ، کۆمڵکوژە کریۆ و جەلایەنو عەقڵیەتێوە ڕەگەز پەرەسی و، دینی و ناسیۆنالیستیۆ ئەرەگیرکریێنێ. سیستەمو هێزی دەسەڵاتداری و پیاسالاری گرنگی بە ژەنێ مەدۆ و مافەکاشا پاشێل مکەرۆ و بەپاو بەرژەوەندی وێش بەکارشا مارۆ.

'بە ویرۆکە و فەلسەفەو سەرۆک ئاپۆی دەسشا پەنەکەرد'

جە درێژەو بەیاننامەکەینە ئامان کە ژەنی پەی بەها ئینسانییەکا ئەرەکۆشای مکەرا، ماوێوە فرەن ژەنی سەرمەشقی جە کەشە ئازادەکا کوردسانینە پەی ئازادی وێشا، بیەیشا، شناس نامەیشا، یەکسانی جنسی، ئازادی گەلو کوردی و ئینسانی مدرامانو و ئەرەکۆشای مکەرا. پێسە مزانیۆ شۆڕشو ژەنێ جە وەرنیشتەنە جەلایەنو دەوڵەتو ئەرەگیرو تورکیۆ کە دوژمنو ژەنێن کریۆ ئامانج. هەڵبەت نەک هەر جە وەرنیشتەنە، بەڵکم جە هەر چوار پارچەو کوردسانی و جیهانی و بە تایبەتی ئەرەپرای 'ژەنێ، ژیوای، ئازادی' کە هێزو وێش جە شۆڕشو وەرنیشتیۆ هۆرگێرتەن، جە لایەنو زلهێزە دەسەڵاتدارەکاوە کریا ئامانج. چی مییانەنە ڕژێمو ئێرانی هەوڵ مڏۆ ژەنی هەر پا جۆرە مەناوە و هیچ دەورێشا جە کاروبارەکا ژیواینە نەبۆ، بەڵام ژەنا سەرنیشتوو کوردسانی و ئێرانی به ویر و فەلسەفەو ڕابەر ئاپۆی ئەرەپرای  'ژەنێ، ژیوای، ئازادی'یشا دەسپەنەکەردو و ئیلهامێوە گەورەشا بە گردو ژەنا جیهانی بەخشا. بە ڕا و ڕوانگەو ڕابەر ئاپۆی ئی سەدە سەدەو ئازادی ژەنێ مبۆ.

جە درێژەو بەیاننامەکەینە ئاماژە پانەیە کریان کە دەیان ژەنێ جەلایەنو ڕێژیمو ئێرانیۆ بە شێوێوە نائینسانانە کوشیێنێ و هەرپاسە ئامان: "بە دەیان ژەنێ کە جە دژو سیستەمو ئێرانی سەرهۆردایشا کەردەن، گێرتەی و سزاو جە قەنارەدایشا سەرەرە سەپیان. نموونەشا زەینەب جەلالیان، پەخشان عەزیزی و شەریفە محەممەدی و دەیان ژەنێ تەرێ. هەرپاسە جە پانیشتو کوردسانینە، ژەنێ ڕۆنامەنووسێ گوڵستان تارا، هێرۆ بەهادین، ناگیهان ئاکارسەلە، جە پاریسەنە ساکینە جانسز، ئەڤین گۆیی، جە وەرنیشتو کوردسانینە هەڤرین، زەینەب، ژیان تۆلهەڵدان، ڕیحان عامودێ، یوسرا دەروێش، خالیدە محەممەد، سیوان فاتمە و سەدان ژەنێ قارەمانێ جەدژو ئا عەقڵیەتەیە بێنێ و گەشمەردێ بیێ. جیا چانەیە ژەنا ئەفغانستانی و هیندستانی بە دروشمەو 'ژەنێ، ژیوای، ئازادی' ئەرەپرای و ئەرەکۆشای مکەرا.

جە دما دمایی بەیاننامەکەینە ٢ەمین ساڵڕۆو ئەرەپرای 'ژەنێ، ژیوای، ئازادی' مبارەک کریا و ئەرەیاوناشا: "ئێمە پێسەو ئەنجومەنو کۆنگرەو ستاری شارو قامیشلۆی، بە ڕێزدارییۆ گردو ئا گەشمەردا کە پەی ئازادیی و ئەرەپڕای ژەنێ، ژیوای، ئازادیی گیانشا جە دەسدا، یاڏێشا مارمێ و قەولمڏەیمێ پەی بەدی ئاردەی وەرموو گەشمەرداما درێژە بە ئەرەکۆشاکەیما بڏەیمێ. هەرپاسە داوا جە گردو ژەنا ئازادیوازی و ڕێکوزیایەکا ژەنا و ئانێ پەی ئازادی ئەرەکۆشای مکەرا، 'نا پەی جە قەنارەدای، بەڵێ پەی ژیوێوە ئازادی' مکەرمێ و 'ئازادی پەی عەبدوڵا ئۆجالانی، چارەسەری دیمۆکراتیکی پەی پەرسو کورد' مکەرمێ. چونکە ویرۆکەکا ڕابەر ئاپۆ ی متاوا کڕێڵو چارەسەری گردو کێشەکا با جە کوردسان و وەرکەوتو میامینی و جیهانینە. ئاستو ئەرەکۆشای و مدرامانیما بەرز مکەرمێوەو و شۆڕشو وەرنیشتی کەرمێنە ناوەندێوە پەی گردو ژەنا جیهانی."