"عەلی کەنعان ئۆغڵو" پەرلەمانتاروو هەدەپەی، کە جە وەختوو بوومەلەرزەکەو ئی دماییەینە هاتاینە بێ، باسش جە کێشەو خەیما و سەرسایا پەی هاموەڵاتییا کەرد و واتش، بۆنەو فرەیی قۆرتاوە تووڕەیی خەڵکی پەرەش سانان.

 هاتاینە جە ٢٠وو شوباتینە دوێ بوومەلەرزێ بە پلەو ٦.٤ کەوتێ و ئا بینێ، کە جە بوومەلەرزەکەو ٦و شوباتینە زەرەری کەمشا پەنە یاوابێ و وڕیێ. جە ئەنجاموو ئا بوومەلەرزەینە ٦ کەسێ لوێبێنێ دلێ یانەکاو وێشا و گیانشا جە دەس دا. "عەلی کەنعان ئۆغڵو"  پەرلەمانتاروو هەدەپەی، کە جە وەختوو بوومەلەرزەکەینە هاتای-ینە بێ، قسێش چەنی ئاژانسوو هەواڵوو فوراتی (ANF)ی کەرڎێ.

"عەلی کەنعان ئۆغڵو" واتش، وەروو ئانەی بوومەلەرزەکە ڕۆنە نەکەوت، ڕا جە کارەساتێوە گەورەی گیریا و واتش: " بوومەلەرزەکەو  وێرەگاو ڕۆو دووەشەممەی دووێ خاڵێ گرنگێش بێنێ. یووەم، ڕۆنە نەکەوت و ماوەکەیچش کوڵ بێ. چا ڕوەنە ئێمە مەنتێقەو هاتاینەو / ئەنتاکیانە و جە ناوەندوو مەحاڵوو سامانداغینە بێنمێ و پا یاگارە گێڵێنمێ، پارێزگار ڕاش بە خەڵکی دێبێ، پەی ماوەو ٢ سەعاتا بلاوە دلێ بینایەکەشا و کەلوپەلەکاشا بەر بارا. وەروو ئانەی خەڵکێوە فرە لوێبێنێوە دلێ بینایەکاشا. پەوکای ئەگەر بوومەلەرزەکە ڕۆنە کەوتێ، خەڵکێوە فرە دلێنە شێ. پەوکای چا وێرەگانە، ئا جموجووڵەو هاموەڵاتییا مرڎابێ. دووەم، بوومەلەرزەکە فرە دەوامش نەبێ، وەلێم فرە بەقووەت بێ. ئێمەیچ چی بێنمێ و حەرچندە جبەرۆ بێنمێ زەمیننە، وەلێ ئنڎە بەتنڎی لەرنایمێشۆ، کە کەس نەتاوێ وێش سەروو پایاوە گێرۆ. فرە خراپ بێ. وەختێ ئینسان ویرێ جە ژیوای دلێ بینایەکا کەرۆو، وەختێ چانەنە، بەڕاسی توشوو تەرسێ و قەلەقی بۆ."

مشکیلەو کەمیی خەیما درێژەش هەن

"کەنعان ئۆغڵو" واتیچش: کێشەو خەیما، سەرسای، گەرمکەرڎەیۆ و تەوالێتی هاتاینە دماییش نامان و واتش: "خەیمەکێ نزیکوو بینایەکانە، دەوروبەرشا نریێنێرە. ئەگەر خەیمێت نەبۆ، خەڵک نایلۆن بە دار و سەقفوو بینایەکاوە بەساوە و سەرسایێ نایلۆنیی پەی وێشا وەش کەرا. وەروو ئانەی دۆخەکەشا پەڕا تەرسی. ئەگەر بوومەلەرزە ٦.٤ پلەیەکە پەی ماوەو ٣٠ سانیا تەریش خواینێ، خودا نەکەرۆ، گرڎوو خەڵکوو دەوروبەروو ئی بینایا گرڎشا بێنێ چێرۆ، بێگومان وەرپەرساو حوکمەتی ماچا، نزیکێ بینایەکا نەگندێ، وەلی پێویستیی ئانەیش پەی خەڵکەکەی دەس نەوستەن، کە خەڵک جە بینایەکا دوور گنۆوە. چونکای پێویسا دوور جە بینایەکا پێویسییەکاو گەرمکەرڎەیۆ، سەرسا و تەوالێت پەی خەڵکی مسەوگەر کریۆ و خەڵک ناچار نەبۆ پەنا بەرۆوە وەروو ئا بینایا. چێگە ناوەندوو هەماهەنگیی هەدەپەی هەن. ئا کەسێ کە مەیا پەی ئێگەی بە پاگێرتەیرەیۆ داواو خەیماما چەنە کەرا. خەیمێ پێویسیێوە گرنگا پەی هاموەڵاتییا و ئا پێویسیێ زەروورێنێ، چونکای وەختێ وەر پڕا یەکڕاس خەڵک فرە بە خەیما زەروورا".

خەڵك بێزار و تووڕەن

"کەنعان ئۆغڵو" واتش، ئانەشا دییەن، وەختوو وارانواراینە چێش مێ ملوو ئا خەڵکیرە نەبیییەی خەیمانە و واتش، خەڵک لاێوە بێزارێ بیێنێ و لایێ تەریچۆ فرە تووڕێنێ.

"کەنعان ئۆغڵو" ئەرەیاوناش: "وەختێ لوایمی پەی سامانداغی، خەڵک واتشا، نیمەو ئانیشا کە مەردێ تاویێ نازیێ مرا و ڕزگارێ کریا. ئاڎێ واتشا، کە هاوار و قیژەو خەڵکیشا چێروو سەقف و پایەو باڵایانەکانە ژنییەن، وەلێم وەروو ئانەی تیمەکاو گێڵای و ڕزگارکەرڎەی نامێ و حیچ ئامێرێوە نەبێ وڕیایەکەی لادەیمێ. ئا خەڵکە کە کەوتەبێ چێرۆ گیانش جە دەس دا، چونکای حیچ شۆفڵێوە نەبێ، کەس نەبێ ئا بلۆک و چیمەنتۆیە لا بڎۆ".

قۆرتەکێ قورسێنێ

 پەرلەمانتارەکەو هەدەپەی واتش، ئەردۆغانوو سەرۆکوو ئاکەپەی ئاما پەی هاتای، وەلیم خەڵکوو هاتای نەڎیشا و واتش: "ئەردۆغان چەنی داروودەسەکەیش ئاما پەی هاتای، بێگومان ئێمە ئاڎما نەڎی، وەلێ جگە جە ئێمەیچ خەڵکوو هاتای ئاڎێچ نەڎییشا. یاگێ تایبەتەش پەی ئاماڎە کریێبێ، ڕایەکەو ئا یاگێ گرڎ وزیێبینێرە، وەربەسێ نریێبێنێرە ناستشا خەڵک یاۆ واگە، حەرچنڎ کەسیچ خەیاڵش نەبێ بلۆ، کەچی سەرباروو ئانەیچ گرڎوو ڕایەکا وزیێبێنێرە. بە پاو دڵوو وێشا ڕا بە چنڎ کەسێ دێنێ بلا واگە، بەس گرڎوو یاگەکا ئاگەی وزیێبێنێرە. بەکوڵی "تەیب ئەردۆغان" ئاما پەی هاتای، وەلێم خەڵکوو هاتای هاگاشا چەنەش نەبێ و نەڎیشا. خەڵک فرە تووڕێنێ. ئینێ دلێ قۆرتە قورسا و جیددییانە، خەڵک پا حاڵۆ بەتەنیا هەوڵێ مڎا درێژە بە ژیوایشا بڎا".