فەرمانداری یەرەکەی داواش جە گەلاو ئێرانی و وەرکەوتوو کورڎسانی کەرڎە، کە بەشداری هەڵمەتەو ئازاڎی پەی عەبدوڵڵا ئۊجالانی، چارەسەری سیاسی پەی پرسەو کوردی کەرا.
بە نامۍ فەرماندەیی یەکینەکاو وەرکەوتوو کورڎسان (یەڕەکە)، ئەنداموو فەرماندەیی چیا مەهاباد پەیامێوەش وەڵا کەرڎۊ.
دەقوو پەیامەکەی پێسنەن:
"بە نامۍ فەرماندەیی یەکینەکاو وەرکەوتوو کورڎسانی (یەرەکە)یۊ، داوا وەنەو گردوو گەلەکەیما، وەرکەوتوو کورڎسانی و سەرجەموو ئازاڎیوازاو ئێران و جیهانی کەرمۍ، بەشداری چا هەڵمەتێنە کەرا، کە پەی ئازاڎیی ڕابەروو گەلوو کوردی عەبدوڵڵا ئۊجالانی دەسش پەنە کەرڎەن ". ژەنا و گەنجا و کەسایەتییە سائیب ویرە ئازاڎەکا وەرکەوتوو کورڎسانی و ئێرانی، پێسە چەنی ساڵەو ١٩٩٩ پرۊسەو پیلانگێڵنیی میاندەوڵەتی دژوو ڕابەر ئاپۊی، پەشتیوانیێوە قەوەت و گەورەشا پەی ڕابەر ئاپۊی نیشانە دا، ئارۊیچ دماو ٢٥ ساڵا جە گێرتەی ڕابەر ئاپۊینە، گەلەکەما وەرکەوتوو کورڎسانینە بە هەمان ڕۊح و ئیرادەی دووبارەوە، پەشتیوانی جە ڕابەر ئاپۊی، ئازاڎی، کەرامەت و شکۊمەندیی کورد و کورڎسانی کەرا.
بە تایبەتی داواما جە گەنجا، کناچا و کوڕاو وەڵاتی، جە حەرکەسێوە ساعیب شکۊی و کەرامەتی هەنە کە وەراوەروو ئەرەگیراوە، دژوو ئا ستەمی وەنەو ڕابەر ئاپۊی کریۊ ئیمرالینە، ئانە ٢٥ ساڵێن ڕابەر ئاپۊ ئینا زیندانی تاریکینە گیریان؛ تا دێر نەبییەن، با گردما دەس وزمۍ دەسوو یۊی، بە گرد نۊعۍ دەنگما بەرز کەرمێوە و پەشتیوانییش کەرمۍ.
ڕێبەر ئاپۊ چا نیم سەدەنە بە ویرۊکە و فەلسەفەو وێش هەرمانە و وەرپەرسیی وێش وەراوەروو گەلوو کوردی و کورڎسانی یاونا یاگۍ. پەوکای گەلەکەما پێویسا ئا ڕۍ گێرۊرە وەر، کە ڕابەر ئاپۊی ڕۊشنە کەرڎۍ نۊ، کە ئازاڎییش دلێنە گەرەنتی کریان و ڕا مەدۊ ئەرەگیرۍ و تاریکپەرەسۍ بیاوا ئامانجەکاشا. پەی ماڕای پیلانگێڵنا و پیلانەکا، تا ساڵەو 25ــەمینوو پیلانگێڵنی کریۊ بە ساڵەو ئازاڎیی ڕابەر ئاپۊی و وێستەیوە چارەسەرێوە هەمیشەیی پەی پەرسەو کوردی، پێویسا گەلەکەما یەکدەس، یەکڕەنگ و یەکدەنگ بۊ. بەتایبەتی گەلوو وەرکەوتی پێویسا ئا بێدەنگییە ماڕا تا نەبێۊ بە بێدەنگیی مەرگی، حەتا حەتان بە سەرکوتکریای و چێرڎەسەیی مەنۊوە. بۊنەو ئا فرسەت و بەختێوە، کە ڕابەر ئاپۊ پێشکەشوو گەلەکەیما کەرڎەنش، با بیمۍ هومێدێوە پەی ئازاڎیی ڕابەر ئاپۊی و گەلەکەیما.
پێسە چەنی ساڵەی ویەرڎۍ گەلوو وەرکەوتی و ئێرانی بە فەلسەفەو 'ژەنی، ژیوای، ئازاڎی'، کە سەرچەمەو ویر و ئەرەمەنەی ڕابەر ئاپۊین، ئەرەپڕایۍ بێوێنەشا کەرد، تارێخشا نویستۊ، کە جیهانش سەرسام کەرد، ئارۊیچ متاودۍ پەشتیوانی جە خوڵقێنەروو ئا ویرۊکەیە ڕابەر ئاپۊی کەرڎۍ و ئازاڎیی وێشا بە ئازاڎیی ڕابەر ئاپۊی بوینا. ئەگەر ئێمەی کورد، گەنجاو کورڎسانی، کناچۍ و ژەنی، ڕۊشنویرۍ و مامۊسۍ یۊی گێرمۍ، متاومۍ گردوو فشار و قۊرتەکاو وەرڎەموو ئازاڎیی ڕابەر ئاپۊی و کورڎسانی ویەرنمۍ. بێدەنگی هێز بە ئەرەگیرا بەخشۊ.
ی ناڕەزایەتی و بەشداری جە ڕیزەکاو شۊڕشی و شۊڕشگێڵنی و بییەی و هاگایی چی ویرۊکە پیرۊزەیە و ئی ڕابەرە گەورەیە، متاوۊ جیهانێوە تازە پەی گەلەکەیما، گەلوو کورڎسانی و گەلاو مەنتێقەکەی چنی وێش بوینۊ. جیهانێوە، کە ئازاڎی و سەربەستییش دلێنە بۊ، جیهانێوە کە ژەنی شۊڕشوو ژەنا بەرا ڕاوە، ژیواێوە مانادار پەیدا بۊ. ژیواێوە کە دلێشنە ئارامی، ئاسایش و ئازاڎی هەن. ژیواێوەن دوور جە ستەمی و چەوسنایۊ. حەرکەس متاوۊ بە ڕەنگ و دەنگوو وێشۊ بە ئازاڎی بژیو، چکۊ گەرەکش بۊ. پەوکای ئی شانسە تاریخییە کە بە ئازاڎی ڕابەر ئاپۊی بەگنۊ مشتەما مەبۊ فۊتنمێش و گەلوو وەرکەوتی و گەلۍ دیموکراتیک و وەڵێکەوتەیوازوو ئێرانی، پێویسا وەڵۍ ئانەینە دێر کەرۊ، ئانە کە متاومێش کەرمێش.
دیسان بە نامۍ فەرماندەیی یەکینەکاو وەرکەوتوو کورڎسانی (یەرەکە)یۊ، ماچمۍ ئێمە پەی گرد نۊعە فیداکاریێوە ئامادێنمۍ پێسە چەنی تا ئیساتۍ سەروو ڕێبازوو ڕابەر ئاپۊی و گەشمەرڎا و شۊڕشوو 'ژەنی، ژیوای، ئازاڎی' و ژیوای بێکۊتایی، بەرڎەوام کۊشیێنمۍ، ئیسەو لایچ و حەریاگێوەنە پێویس بۊ بێت بەرڎەوامۍ بیمۍ جە کۊشیای.
"بژیوۊ سەرۊک ئاپۊ"
"بژیوۊ سەرۊک ئاپۊ"
"مەرگ و نەمەنەی پەی ئەرەگیرا"
"بژیوۊ شۊڕشوو ژەنی، ژیوای، ئازاڎی"
"سەرکەوتەی پەی گەلوو کورڎسانی"
