سەرسەعبوو ئارۊی ئەرەمەرزیاو کەریموو عەلەکەی، یەرەمین دیڎاروو پڕۊفیسۊرمحەمەد ئەمین هەورامییشا، پەی ئەدەب و کولتووروو هەورامانی بەرد ڕاوە، سەرەتاو دیڎارەکەی بە ساتێوە مرڎای پەی گیانوو پاکوو گەشمەرڎا دەسش پەنە کەرد و دماتەر وتاروو سەرپەرشتوو ڤیستیڤاڵی و ئەرەمەرزیاکەی و لایەنە ئیڎاری و ڕۊشنویرییەکا ونیاوە و پانێڵەو یوەموو دیڎارەکەی تاقوو بەیانینە دەسش پەنە کەرد، کە وێش جە یەرۍ ئەوەکۊڵیایانە وینێوە.
ئەوەکۊڵیایەکاو دیڎارەکەی تایبەتێنۍ بە ئەدەب، زوان، جوگرافیا، هونەر و ڕۊشنویریی گردینوو هەورامانی و کۊڵیارەکۍ ئەرەنیشتۍ هەردووە دیمەکاو هەورامانوو پانیشتی و وەرکەوتینۍ، قسەکەروو سەرپەرشتوو دیڎارەکەی شاخەوان سدێق ئاماژەش پانەیە دا، هەورامان داراو کولتوورێوە دۊڵەمەندی و بەبایەخین، لاکەرڎەیۊما وەنەو هەورامانی جە یەرەم ساڵوو دیڎارەکەینە چێگەوەن کە نازمۍ ئی کولتوورە تارێخییە تۊزەو فەرامۊشییش نیشۊ سەر، پێسە دەزگاکەیما هەوڵۍ مدەیمۍ ساڵانە ئی دیڎارەیە درێژە دەیمۍ پەنە و کەرمێش بە نەریتێوە ڕۊشنویریی هەڵەبجەنە.
بارەو نامەنیای دیڎارەکەیۊ بە نامۍ پڕۊفیسۊریوە کۊچکەرڎەیۊ کە حەمەکەریم هەورامانین، شاخەوان سدێق ئەرەیاوناش هەورامان یاگۍ گەورە زانایا و شاعیرا و نویسەرا و هونەرمەندان، نامەنیای دیڎاری یەرەمی وەختێنە ئاما کە ساڵەو یوەمەو دیڎاریما کەرڎە نامۍ عوسمان محەمەد هەورامی و  دووەمەیچ بە نامۍ جەمال بێدار-یوە کە دوۍ جە شاعیر و نویسەرە گەورەکاو هەورامانینۍ و یەرەمیچ بە نامۍ پڕۊفیسەۊر محەمەد ئەمین هەورامانی-یوە، پاو ئا خزمەتە گەورەینە کەرڎەنش بواروو زوان و تارێخ و کولتوور و ئەکادیماینە.
سوهەیب فاروق، پێشکەشکاروو ساڵانەو دیڎارەکەی ئەرەیاوناش کە بییەی دیڎارێوە ئەدەبی و ڕۊشنویریی چینەیە، کە جگە ئانەی پەرسۍ ورووژنۊ و هەم جوابوو پەرسایچ مدۊوە بۊ بایسوو ئەوەفاڕای زانیارییا و بەینوو ڕۊشنویرا پانیشتوو کوردسانی و وەرکەوتوو کوردسانی و ورڎایۊ تۊتۊو دیمەکاو کولتووری جە ڕاو پەرسەو مێمانا و بەشداراو دیڎارەکەیۊ و ئابەیچشە وات هاموەخت ساڵانە دیڎارەکۍ کریا بە کتێب و ملوو نویسەرارە بەخشیا ئینەیچ بۊ بایسوو زیندەئاستەیۊ و وستەیڕووەو ئانەی کە هەوراماننە یاگۍ سەرنجێن.
یاگۍ واتەینە دیڎارەکەنە پرسۍ و ئەوەفاڕای زانیاریی بەینوو بەشدارانە دۊخێوە مەعریفی وەش کەرۊ ساڵانە و مێمانەکۍ بە وەشحاڵیوە نرخناش و دیڎاروو ئێساڵیچ بە پێشکەشکەرڎەی نۊ ئەوەکۊڵیایا ئەکادیمییا دمایی بەهەرمانەکاش ماوەو یەک ڕۊینە مارۊ.