ڕۊنامەوانۍ نیلوفەر حامیڎییە و ئێلاهە موحەمەڎییە، کە یووەم جار مانگەو ئەیلوولینە تاراننە هەواڵوو کوشیای "ژینا ئەمینی"ێشا وەڵا کەرڎەبێوە، جە نۊوەم مانگەو زینڎانییشانە بریۍ وەرڎەموو داڎگای.
ڕۊنامەوانانە نیلوفەر حامیڎییە یووەم ڕۊنامەنویسەنە کە هەواڵش بارەو "ژینا ئەمینی"ێوە وەڵا کەرڎۊ، کە جە ١٦و ئەیلوولوو ٢٠٢٢ بە دەسوو 'پۊلیسوو ئەخلاقی' کوشیا، حەرپاسە ئیلاهە محەمەڎییە مەراسیموو بەخاکئسپارای جەنازەو ژینێش رووماڵ کەرد، کە بە دروشموو ' ژەنی، ژیوای، ئازادی' لوا ڕاوە. دماو ویەرنای ٩ مانگا سەروو گێرتەیشارە بریۍ وەرڎەموو داڎگای.
یووەمین ئەرەنیشتەی دۊسیەو پەیامکیانوو ڕۊنامەو هەم میهەنی ئێلاهە محەمەڎییە ڕۊو ٢٩و ئایاری جە لەقوو ١٥یەمینوو داڎگاو شۊڕشینە بە سەرۊکایەتیی عەبد‌ولقاسم سەلەواتی لوا ڕاوە. ئەرەنیشتەکەی بە ئاماڎەبییەی پارێزنەروو ڕۊنامەوانەکۍ و بەوزیایرەی لوا ڕاوە. پارێزنەروو ئا ڕۊنامەوانۍ شەهاب میرلەوحی یووەم ئەرەنیشتەیش بە ئەرێی ورسەنگنا و ئاماژەش پانەیە دا، کە واڎەو ئەرەنیشتەی ئایندەی دیاری نەکریان.
یووەم ئەرەنیشتەی دۊسیەو پەیامکیانەو ڕۊنامەو شەرقی نیلوفەر حامیڎییە، کە دماو ٩ مانگا دەسبەسەری داڎگایی کریۊ، جە هەمان لەقوو داڎگاو شۊڕشینە تاراننە بریۊ ڕاوە.
ڕۊنامەوانە مینا ئەکبەرییە سەروو هەژماری تایبەتوو وێش جە تۊڕە کۊمەڵایەتییەکانە ئەرەیاوناش، کە ژمارێوە فرۍ جە ڕۊنامەوانا و چالاکا چەنی بنەیانەو ئیلاهە محەمەڎیۍ وەرڎەموو داڎگاینە جە جادەو موعەلیموو تارانینە کوۍ بیێوە. ئانەیچش وستەن رووە ، " ئیلاهە سەعات ٠٩:٤٠ بە سەیارەی جام سیاو ئاریێنە پەی داڎگای، وەلێم ڕا نەدریێنە کەس جە سەیارەکەی نزیک بۊوە".
حەردووە ڕۊنامەوانەکۍ جە ٨وو تشرینوو دووەمینە تۊمەتەو پڕوپاگەندەی دژوو دەوڵەتی و پیلانگێڵنییشا جە دژوو ئاسایشی نەتەوەیی وزیا پاڵ، ئا تۊمەتبارکەرڎەیە ئەگەرش هەن بۊ بایسوو سەپنای سزاو قەنارەدای ملشارە.
دمابەدماو کوشیای "ژینا ئەمینی"یۍ، سەرەورڎاێوە، کە هامشێوەش جە ٤٥ ساڵی ویەرڎەنە ئێراننە
نەوینیان دەس پەنە کریا. جە وێنیشاندایەکانە بە سەڎان کەسۍ کوشیۍ و دەیان هەزار کەسێچ دەسبەسەرۍ کریێنۍ.
س.ز
