جیاواز چینەیە کە وەڵێ کوڵچێوی زوان پسەنە کیبەرێوە تا رابدۆ پانەیە دوێ کەسی پتاوان جە یەکتری بیاوانێنەو چەرخوو پێوەرە ژیوای بلۆ ڕاوە، جە لایوە تەریچۆ پسەنە ئاڵا«پەرچەمی» کە ئەوەمەنەیشوو ئەوەشەکێایش نیشان دەروو درێژەو فەرھەنگوو ئەدەبوو ئاسەوارێوە تایوەتیەن. زوانی ئەدایی جە ھەر زیدوو ماوایوەنە پەرچەمەو ئایاگێنەو مشێو پارێزیو. دیارەن پەرچەمە بە واوە پەرچەمەنە ! یاگێ سرێنجەیەن کە ئاڵای لوولە کریای دەردە نموەرۆ بەڵکوو مشیو نە تەنیاوڵاوەکریووە بەڵکوو پشەکیویچۆ، جا پەی ئی کاریە «وا» مان گەرەکەن کە ھۆر کەرۆ، بێ وا ھیچ پەرچەمێوە نەشەکیاینۆ، نە مەشەکێووە!

دیارەن ھەر وایوەیچ دەردەو ئەوەشەکناو پەرچەمێ نموەرۆ تا ئا یاگێ کە بەعزێ وای تندوو تێژێ مەتاوان سەرەو پەرچەمێو پایەو پەرچەمەکێچ بوەران.

پاسشەچەنە مەزانوو کە زوانی ئەدایی ئەمن«ھورامی»یا ئنوو ھەرکەسی تەری ھەرئانەنە کە نا سەروو لچانوو باواو داداکانمانۆ کە ئیسە قسێش پەنە مەکەران. ھەر پی بۆنەوە ھەر حەولوو تەقالایوە پەی بە کارگرتەی بڕەی کلیمێ نەگونجێو وێ وەش کەری«بەھەربەھانێوە» دلێ ئی زوانیەنە پسەنە ئا وا تندەیە کە پسە ماچان؛«مەتەرسوو نەفعە سەرەو مایەی بوەرۆوە».

لایوە تەریچۆ مشێو بزانم، ئەگەر تەنیا ھۆشمان لاو ئەوەشەکیای خاڵی پەرچەمەکێوەبۆ ئیتر کارمان نەۆو پینەیو کە پەرچەمە تەنیا عەلامەتێوەن پسەو چەقچەقەو ئاساوی، بەڵام ئەسڵ نەوعوو گەنمەکێنوو دماتەریچ ئاردەکێ کە وەشێ مەوان .مەوێمێ پسەو ئا زەربولمەسەلێ کە ماچۆ:«کەرام پۆرە گۆچوەنی، پەنەم واچان کێخاژەنی»  گەرکمەن بواچوو ئینە کە ئێمە بە زوانی ئەدایی چێش مەنویسمێ ؟ یا چێش ماچمێ؟ پەی کویچ مەلم، تەمام یاگێ سرێنجەیەن! ئەگەر دەقوو دەروونوو بابەتێوە جە بواروو زانایی ئارویۆ سووک بۆ با بە زوانی ئەداییچ واچیابۆ یا نریابۆرە زوو جەبەین مەشۆ ،پەی پەرچەمەکێچ دەردە نموەرۆ!

ئینەنە کە بەڕاسی ئاڵاو زوانی ئەدایی مشیۆ ھەم ھوردریو، ھەمیچ شەکیۆوە، بەڵام چەنیو؟ بە کام وا؟

حەز نمەکەروو دریژ تەر چینەیە بلوو سەروو باسەکەیرە، جە ئاخریچۆ دڵم ناپۆ شعریوە کاک یۆسفی رەسووڵ ئابادی«رۆحش شاد» بنیەورە کە پاسە بزانوو دلێ ئی شعرێنە ئی ئاڵا بە دەسەچالاکەو زوانی ھورامیە ھەم ھۆشش لاو پەرچەمەکێوە بیەن ھەم واکەیۆ؛

جاموو خەیاڵیم گێروونە دەسۆ

ئەسپەندوو دڵیم کەروو پەتەسۆ

چراوەو دیدەی بە شانەو گوڵی

بەروو پێشوازوو وەیوەو بۆڵبڵی

عەتروو ھەناسەو مەنگەڵەو ھیوای

کەروو ئاڵایەو کەلاروو ژیوای

کووجیە تەنگەڵی ناقوو ھەواری

کەروو رێوازوو عەشقوو نازاری

ئەسبوو ئاواتی جە ھوبەو شادی

غاردەو تا گوڵان بانەو ئازادی

میدانوو عەشقی پەر کەروو باوەر

گۆشوو بێ مەیلی بە مەیل کەروو کەڕ

تا بەڵکوو زەماو بە خو یاوایی

وێرانەو شەوێ  کەرۆ ئاوایی