چالاکییەکاو ئێشکگێریی دادپەروەری قەوماو زینڎانییا پەی داواو ئازاڎیی جەسەیی ڕابەروو گەلوو کوردی عەبدوڵا ئۆجالانی و چارەسەری سیاسیی پەرسەو کوردی چند شارانە بەردەواما. چالاکییەکاو ئارۆینە نامەی هامبەشوو زینڎانییە سیاسییا ونیاوە.

ئامەد

چالاکییەکەو ئامەدی ئینا ٦٩ەمین ڕۆنە و بەردەواما.

یاگێ چالاکییەکەینە پانکارتوو "پەی دادپەروەری گۆشەگیری ماڕمێ، پەی ئاشتیی گلێرگەی بیمێ دەنگوو زینڎانەکا" ورواسیێ، چالاکێ هێلەکوو "گۆشەگیری تاوانوو ئینسانیەتین"یشا پۆشا.

تەماموو چالاکییەکەینە، درووشموو "بژیوۆ مدرامانوو زینڎانی" و "ئێمە بە مدرامان سەرێگنمێ" بەرزێ کریێوە، چالاکییەکە بە گۆرانیێ کوردیێ بەردەوام بی.

ئێلح

چالاکییەکەو ئێلحی ١١ ڕوێن بەردەواما.

 چالاکییەکەنە نامەو زینڎانیێوە ونیاوە، نامەکەنە ناڕەزایەتی بەروزیا وەراوەروو پیلانگێڵنیی میاننەتەوەیی دژوو ڕابەروو گەلوو کوردی عەبدوڵا ئۆجالانی و گۆشەگیری.

ئیستەنبوڵ

چالاکییەکەو ئیستەنبوڵی ٦١ ڕوێن بەردەواما.

چالاکییەکەنە نامەو زینڎانییە سیاسییە مانگێرتا جە واردەی ونیاوە.

چی بەینەنە درووشمەکاو "بژیوۆ مدرامانوو زینڎانی" و "بژیوۆ سەرۆک ئاپۆ"ی بەرزێ کریێوە.

وان

چالاکییەکەو وانی ٦٩ ڕوێن بەردەواما.

چالاکییەکەنە نامەو زینڎانییە سیاسییا ونیاوە.

نامەو زینڎانییا

نامەی هامبەشوو زینڎانییە سیاسییانە پەی ئەڎایاو ئێشکگێریی دادپەروەری، سڵام وەنەو کۆشیای ئەڎایا کریان و ئەوەخوایش کەراوە، گردوو داوا و هەوڵێوەما پەی مردنای هەڵساتا و وەڵاتێوە ئازاڎین.

زینڎانیێ پەیامێوەنە پەی ئەڎایا ماچا: "شمە وێتا بیێندێ کۆشیای و مدرامان، ئێمە فرە شانازی و بەختەوەریی کەرمێ کە ئەڎایێ پێسە شمەما هەنێ".

ئەرەیاوناش کە ئادێ چەمداریی چالاکیی ئەڎایا کەرا و فرە دڵوەشێنێ بە چالاکی و ئەرەیاونایەکاشا و ماچا: "وەراوەرووونێ و جەنگی و هەڵساوە، شمە بیەیدێ ئەڎایاو ئاشتی و ئێمە کۆشیایمێ. شمە ئندە قەوەتێندێ جاروبار دلێ سنڎۆقینە پێشێ زارۆڵەکاتا پەیتا کیاناوە. کەچی دەس جە کۆشیای ورمەگێردێ".

زینڎانیێ ئەوەخوایش کەراوە، پەی ئارۆی و دماڕۆی پێویسا زیاتەر جە جارا بە یاواینەی "مدرامان ژیواین" کۆشیەیمێ و مدرامانی هامبەش کەرمێ.

بانگەواز پەی گەلی

زینڎانیێ ئاماژەشا کەردەن بە هەڵمەتەو "ئازاڎیی پەی بۆ عەبدوڵا ئۆجالانی، چارەسەری سیاسی پەی پەرسەو کوردی" ئەرەیاوناش تا مێ هەڵمەتەکێ گەورەتەرە بۆ و ماچا: "جە ٢٥ەمین ساڵیاڎوو پیلانگێڵنیی میاننەتەوەیینە هەرمانەی حەرەمەبارەکەما وڕنای و ورشانایوە تەمامەتیی پیلانگێڵنیین. حەر جە زارۆڵەوە تا پیر، ژەنی و پیا، حەرکەسێوە چی قۆناغەنە هەرمانە و خەباتش ئینا سەروو شانەیۆ. پی زانای و باوەڕۆ داوا وەنەو گەلەکەیما کەرمێ، کە بەشداریی کۆشیای ئەڎا بەڕێزەکاما کەرا. تا بتاومێ کۆشیایما بە سەرکەوتەی تاجدار کەرمێ".

ئاخرۆ ماچمێ: "ئەڎا بەڕێزا! گەرەکمابێ بە نامێ زارۆڵەکاتاوە زینڎانەکاننە بە چند کەلیمێوە سڵام جە مدرامانیتا کەرمێ. ئێمە پێسە زاڕووەکاتا فرە شانازیی کەرمێ، کە جە پڕۆسێوە چانەنە ئانە جە دەسما بێ پەشتیوانێتانمێ. باوڕما پاسنەن کۆشیای هامبەشوو کەشی و زینڎانی و گەلی، میاونۆما بە سەرکەوتەی. پی هەستاوە نەفرەتێوە شۆڕشگێڵنانێ وەنەو پیلانگڵنیی ١٥ شوباتی کەرمێ، ناخوو دڵیوە سڵام و سوپاسوو وێماتا پەی کیانمێ، ماچمیشۆ سەرکەوتەی پەی ئێمەن".