شەوێ ویەردێ سەعات ٢٠:٠٠ بەوەختو هەرێمەکەی، جە دەگاو بڵبەری سەر بە شارستانو سەوڵاوای جە هەرێمو هەورامانی جەنگ میانو سپاو پاسدارانو کۆمارو ئیسلامی ئێرانی و گەریلاکێ یەکینەکێ پارێزنای وەرهۆرزو کوردستانی (یەرەکە - YRK)یەنە قۆمیان. هێزەکێ سپاو پاسدارانی و بەسیجی شیێنێ بەرزایەکێ دەگاو بڵبەری و بۆشەشان پەی گەریلاکانو (یەرەکە - YRK)ی نیانەوە. بەڵام وێشان کەوتێنێ بۆسەو گەریلای و جە ئاکامشەنە جەنگ ڕووەش دان. 
بە پاو سەرچەمەکێ هەواڵی جە هەورامانەوە، جە بۆسە و جەنگەکەنە، گەریلا گورزی قورسش جە هێزەکێ سپای دان و فەرماندەو بەسیجی جە هەورامان جەمال کەریمی و محەمەد کەرەمی ئەندام جە سپاو پاسدارانی و هامکات وەرپرسیارو حەراسەتو بەخشداری هەورامانی کوشیێنێ و ٢ چەکدارێ تەرێ سپای کە یۆشان نامێش موحەمەد مورادی-ن بریندارێ بیێنێ.

 قەرارگاو هەمزەی سەیدئەشوهەدای سەر بە سپاو پاسدارانی جەنگەکە و کوشای فەرماندەێ و چەکدارەکێ سپاکەیشان پەشتڕاستێ کەردەنەوە و بانگەشەش کەردەن، گوایا هێزەکێشان بە هناو خەڵکیەوە لوێنێ.
جە ئی بارەوە هاموڵاتیێو خەڵکو دەگاو بڵبەری کە گەرەکش نەبیەن نامێش ئاشکرا بکریۆن، بە بەشو فارسی ئاژانسو فوڕات (ANF)یش واتەن: بانگەشەکەو سپاو پاسدارنی دوورەن جە ڕاستییەوە و بێبنەمان و هیچ ڤییەرێو جەناوچەکەنە ڕووەش نەڎان تا هێزەکێ ڕژێمی بە هاناو خەڵکیەوە بلانێ.

تا ئیسە یەکینەکێ پارێزنای وەرهۆرزو کوردستانی (یەرەکە - YRK)ی  سەبارەت بە جەنگەکەی و کوشیای فەرماندێ و چەکدارەکێ سپاو پاسدارانی بەیاننامەش نەڎان، بەڵام وڵتەر وریایش دابێ، هێزەکێشان جە چوارچێوەو وێپارێزنای ڕەوایەنە، هێرشێ و جموجۆڵە لەشکریەکێ ئێرانی بێوەڵام نمازانێوە و پەرچەکەرداری توند دژشان نیشانە مڎانێ.