کەمپەین پەی ئازادی زەینەب جەلالیانێ ڕێکوزیان و بەشدارش ببە

کەمپەین پەی ئازادی زەینەب جەلالیانێ بەنامێ ”ئێمە دەنگو زەینەب جەلالیان-نێنمێ“ بەفراوانی دەستش پەکەردەن و ڕێکوزەکێش وازیارێنێ هەر کەس و لایێ پەشتیوانێ و هامیارێ و بەشدارێ کەمپەینەکەیشان ببانێ و ئیمزاش بکەرانێ.

زەینەب جەلالیان، ژەنە زیندانەی سیاسیەو کوردی ساڵەو ١٩٨٢ جە شارو ماکوو-ی سەر بە پارێزگاو ئورمیەی جە دیمو وەرهۆر(ڕۆژهەڵات)و کوردستانی جە ئەڎێ بیێنە. ساڵەو ٢٠٠٨ جە لاو هێزە ئەمنیەکێ رژیمو ئیسلامی ئێرانیەوە بە تاوانو ئەندامیەتی جە پارتو ژیواو ئازادو کوردستانی – (پژاک)ی قۆڵبەسە و زیندانییە کریا و جە یۆهەمین دادگانە کە بە شێوازی ڕووکەشانە؟و نماییشی لواڕاوە، بڕیارو جەداردایش دریابێ. دماتەر بەهۆکارو نارەزایەتیەکان دژ بە بڕیارەکەی جە دلێ و بەروو وەڵاتی، ڕژێم ناچار بی تا سزاکێش فاڕۆنە بە زیندانی هەتاهەتایی.
جەلایانە کە نزیکە بە ١٣ ساڵان ئینا زیندانەنە، فرە جارێ ڕووبەڕووەو ئەشکەنجەی دەرونی و جەستەیی و فشارێ جۆربەجۆرێ بیێنەوە و جە فرێوە جە مافەکاش جە زیندانەنە بێبەشە کریێنە و ئانێچە کاریگەریش کەردەن سەرو تەندروستیش و تووشەو چەندین نەوەشیان بیێنە. هامکات چەندین جارێ یاگێ زیندانی کەردەیش فاڕیێنە و ئانەیچە بە ئا ئامانجەبییەنە کە تا تەسلیمەت و پەشیمانی بسەپنیۆنە سەرشەرە. بەڵام سەرجەم فشارەکێ و ئەشکەنجەکێ سەریش و خراپی تەندروستیش نەتاوانشان زەینەبێ ناچار بە پەشیمانی و تەسلیمیەتی بکەرانێ، بەڵکو ئاڎەش سورتەرە کەردێنە خاوەنداری کەردەی جە ئامانج و کۆشاکەیش.

ئاژەو سڵامەتیش

زیاتەر جە ١٣ ساڵێن زەینەب جەلالیانە جە خرابتەرین بارودۆخی رۆحیی و جەستەیی و چێروسەختەرین ئەشکەنجەکانە ژیوای مەبەرۆ سەر و ئانەیچە بەتەمامی تەندروستی و ژیوایش وستەن مەتەرسی جددی و هەر ئان و سات ئەگەرو شەهید بیەیش هەن.
دەسەڵاتدارێ زیندانی ڕا بە زەینەب جەلالیانێ نمڐنێ تا جە بەرو زیندانی چارەسەری پزشکیش پەی بکریۆنە. تەنانەت خراپی تەندروستیش یاوان ئاستێوە چەمێش هەو و کیمشان کەردەن و وینایش کز و لاوز بییەن. بەپاو قسێ کەسە نزیکەکانش و ڕێکوزیێکێ مافو مرۆڤی، بەهۆکارو نەپەرسای وەرەپەرسێ زیندانی جە ئاژەو سڵامەتیش، زینەبە تووشەو نەوەشی کۆرۆنای بیێنە. سەرەڕاو ئانەیە دیسان ڕاش پنەمەدریۆنە جە بەرو زیندانیەنە چارەسەرە بکریۆنە. بەئی تەورە ڕۆچ بە ڕۆچ ژیوای زەینەب جەلالیانێ زیاتەر مەگنۆنە مەتەرسی.
 
دۆسیەو زەینەب جەلایانێ 

سەرەراو هەوڵ و وکۆشیای رێکوزیا جیهانیەکان پسەو ئەمێنسێتی ئینترناشیۆناڵ، نەتەوە یۆگێرتەکێ، پەرلەمانو و کۆمسیۆنو ئەورووپای و چەندین پارلەمانێ وڵاتان، کۆگاکێ مافەکانو مرۆڤی جە کوردستان ئێران و جیهانەنە کە سەرو دۆسیەو جەلالیانێ بەدەنگ ئاومێنێ و وازیارێنێ جە زووتەری وەختەنە ئادادە بکریۆنە، بەڵام هێشتا کۆمارو ئیسلامی ئێرانی گۆشدار نییەن و بە پێچەوانەوە فشارەکانش سەرو جەلالیانێ زیتەرێ کەزدێنێ. جە ئی چوارچێوەنە، ڕۆو ٢٨ مانگێ ویەردێ بە بێ ئاگادار کەردەی خانەوادەکەیش، نامبریێ فاڕیێنەوە پەی زیندانو قەرچەکی سەر بە شارو وەرامینی و هەر جە ئا ئەوەفاڕایەنە بییەنکە تووشەو کۆرۆنای بیێنە. هاموەخت، بە پاو دمایین گوزارشتو پەلیانەو مافو مرۆڤو کوردستانی، نامبریێ شۆشێش هەوشان کەردەن و تووشەو تەنگی هەناسەدای بیێنە و بە تەمامی تەندروستیش تێکشیەن، پەوکەی بەناچاری کاربەدەستێ زیندانێ بەردێنەشان نەوەشخانە، بەڵام بڕیاردریان جارێوتەر ڕەوانێ زیندانی بکریۆوە.

 کەمپەین پەی ئازادی زەینەب جەلالیانێ 

جە بەردەوامی خاوەنداریکەردەی جە زەینەب جەلالیانێ هەر پی جەمێ چاڵاکوانێ ژنا، چالاکوانێ سیاسیێ، مەدەنیێ و کەسایەتییەکێ وەرهۆرزو کوردستانی کەمپەینشان ڕێکوستەن و داواکاری وێشان سەبارەت بە زەینەب جەلالیانێ جە ٦ خاڵێنە ئاڕاستەو ڕێکوزیاکێ  مافو مرۆڤ و کۆمەڵگەی مەدەنی کوردستانی و ئێرانی و جیهانی و سەرجەم ئازایدوازێ دونیا کەردەن تا پەشتیوانێ کەمپەینەکەی ببانێ و هازی و تواناشان پەی خاوەنداریکەردەی جە زینەب جەلالیانێ و زیندانیێ تەرێ هامشێوەش وەگەڕ بوزانێ.

داواکاری کەمپەینەکەی 

١- ئازادی بە بێ شەرت و مەرج پەی زەینەب جەلالیانێ.
.
٢- بە وەرچەم گێرتەو ئاژەو کرۆۆنای و تووشبیەی زەینەب جەلالیانێ و زیندانیێ سیاسیێ تەرێ، یاگێ وێشەنە فشار بوزیۆنە سەرو کۆمارو ئیسلامی و دەسەڵاتدارێ ئێرانی تا بە پاو پیمانە گەردوونیەکانو ماکێ مرۆڤی مامەڵە چەنی جەلالیانێ وسەرجەم زیندانیەکان بکەرانێ و گیان و ژیوای زیندانیەکان بپارێزنانێ.
 
٣- داوا جە ٔ ئەمێنسێتی ئینترناشیۆنال، نەتەوە یۆگێرتەکێ، پەرلەمانەکێ ئەورووپای و وەڵاتێ تەرێ، کۆگاکێ مافەکانو مرۆڤی جە جیهان، ئێران و کوردستان و سەرجەم چالاکوانێ سیاسیێ و مەدەنیێ و ئەرەیاونای و میدیاکاران مەکەرمێ تا پەی ئازادی زەینەب جەلالیانێ وزیندانیەکێ،تەرێ، فشار بوزانە سەرو کۆمارو ئیسڵامی ئێرانی.

٤- کەمپەینەکە داواو هەمیاری و پەشتگیری و رێکوزستەی و بەشداری جە ئا چالاکیانە مەکرۆنە کە پەی ئازادی جەلالیانێ و زیندانیێ تەرێ ڕێکێ مەوزیان، بە تایبەتی ئا چالاکیێ کە جە وەردمو سەفارەتەکانو ئێرانیەنە ئەنجامێ مدریانە.

٥- گرد کەس جەلاو وێشەوە، دیمەن، نویستەی و هەواڵێ سەرو ئازادی زەینەب جەلالیانێ پەی کەمپەینەیە بکانۆنە.

٦- کەمپەین داوا مەکەرۆن تا مافنامەی دیجیتاڵی جە پەلیانە ئنترنێتیەکانە پەی ئازادی زەینەب جەڵالیانی ئیمزا بکرۆن و بەنوسیتەی امێ وێش بەشدارو کەمپەینەکەی ببۆنە. ئی مافنامە پەی ئەمێنسێتی ئینترناشیۆناڵ، نەتەوە یۆگێرتەکان، پەرلەمانەکێ ئەرووپای و وەڵاتاانو دونیا و کۆگاکی مافو مرۆڤی و لایەنە پەیوەندیدارەکان بکیانیۆنە.

“کەمپەینو ئازادی پەی زەینەب جەلالیانێ”
لینکێ:
‎#FreedomForZeynabJalalian
SIGN THE PETITION: https://rb.gy/np2hnq
E-Mail: [email protected]
Facebook: https://m.facebook.com/Freedom-For-Zeynab-Jalalian-100533868370269/?ref=bookmarks
Instagram: https://www.instagram.com/freedomforzeynabjalaliann?r=nametag
Twitter