سیپان حەمۆ فەرماندەى گشتیى یەکینەکانى پاراستنى گەل (یەپەگە) لەبارەى هێرشی چەتەکانى داعش بۆ سەر سوەیدا، کە ٢٠٠ کەسى تیایدا کوژرا و ٣٥ کەسی تریشیان رفاند رایگەیاند "'هێرشێکى دڕندانە بوو. ئازاری گەلی دورزی لەگەڵ ئازاری گەلی کۆبانێ و لەگەڵ ئازاری گەلی عەفرین، کە ئێستا لە ژێر داگیرکاریى تورکیادایە یەک ئازارە".

حەمۆ راشیگەیاند، ئامادەن بۆ هاوکاریکردنى گەلی سوەیدا و وتیشی "یەپەگە لە شەڕی دژ بە داعشدا و رێکخستنە تیرۆریستییەکاندا سەرکەوتنى خۆى سەلماندووە. یەپەگە لە ژێر چەتری قەسەدەدایە و یەک لەسەر سێى وڵاتى لە دەستى داعش رزگارکردووە".

'لە عەفرین چالاکییەکان لە دژى داگیرکەران زیاتر دەکەین'

حەمۆ لەبارەى دۆخى عەفرینەوە وتى، چالاکییەکانى یەپەگە لە عەفرین لە دژى سوپاى تورکیا و چەتەکانى بەردەامە و چالاکییەکانیش زۆر زیاتر دەکرێن.

ئەوەشی وت، بۆ ئازادکردنى ئەو بارمتانە، کە لە سوەیدا لەلایەن چەتەکانى داعشەوە رفێنراون و ئازاد بکرێن، هەموو هەوڵ و دانوستانەکانى نێوان ریش سپییەکانى سوەیدا لەگەڵ چەتەکانى داعش ئەنجامى نەبوو، چونکە ریش سپییەکان مەرجی چەتەکانیان قبوڵ نەکردووە.

ر.م