هاوڵاتییەک بە ناوی محەمەد حەمۆ لە ٢٥ ی کانوونی دووم لە هێرشی دەوڵەتی داگیرکەری تورک بۆ سەر ئێشکگرانی بەنداوی تشرین، ئەمڕۆ بە مەراسیمێک لە گۆڕستانی شەهیدانی گوندی حکومیەی ڕەقە بەخاکسپێردرا. لە مەراسیمەکەدا شەڕڤانی قەسەدە فەوزی محەمەد کە ٢٣ ی کانوونی دووەم لە بەرخۆدانی بەنداوی تشرین شەهیدبوو، یادکرایەوە.

دانیشتووانی کانتۆنی ڕەقە و ئەندامی دامەزراوە مەدەنی و سەربازییەکان و ئەنجوومەنەکانی گەل و کۆمەڵەی ژنانی زنوبیا بەشداری مەراسیمەکە بوون کە لەلایەن ئەنجوومەنی بنەماڵەی شەهیدانەوە ئەنجامدرا.

هاوسەرۆکی ئەنجوومەنی بەڕێوەبەری ئیدارەی خۆبەڕێوەبەری دیموکراتیکی کانتۆنی ڕەقە مشلەب ئەل تەرکان سەرەخۆشی لە بنەماڵەی شەهیدان کرد و ڕایگەیاند بەرامبەر کەس سەر نەوی ناکەن و گەل و خاکەکەیان دەپارێزن.

ئەندامی ئەنجوومەنی بنەماڵەی شەهیدانی هەرێمی باکوور و ڕۆژهەڵاتی سوریا محەمەد دەلیل ڕایگەیاند بەرخۆدانی تشرین بەرخۆدانی قارەمانانەیە و خوێنی تەواوی پێکهاتەکان لەوێ تێکەڵبووە، گوتی: " بە ئەردۆغان دەڵێین هەرچی بکەیت و سوپا و چەتەکان چەندە هێرش بکەن، ناتوانن ئیرادەمان بشکێنن، چونکە بە هەموو هێزمانەوە وڵاتەکەمان دەپارێزین".

دایکی شەهید فەوزی محەمەد، نەزیفە عەلی ڕایگەیاند تا بەدیهاتنی ئازادی شوێنکەوتەی شەهیدان دەبن.

دواتر ناسنامەی شەهیدان خوێنرایەوە و ڕادەستی بنەماڵەکانیان کرا. تەرمی شەهید محەمەد بە هەلهەلەی دایکان و درووشم بە خاکسپێردرا.