ڕۆژنامەنووسان بۆ شەرمەزارکردنی زیندانیکردنی ئەو ڕۆژنامەنووسانەی بەهۆی ئەنجامدانی چالاکی دژی شەهیدکردنی ڕۆژنامەنووسان نازم داشتان و جیهان بیلگین زیندانی کراون، لەبەردەم دادگای ئیستەنبوڵ کۆبوونەوە و پەیامیاندا "ڕۆژنامەنووسان هەردەم ڕاستی دەپارێزن".
لە ئیستەنبوڵ ٧ ڕۆژنامەنووس بە پاساوی بەشداربوون لە ڕاگەیاندراوێک لە گۆڕەپانی شیشخانەی بیۆغلو بۆ ڕۆژنامەنووسان جیهان بیلگین و نازم داشتان کە لە باکوور و ڕۆژهەڵاتی سوریا شەهیدکران، زیندانی کران. ژمارەیەک ڕۆژنامەنووس بۆ شەرمەزارکردنی زیندانیکردنی ڕۆژنامەنووسەکان لەبەردەم دادگای چاگلایان کۆنگرەی ڕۆژنامەوانیان بەست.
یەک لە ڕۆژنامەنووسە ئازادکراوەکان، زەینەب کورای ڕایگەیاند ڕۆژنامەنووسەکان بەشێوەیەکی نایاسایی دەستبەسەرکراون، گوتی: "هێرشیان کردە سەرمان و دەستیان کەلەپچە کردین. چەند کاتژمێر لەنێو ئۆتۆمبیل ماینەوە. لە بنکەی پۆلیس سوکایەتییان پێ کردین. یاسای دوژمنیان بەرامبەر ئێمە بەکارهێنا".
خەباتکاری ڕۆژنامەی یەنی یاشام، مەحسون ساگلام بە گوتنی "گرنگ یادکردنەوەی جیهان و نازم بوو" دەستی بە قسەکانی کرد و گوتی: "ڕاستی دەپارێزین و بەردەوام دەبین".
چالاکییەکە بە درووشمی "نازم و جیهان نامرن" و "ڕاگەیاندنی ئازاد بێدەنگ ناکرێت" و "بێدەنگ مەبن، نۆرەی ئێوەش دێت" کۆتایی هات.
