ئارۆ شارو هەولێریەنە سەرۆکو یەنەکەی بافڵ تاڵەبانی خێرامەیش کەرد جە شاندێوە باڵاو دەم پارتی و دەبەپەی، بافڵ تاڵەبانی پەشتیوانی حزبەکەیش پەی پارچەکاو کوردەسانی و بەتایبەت ۋەرنیشتوو کوردەسانی واوەی کەردۆ.
ئارۆ شارو هەولێرو پانیشتوو کەردەسانینە، شاندێوە باڵاو پارتو یەکسانی و دیموکراسیی گەلا (دەم پارتی) و پارتو هەرێمە دیموکراتیکەکا (دەبەپە)ی چنی سەرۆکو یۊبیەی نیشتیمانیی کوردەسانی (یەنەکە)ی بافڵ تاڵەبانی کوۍ بیێوە. شاندەکەو دەم پارتی و دەبەپەی پێکئامێبێنۍ جە هامسەرۆکۊو دەم پارتی تولای حاتەم ئۆغۆللاریە و هامسەرۆکو دەبەپەی کەسکین بایندەری و یاگەگیرو هامسەرۆکو دەم پارتی ئەبرو گونای و واتەقاچو لوجنەو پەیوەندییەکا جبەرو دەم پارتی بەردان ئۆزتورک. هامکات چنی بافڵ تاڵەبانی، ۋەرپەرسو مەکتەبو پەیوەندییەکا یەنەکەی دەرباز کۆسرەت ڕەسوڵ و ۋەرپەرسو پەیوەندییە کوردەسانیەکا یەنەکەی سالار سەرحەد خێرامای شاندەکەیشا کەرد.
جە گلێرۆبیەکەینە سەرنج وزیا سەرو ئاژەو ۋەرکۆتوو مېیامینی و بەتایبەت سوریا، جەختکریاوە جە پەنابەردەی پەی چارەسەری ئاشتییانەی و دوورکۊتەیۆ جە هۆرچنیەو جەنگی. هەردووەلا جەختشا کەرڎۆ پەنەوازا جە سوریانە ڕێز جە ئیرادەو گەلا و پێکئامایەکا سوریای بگیریۆ و مافەکۍ گەلوو کوردی مسۆگەرۍ بکریا.
سەرۆکو یەنەکەی بافڵ تاڵەبانی پەشتیوانی حزبەکەیش پەی چارەسەری ئەرێنی و هامبەشی حەقەتینەی جە سوریانە واوەی کەرڎۆ، جەختش کەردۆ سەرو پەشتیوانی یەنەکەی پەی پارێزنای مافەکا گەلو کوردی جە سوریانە و پەشتیوانیکەردەی جە گەلو کوردی جە ۋەرنیشتوو کوردەسانی.
بافڵ تاڵەبانی واتش: "کۊششەکۍ ئێژا مەزڵوم عەبدی چی قۆناغە هەستیارێنە پەی پارێزنای ئارامیی ناوچەکەی بەرز نرخنمۍ و هیواڎارێنمۍ گرڎ لێوە بەهەمان ڕۆحییەتۆ هەوڵ پەی چارەسەری گرفتەکا بڎا".
شاندو دەم پارتی و دەبەپەی هەڵوێسو بافڵ تاڵەبانی و یەنەکەیشا بەرز نرخنا و جەختشا کەرڎۆ، کۊششەکێشا پەی پارێزنای مافەکاو گەلو کوردی جە سوریانە بەردەوام مەبۆ.
