هامسەرۆکۊو گرڎینەو دەم پارتی تولای حاتەم ئۆغوللاریە پېوەس بە پڕۊسەکەی واتش : ئینایمې حەفتێوە یەکلا کەرەوەنە، پەنەوازا وەڵی وستەیرەو پەڕلەمانینە دەمودەس کۆمیسیۆن وەش بکریۆ."
هامسەرۆکۊو گرڎینەو پارتو یەکسانی و دیموکراسیی گەلا (دەم پارتی) تولای حاتەم ئۆغوللاریە جە گلېرۆبیەی حەفتانەو فراکسیۆنو دەم پارتینە قسێش کەرڎې. جە گلېرۆبیەکەینە کە هامشانو ئەڎایا ئاشتی و ئەنداماو دەسوەڵێوستەی ژەنا 'پەنەوازما بە ئاشتی'یا و ئەحمەد تورکی، چڼین کەسې تەرێچ بەشدارې بێنې تولای حاتەم ئۆغوللاریە پېوەس بە پەنەوازی ئەرەمەرزنای کۆمیسیۆنی جە پەرلەمانەنە ئاماژەش پانەی دا پەنەوازا بە زووتەرین کات ئا کۆمیسۆنە ئەرەمەرزیۆ و حەفتێوە یەکلا کەرەوەشا ئینا ۋەردەمەنە و بانگەوازش پەی بەهێزکەردەی ئەوەکۊشای ئاشتیوازانەو ژەنا کەرد.
تولای حاتەم ئۆغوللاریە سەرەوەشی ۋێش جە بنەیانەو ئا سەروازا دۊڵەتو تورکی کەرد کە پانیشتوو کوردەسانینە بە مەڵامەتوو ژەعراویبیەیشا بە گازو میسانی گیانشا جە دەسدا.
'ئەوەکۊشای ئاشتیانەو ژەنا هامکات ئەوەکۊشاین پەی ئاشتی'
تولای حاتەم ئۆغوللاریە ئاماژەش پانەیچ دا ژەنی جە دماو بانگەوازو ئاشتی و گلېرگەو دیموکراتیکی سەرەڕاو زیاڎبیەی فشارەکا دۆڵەتی، ئەوەکۊشای ئاشتیوازیشا چڕتەرکەردەنۆ و دەسنیشانش کەرڎ ئەوەکۊشای ئاشتیانەو ژەنا هامکات ئەوەکۊشاین پەی ئاشتی و واتش: "ئاشتی بە گێڵنای تنوتیژی نمې ئاراوە. پەنەوازا ژەنی جە کۆمیسیۆنو پەرلەمانینە دەورشا بۆ. پېسە دەم پارتی جە گرڎ لێوە تورکیاینە درێژە بە هەرمانەکاما مڎەیمې."
'پەنەوازا وەڵې وستەیرەو پەرلەمانینە کۆمیسیۆن وەش بکریۆ'
تولای حاتەم ئۆغوللاریە جەختش چانەیە کەرڎۆ وەڵې ئانەی پەرلەمان وزیۊرە مەشۆم "کۆمیسیۆنو ئاشتی و گلېرگەی دیموکراتیک" دەمودەس وەش بکریۆ و واتش: "مەشۊم ئی کۆمیسیۆنە جە تەمامو فەسڵو هامنینە بە شەوو ڕۆ هەرمانە بکەرۆ."
تولای حاتەم ئۆغوللاریە هەرپاسە ئاماژەش پانەیچ دا کە شاندو ئیمراڵی جە دیدارەکەو پەرێنە چنی ڕابەر ئاپۆی دەربارەو بابەتو 'چەک دلێنە بەردەی گەریلا' ی چنی ڕابەر ئاپۆی قسێشا کەردێنە. تولای جە بەردەوامینە واتش: "چێوە سڵامەکە و ئێژا ئۆجالانیتا پنەیاونو کە جە ڕاو شاندەکەیۆ پەی ژەنا و جواناس گیانان. سەرەڕاو هەنگام نییای پەنەوازی پەی دیموکراتیزە بییەو تورکیای و ئاشتی، وەرپرسیارەتیێ گۆرە گنۆنە ئەستۆو گرڏیما.. ئێژا ئۆجالان چی دیدارەنە بە تایبەتی سەر و ئی پەرسێ قسێش کەردێ. هەرپاسە ئێمەچ واچمێ پەی سەرکەوتە و پرۆسەکەی مشۆم بە گرڏ جۆرێ بەرە و فاڕییای دیموکراتی، یاسایی و ئازادی کریۆوە."
جە بەردەوامی قسەکاشەنە تولای حاتەم ئۆغوللاریە باسس جە گلێرۆبییە و شاندەکەی چنی ئەردۆگانی کەرد و واتش: "جە پڕۆسەو ئاشتی و گلێرگە و دیموکراتیکینە ئینایمێ هەفتێوە تاریخینە. شاندەکەما سەر و پەنەوازییەکا پرۆسەکەی چنی سەرۆککۆماری قسێشا کەردە. پەی ئانەی ئی هەفتەیە بە سەرکۆتەی ویەرۆ، مشۆم ڕاگیری سیاسیی و یاساییەکێ لابریانە و بەرەکێ دیموکراتیزەبییەی و ئاشتی کریاوە. هەرپاسە هیواو گەلا تورکیای جە گرڏ کاتێ زیاتەر بییەن. ئی کاتە بۆنە مەراسیمی ئاشتی کە گرڏنا بە حەسرەتۆ چنیش مژیومێ. ئی کاتە مسۆگەرکەردە و ئاشتی تورکیاین. ئێمە ئینایمێ قۆناغو ئاشتینە.
مشۆم ئاشتی سەر و زەمینە و دیمورکراتیکی بنیاد بنریۆ و هەمیشەیی کریۆ. چی بابەتەنە پەنەوازا گرڏ کەسێک بە ئەرکو وێش ورزۆنە. بە ئەوەکۆشایما ڕاو ئاشتی و دیموکراتیکی مکەرمێوە. قۆناغەکە پەنەوازیش بە هەنگامنییای ڕۆشن و کاریگەری هەن. ئی هەنگامێ لێوە پێوە پرۆسەو کۆمەڵایەتییا و پێوەتەرش قەرارەکا پەرلەمانین. قەرارەکێ پەی دیموکراتیزەکەردە و تورکیاینێ.
