ژنە فەرەنسی سۆنیا مێجری (٣٦ ساڵ) کە لە سوریا گەڕاوەتەوە، لەبەرئەوەی بەهاری ٢٠١٥ گەنجێکی ئێزدی کردبووە کۆیلە و زیندانی کردووە، لەسەر بناغەی ئایینی و زایەندیی ستەمی لێ کردووە، دادگای تێهەڵچوونەوەی پاریس بڕیاریدا، ئەم ژنە بە تۆمەتی تاوانی نامرۆڤانە و بە تاوانی جینۆساید لە دادگای باڵای تاوانەکان دادگایی بکرێت.

سۆنیا مێجری، هاوژینی پێشووی سەرچەتەی داعش، عەبدولناسڕ بن یوسف بوو،  یەکەم ژنی فەرەنسییە کە لە سوریا گەڕاوەتەوە و لە فەرەنسا بە تاوانی جینۆساید دژی کۆمەڵگەی ئێزیدی دادگایی دەکرێت.

بەم بڕیارە، بێجگە لە تاوانە تیرۆریستی و نامرۆڤانەکان، سۆنیا مێجری بە تاوانەکانی جینۆساید و تیۆریزم لە دادگای باڵای تاوانەکان دادگایی دەکرێت.

سۆنیا مێجری پێش ئەوەی لە ساڵی ٢٠١٤ فەرەنسا بەجێبهێڵێت و پەیوەندی بە داعشەوە بکات، خاوەنی خواردنگەیەک بووە لە فەرەنسا. لەوێ هاوسەرگیری لەگەڵ عەبدولناسر بن یوسفی بە ڕەچەڵەک فەرەنسی-جەزائیری کرد کە بە ئەندامێکی سەرەکی شانەی ئۆپەراسیۆنەکانی داعش دادەنرا. عەبدولناسر بن یوسف بەهۆی فەرمانی هێرشی ٢٠١٥ دژی کەنیسەیەک لە پاریس و تاوانی جینۆساید و نامرۆڤانە و تیرۆریزم دادگایی کرا. پێدەچێت سەرچەتە بن یوسف لە ساڵی ٢٠١٦ مردبێت.

ژنێکی ئێزدی کە ئێستە تەمەنی ٢٦ ساڵە، بۆ ماوەی شەش ساڵ لەلایەن بن یوسف و چەتەکانییەوە ڕفێندرابوو، ڕووبەڕووی سوکایەتی و دەستدرێژیی بووییەوە. پاشان بن یوسف فرۆشتبووی بە ئەشکەنجەکار و بەرپرسێکی باڵای داعش.