ڕێکخراوی کۆنگرەی ستار لە شاری قامیشلۆ دژی گۆشەگیری سەر ڕێبەری گەلی کورد عەبدوڵا ئۆجالان ڕێپێوانێکی ئەنجامدا.

سەدان ژن و ئەندامانی ڕێکخراو و دەزگاکان بەشداری ڕێپێوانەکە بوون.

لە ڕێپێوانەکەدا وێنەی ڕێبەری گەلی کورد عەبدوڵا ئۆجالان و درووشمی "بێ سەرۆک ژیان نابێ" و "بژی بەرخۆدانی ئیمراڵی" و "بژی بەرخۆدانی زیندان" و "بکوژ ئەردۆگان" بەرزکرایەوە.

پاشان جەماوەر لە چوارڕیانی ئەلفەلاحین خولەکێک وەستان بۆ گیانی شەهیدان.

ئەندامی کۆردیناسیۆنی کۆنگرەی ستار شیراز حەمۆ ڕایگەیاند ژنان سڵاو لە بەرخۆدانی ڕێبەری گەلی کورد عەبدوڵا ئۆجالان دەکەن و گوتی: "شەڕەکەی ئیمراڵی، شەڕی شکۆ و هەبوونی ئێمەیە، بۆیە دەبێت دژی گۆشەگیری تێکۆشان مەزنتر بکەین".

شیراز تیشکی خستەسەر تێکۆشانی ژنان دژی گۆشەگیری و ڕایگەیاند پیلانگێڕیی دژی ڕێبەری گەلی کورد عەبدوڵا ئۆجالان بە پێشەنگایەتی ژنان پووچەڵ دەکرێتەوە.

هەروەها دووپاتی کردەوە فیکر و فەلسەفەی ڕێبەری گەلی کورد عەبدوڵا ئۆجالان کلیلی چارەسەری قەیرانەکانی ڕۆژهەڵاتی ناوینە.

چالاکییەکە بە درووشمی "بێ سەرۆک ژیان نابێ" و "بژی بەرخۆدانی ئیمراڵی" و "ژن، ژیان، ئازادی" کۆتایی هات.