هاوسەرۆکایەتی دەستەی بەڕێووەبەری کەجەکە بە بۆنەی ٣٠یەمین ساڵیادی کۆمەڵکوژی سێواس راگەیەندراوێکی بڵاوکردەوە و رایگەیاند کە بە دڵنیاییەوە ئەقڵیەتی پاکتاوکەر لێپێچینەوە و حسابپرسینەوەی لەگەڵ دەکرێت و داهاتووی رووناک بونیاددەنرێت.
کەجەکە لە راگەیەندراوەکەیدا باسی لەوەکردووە کە دەوڵەتی تورکی پاکتاوکەر، دوژمنی هەموو گەلان بە تایبەتی کورد و عەلەویە و دەیەوێت لەناویان ببات و رایگەیاند کە کۆمەڵکوژی سێواسیش بەو ئامانجە ئەنجامدراوە.
کەجەکە لە راگەیەندراوەکەیدا باسی لەوەکردووە کە هێزەکانی ئازادی و دیموکراسی دەبێت بە دەوری بناغەکانی ژیان و تێکۆشانی دیموکراتیک زیاتر یەکبگرن و رایگەیاندووە: "مرۆڤ تەنیا بەو جۆرە دەتوانێت کۆتایی بە سیستمی قڕکەر بهێنێت. شەهیدانی کۆمەڵکوژی سێواس کە بە شێوەی دڕندانە و بێ ویژدانانە تیرۆر کران، بە رێزەوە یاد دەکەینەوە. یادی شەهیدان بەردەوام لە تێکۆشانماندا بە زیندوویی دەمێنێتەوە و بۆ رێگەی ئێمە دەبێتە رووناکی".
راگەیەندراوەکەی کەجەکە بەم جۆرەیە:
"٢ی تەمووزی ١٩٩٣ لە سێواس لە هۆتێکی مادیماک لە ئەنجامی هێرشێکی ناجوامێرانەدا رۆشنبیران، نوسەران، رۆژنامەوانان و هونەرمەندانیش لە ناویاندا ٣٤ مرۆڤ ژیانیان لەدەستدا. پێدەنێینە ٣٠یەمین ساڵیادی ئەو کۆمەڵکوژییە، بە رقێکی گەورەوە ئەو کۆمەڵکوژیە شەرمەزار دەکەین، نەفرەت لە ئەنجامدەرانی ئەو کۆمەڵکوژییە دەکەین. لە کەسایەتی ئەوانەی لە کۆمەڵکوژیەکەی سێواسدا ژیانیان لەدەستدا، هەموو شەهیدانی شۆڕش و دیموکراسی بە رێز و پێزانینەوە بە بیردەهێنیەوە. ئەو بەڵێنەی بە شەهیدانمانداوە، جارێکیتر دووبارە دەکەینەوە. گەلەکەمان بە دڵنیاییەوە لێپێچینەوە لە ئەقڵیەتی قڕکەر و پاکتاوکەر دەکات کە دەیەوێت ژیان لە رێگەی کۆمەڵکوژییەوە سەرکوت بکات، حیسابپرسینەوەی لەگەڵ دەکات، داهاتووی ئازاد و رووناک بونیاد دەنێت.
دەوڵەتی تورکی قڕکەر دوژمنی هەموو گەلان بە تایبەتی کورد و عەلەوییە و لە رێگەی ئەم دوژمنایەتی و گوشار و سەرکوت و کۆمەڵکوژیانە و هەموو جۆرە شێوازێکی پاکتاوکاری دەیەوێت گەلان لەناو ببات. کۆمەڵکوژی سێواسیش بەم ئامانجە ئەنجامدرا و درێژکراوە کۆمەڵکوژییەکانی دێرسیم، مەرەش و چۆرومە کە پێشتر لە دژی عەلەوییەکان ئەنجامدراوە.
هەڵسوکەوت لە بەرامبەر عەلەویەکان روخساری پاکتاوکەری دەوڵەت بە روونی ئاشکرا بوو
عەلەویەکان لە تەواوی مێژوودا بوونە ئامانجی هێزە دەسەڵاتدارەکان و کۆمەڵکوژیان بەرامبەر ئەنجامدراوە. دەتوانرێت بوترێت کە بەهۆی بەهای دیموکراتیک، ئازادیخواز و کۆمیناڵەوە یەک لەو کۆمەڵگایانەی زۆرترین کۆمەڵکوژی و پاکتاوکەرییان بەرامبەر کرا، کۆمەڵگای عەلەوییە. گوشار و کۆمەڵکوژی بەرامبەر بە کۆمەڵگای عەلەوی لە پرۆسەی نەتەوە-دەووڵەتدا زیاتر بووە. دەوڵەت بەهۆی ئەوەی خاوەنی ئەقڵیەتی دەسەڵاتداری و دژی دیموکراتیکە، کۆمەڵگای عەلەوی بۆ خۆی بە مەترسی دادەنێت و ئامانجییەتی کە بە شێوازی جیاجیای کۆمەڵکوژی و پاکتاو ئایین و کولتوری عەلەوی لەناو ببات. ئەم هەڵسوکەوت و مامەڵەکردنەی دەوڵەت لەگەڵ عەلەوییەکان روخساری قڕکەری دەوڵەت بە روونی ئاشکرا دەکات.
ئەقڵیەتی دەوڵەت لە تورکیا و باکووری کوردستان تەنیا مەگەر لە رێگەی گوشار، کۆمەڵکوژی و پاکتاوکردنەوە بتوانێت خۆی بەسەر پێوە رابگرێت و درێژە بە مانەوەی خۆی بدات. کۆمەڵکوژی لە بەرامبەر عەلەوییەکان ئەوە دەخاتەڕوو کە دەوڵەتی قڕکەر و کۆلۆنیالیست نەک هەر تەنیا دوژمنی گەلی کوردە، بەڵکوو دوژمنی عەلەوی و هەموو گەلانە. ئەم دوژمنایەتیەی دەوڵەت بەرامبەر بە گەلان، یەکێتی دیموکراتیکی گەلان و تێکۆشانی هاوبەشیان کردووەتە بابەتێکی پێویست. لەو بڕوایەداین کە یەک لە ئەنجامە گرنگەکانی کە ئێمە هەڵسەنگاندن بۆ کۆمەڵکوژی دەکەین، ئەمەیە. کۆمەڵگای عەلەوی خاوەنی وشیارییەکی گرنگی دیموکراتیکە و بۆ دیموکراتیککردنی تورکیا پێشەنگایەتی بۆ کۆمەڵگا دەکات. لە رێگەی کوشتنی بەکۆمەڵی رۆشنبیران، نوسەران و هونەرمەندان ئەوە خواستراوە کە بەر بە بەرەوپێشچوونی تێکۆشانی دیموکراتیک بگرن.
کۆمەڵکوژی سێواس لەلایەن هێزەکانی دەوڵەتەوە ئەنجامدراوە
کۆمەڵکوژی سێواسیش هاوشێوەی کۆمەڵکوژییەکانی دیکەی عەلەوییەکان لە لایەن هێزەکانی دەوڵەتەوە ئەنجامدراوە. دەبێت بەڕێوەبەرانی دەوڵەت کۆمەڵکوژیەکە بگرنە ئەستۆ و ئەو کەسانەی کۆمەڵکوژییەکەیان کردووە سزا بدەن. خۆی لە خۆیدا سیاسەتی پاکتاو لە بەرامبەر کۆمەڵگای عەلەوی بەردەوامن و ئەوەش پەیوەندی نێوان دەوڵەت و ئەو کۆمەڵکوژیانە دەسەلمێنێت.
یەک لە تایبەتمەندییە گرنگەکانی کۆمەڵکوژی سێواسیش، ئەوەیە کە رێگری لە یەکبوون و یەکگرتوویی تێکۆشانی دیموکراتی و شۆڕشگێڕیی لە کوردستان لەگەڵ تێکۆشانی دیموکراسی و شۆڕشگێڕیی لە تورکیا بکات. تێکۆشانی شۆڕشگێڕیی لە کوردستان و بزوتنەوەی دیموکراتیکی گەل، کاریگەری ئەرێنی دەکاتە سەر تێکۆشان لە تورکیا. کورد و عەلەوی داینەمۆی سەرەکین بۆ دیموکراتیک بوونی تورکیا. بەردەوام کۆمەڵکوژی دژی کورد و عەلەوییەکان ئەنجام دەدرێت و بەمەش دەیانەوێت داینەمۆ سەرەکییەکانی دیموکراتیکبوونی تورکیا لەناو ببەن.
رێبەر ئاپۆ لە پێناو عەلەوییەکاندا تێکۆشانێکی هزری و کرداری بەڕێوەبرد
رێبەر ئاپۆ بۆ ئەوەی هەم گەلی کورد-عەلەوی و هەم هەموو کۆمەڵگای عەلەوی بەهاکانی ئایین و ناسنامەی خۆیان بەدەستبهێنن و بگەن بە ئازادی خۆیان، تێکۆشانێکی گەورەی هزری و کرداری ئەنجامدا. رێبەر ئاپۆ لەسەر بەهاکانی ئازادیخوازی و دیموکراتیکی ئایین و کولتوری عەلەوی راوەستەی کرد و زیندووکردنەوەی ئەو بەهایانەی وەک بەرپرسیارێتی ئەخلاقی، دیموکراتیک و شۆڕشگێڕیی داناوە.
بە رێزەوە یادی شەهیدانمان دەکەینەوە
لەمڕۆکەدا دەسەڵاتداری ئاکەپە-مەهەپەی فاشیست نوێنەرایەتی سیاسەت و ئەقڵیەتی قڕکەر دەکات. دەسەڵاتداری ئاکەپە-مەهەپە رۆژانە لە دژی کورد، عەلەوی، ژنان، کرێکاران، رەنجدەران، روناکبیران، نوسەران و هونەرمەندان سیاسەتی کۆمەڵکوژی بەڕێوەدەبات، سیستمی گۆشەگیری و ئەشکەنجە لە ئیمراڵی، شەڕ بەرامبەر کورد، گوشار و هێرش بەرامبەر عەلەویەکان، کۆمەڵکوژکردنی ژنان، چەوساندنەوەی کرێکاران و رەنجدەران، قەدەغەکردنی هونەر، گرتنی رۆشنبیران و رۆژنامەوانان و هەوڵدان بۆ بێدەنگ کردنیان، دەبێت هەووان وەک کۆمەڵکوژی بیانبینن. لە سەرووی هەموانەوە کۆمەڵکوژی سێواس، دەبێت راستترین هەڵوێست بەرامبەر هەموو کۆمەڵکوژییەکان بگیرێتەبەر، لە دژی ئەو سیاسەتە قڕکەر و فاشیستیانەی دەسەڵاتداری ئاکەپە-مەهەپە، دەبێت تێکۆشەرانی دیموکراسی و ئازادی یەکێتی خۆیان گەورەتر بکەن و تێکۆشانی دیموکراتیکی خۆیان بەگوڕتر بکەن.
ئێمە بەو بڕوایەوە جارێکی دیکە دەمانەوێت رایبگەیەنین کە پێویستە هێزەکانی ئازادی و دیموکراسی بە دەوری بناغەکانی ژیان و تێکۆشانی دیموکراتیکەوە یەکێتیی خۆیان پتەوتر و بەهێزتر بکەن. مرۆڤ تەنیا بەو جۆرە دەتوانێت کۆتایی بە سیستمی پاکتاوکەر بهێنێت. ئێمە لەسەر ئەو بڕوایە جارێکیتر شەهیدانی کۆمەڵکوژی سێواس کە بەشێوەیەکی دڕندانە و بێ ویژدانانە سوتێندران و تیرۆر کران، بە بیردەهێنینەوە. یادی شەهیدان هەموو کات لە تێکۆشانماندا بە زیندوویی دەمێنێتەوە و رۆشنکەرەوەی رێگامان دەبێت".
هـ . ب
