کۆمیتەی پەیوەندییەکانی دەرەوەی تەڤگەری ئازادی ژنانی ئێزدی (تاژێ) لە دژی بڕینەوەی سزای لە سێدارەدان بۆ چالاکوانانی مافەکانی ژنان وەریشە مورادی و پەخشان عەزیزی، نامەیەکیان ئاڕاستەی ڕێکخراوی مافەکانی ژنانی ئەوروپا و هەروەها مەرجەعیەتی شێعەکانی عێراق کرد.

لە نامەکەدا ئاماژە بە ستەمی پێنج هەزارساڵەی سیستەمی دەسەڵاتداری پیاوسالاری کراوە لەسەر گەلانی بندەست و بە تایبەت لەسەر ژنان، ئەوەش خراوەتەڕوو کە یەک لەو ستەمانە سەپاندنی سزای لەسێدارەدانە و لەو رووەوە راگەیەندراوە: "دەوڵەتی ئێران لە کاتێکدا خۆی بە ئیسلامی ناودەبات و باس لە دیموکراسی و یەکسانی دەکات، کەچی لە سیستەمێکی ئیسلامییەوە بووە بە سیستەمی لە سێدارەدان. هەموو شێوە فشارێک لەسەر ژنانی ئێران بەڕیوەدەبرێت. بە بەرچاوی جیهانەوە زیندانی ئێڤین گۆڕدراوە بۆ زیندانی ئەشکەنجەدان و قڕکردنی ژنان."

'کۆمەڵگەی نێونەتەوەیی لە بێدەنگیدایە'

لە بەردەوامی ناماکەدا دەسنیشانکراوە تەنها لە ناو ساڵی ٢٠٢٤دا ٨٣١ لە ئێراندا لە سێدارەدراون و ئاماژە بەوەکراوە هەندێک کات بەبێ بەڕێوەبردنی دادگایکردن ئەو کارە ئەنجام دەدرێت و دەڵێت: "ئەم کردەوانە نە بە گوێرەی بنەماکانی ئاینی ئیسلامە و نە بە گوێرەی ڕێسا بنەڕەتییەکانی مافەکانی مرۆڤە و بە هەموو شێوەیەک پێشلکردنە، وێڕای هەموو ئەمانەش کۆمەڵگەی نێونەتەوەیی لە بەرانبەر ئەم ستەمەدا بێدەنگ و بێ هەڵوێستە."

'بە سەپاندنی لە سێدارەدان دەیانەوێت دەنگی ئازادیخوازی ژنان سەرکوتکەن'

هەر لە نامەکەدا ئاماژە کراوە بە سەپاندنی سزای لە سێدارەدانی سەر پەخشان عەزیزی، شەریفە محمەدی و وەریشە مورادی و راگەیەندراوە: "بە گرتنەبەری لە سێدارەدان دەیانەوێت دەنگی ئازادیخوازی ژنان سەرکوتبکەن، ئایە مافی خۆپاراستن تاوانە؟ وەک تاژێ لە دژی ئەو بڕیارەین و ئازاری ژنانی ڕۆژهەڵاتی کوردستان و ئێران بە ئازاری خۆمانی دەزانین. بۆ بونیادنانی ژیانێکی ئازاد و دیموکراتیک دەڵێین؛ با کۆتایی بە سیستەمی لە سێدارەدان بهێندرێت و دەستبەجێ ئەم بڕیارە هەڵبوەشندرێتەوە."

لە کۆتایی نامەکەدا تاژێ داوای لە ڕێکخراوەکانی مافی مرۆڤ، کۆمەڵگەی نێونەتەوەیی و ڕێکخستنەکانی ژنان کرد بۆ رێگریی لە سێدارەدان بە ئەرکی مرۆڤایەتی و ویژدانی خۆیان هەستن.