ئێوارەی ئەمرۆ هەینی لە شاری کەرکوکی باشوری کوردستان، لە درێژەی چالاکییەکانیدا بەبۆنەی ٢٥ی نۆڤەمبەر کە دەکاتە رۆژی جیهانی بەرەنگاربوونەوەی توندوتیژی دژی ژنان، بە دروشمی "لەدژی ڕەشەکوژی ژنان بە فەلسەفەی ژن ژیان ئازادی لە تێکۆشان بەردەوامین" ڕێکخراوی ژنانی ئازادی کوردستان (ڕەژاک) هەستا بە ئەنجامدانی چالاکییەک کە پێکهاتبوو لە پێشکەش کردنی سیمینار و بەڵگە فیلم لەسەر ئەو ستەمەی لە ژنان دەکرێت لە ئاستی جیهان و کوردستان.

لە چالاکییەکەدا ژمارەیەک لە چالاکوان و ڕێکخراوی بواری ژنان و کۆمەڵگای مەدەنی، ژنانی شارەکە و چەند کەسایەتییەک ئامادەبوون، سەرەتای چالاکییەکە بە خولەکێک وەستان بۆ گیانی پاکی شەهیدان و قوربانیانی توندوتیژی و داگیرکاری دەست پێکرد.

جێگای ئاماژەیە، لە چالاکییەکدا وێنەی ژمارەیەک لەو ژنانەی کە قوربانی توندوتیژی بوون و ئەوانەی بەدەستی داگیرکەر شەهیدکرابوون و دروشمەکانی "ژن ژیانە مەیکوژە"، "ژن، ژیان، ئازادی"، "داگیرکاریی هۆکاری هەموو توندوتیژیەکانە"، "بژی یەکێتی ژنان"، "ئێمەی ژن ناموسی هیچ کەس نین ناموسمان ئازادیمانە" نمایش کرابوون.

سیمینارەکە لەلایەن شادیە سەمەد ئەندامی دەستەی بەڕیوەبەرایەتی ڕێکخراوی ژنانی ئازادی کوردستان پێشکەش کرا و تێیدا ناوبراو ڕایگەیاند: "هۆکاری هەموو کوشتن و توندوتیژی دژی ژنان داگیرکارییە بۆیە ئەبێت تێکۆشانمان بەهێز بکەین لەدژی ئەو ئەقڵیەتی داگیرکاری و ژن کوژییەی کە هەیە".

شادیە سەمەد، لەسەرەتای سیمینارەکەدا خەبات و تێکۆشانی خوشکانی میرابەلی ناساندن و ووتی : "خوشکانی میرابەل گیان دەسپێرن لەپێناو ئازادیدا، بۆیە گرنگە کە ئێمە هەمووڕۆژمان ٢٥ی نۆڤەمبەربێت، چونکە تێکۆشان بووە دژی ستەم ودەست درێژی بۆسەرژنان، وەکو ئەزانرێت دۆخێکی زۆر سەخت وناهەموار هەیە لەڕووی سیاسی، ئابووری، کۆمەڵایەتی، کولتوری وئەخلاقیەوە نەک کوردستان بەڵکو تەواوی جیهانی گرتۆتەوە بەتایبەت ئەم هەرێمی کوردستانە،وە دەست درێژی بۆسەر ژینگە کە مەترسیەکی ترە ،ئەوەشی بەرپرسیارە بێ گومان ئەو سیستەمە جیهانیەیە کە فەرمان ڕەوایی جیهان دەکات بۆ بەرژەوەندی خۆی هەموو جۆرە ڕێبازێکی مەترسیدار دەخاتە بەردەم خەڵک. وە سیاسەتی جیهانی ژن دەکەنە کاڵایەک و دەستەمۆی سێکس و کڕین وفرۆشتن وبێ بەهاکردنی ژن و دوورخستنەوە لە ئەرک و ڕۆڵی خۆی".

هەروەها ئەو ژنە چالاکوانە تیشکی خستسەر هەوڵەکانی داگیرکەر بۆ تێکدانی کۆمەڵگای کوردی لە ڕێگەی فیلم و درامای تورکی و ئاشكرای کرد: "لەڕێی تیڤی و دراماکانەوە لەم هەرێمەدا داگیرکاران ئەقڵی خۆی دەسەپێنێت و مێشکی خەڵک ژەهراوی دەکات و بەئاسانی دەچێتە هەموو ماڵێک و تاک بەتاکی کۆمەڵگە بەتایبەت ئەوە دژی گەلی کورد ئەنجامدراوەو دەدرێت، کۆمەڵگەی ناهۆشیار هەرزوو کاریگەردەبێت بەو شتانەی کە ئاڕاستەی دەکرێت چونکە ئەو فەرمان ڕەوای یەشی کە هەیە لەژێر دەسەڵاتی ئەو سیاسەتەدایە کە نەیاران سەپاندوویانە، بۆ بەرژەوەندی خۆیان ڕێگا واڵادەکەن کە خەڵک بەلاڕێدا ببرێت".

ناوبراو باسی لە رۆڵی دەسەڵات کرد لە کوشتنی ژنان و ئەنجامدانی توندوتیژی دژیان و ووتی: "ڕۆژانە ژنان کۆمەڵکوژدەکرێن، ئەو بۆردوومان و تیرۆرانەشی هەیە لەخاکی خۆمان هەمان ئەو ئەقڵەیە کە دژی ژن باکاری دێنن، لەژێر ناوی نامووس کە ژن بەموڵکی خۆی دەزانێت، لەلایەکی تر هەرخۆیانن کە لە پەروەردەکردندا ڕۆڵیان هەیەو ئەقڵی خۆیان دەسەپێنن وهەرخۆیان یاساو بەرنامە دادەنێن، ناهێڵن ژنان هۆشیاربن و ببنەخاوەن هۆشیاری تا بزانن چۆن بژین وچیبکەن".

لە درێژەی قسەکانیدا شادیە سەمەد ووتیشی: "لێرەدا تاکە چارەسەر هاوسەنگی ڕەگەزییە کە ژن و پیاو بەپەروەردەکراوی و ڕێکخستنکراوی پێکەوە بژین و لە سیاسەت و بەڕێوەبردنی کۆمەڵگەش ڕۆڵی ژن هەبێت، هاوژیانی ئازاد تەنها بۆ ژن وپیاوێک نا کە وەکو ژن ومێردن، هاوژیانی ئازاد لەشوێنی کارو لەهەموو جێگایەک پێویستە واتە بەڕێزو هاوسەنگییەوە، هەروەها کەس ئەوی تر ژێردەستەنەکات وخۆی نەسەپێنێت، مافەکان وەکو یەک بن،تاک ڕەوی نا بەڵکو ڕای هەردوو ڕەگەز گرنگە".

پاش سیمینارەکە، بەڵگە فیلم پێشکەش بە ئامادەبووان کرا لەسەر مێژووی ئەو ستەمەی لە ژنان دەکرێت لەسەر ئاستی جیهان و کوردستان، وە تێکۆشان و ئیرادەی ژنان بۆ بەدەستهێنانی ئازادی و مافەکانیان، هەروەها لە بەڵگە فیلمەکەدا باس لە ئاماری کوشتن و بەناچارکردنی خۆکوشتنی ژنان و جۆرە جیاوازەکانی توندوتیژی بەرامبەر ژنان کرا.

لە کۆتایی چالاکییەکەدا، کتێبی کۆ گوتاری شەهید ناگیان ئاکارسەل بەناوی "گەریدەن حەقیقەت" بەخشرایە ئامادەبووانی چالاکییەکە.