هاوسەرۆکی دەستەی بەڕێوەبەریی شەنگال مەروان بەدەل کە بە ناوی دژوار فەقیر دەناسرا، لە ٧ی کانونی یەکەمی ٢٠٢١ لە خانەسۆر لە ئەنجامی هێرشێکی دەوڵەتی تورکی داگیرکەر و نۆکەرانی شەهید بوو. هەر لەو هێرشەدا ٢ منداڵی مەروان بەدەلیش برینداربوون.

لە دووەم ساڵیادی شەهیدبوونی مەروان بەدەلدا لە بەردەم ماڵەکەی لە خانەخۆر مەراسیمێکی یادکردنەوە سازکرا.

نوێنەرانی رێکخراوەکانی خۆبەڕێوەبەریی لە شەنگال، بنەماڵەی شەهیدان و ئەندامانی تاژێ و ژمارەیەک لە دانیشتوانی شەنگال بەشدارییان لە یادکردنەوەکە کرد.

دوای خولەکێک بێدەنگی بۆ رێزگرتن لە گیانی شەهیدان، بەشداربووان مۆمیان داگیرساند و بەڵگەفیلمێک لەسەر ژیان، کەسایەتی و تێکۆشانی مەروان بەدەل (دژوار فەقیر) نمایش کرا.

لە مەراسیمەکەدا لە سەر ناوی رێکخراو و دامودەزگاکانی خۆبەڕێوەبەریی شەنگال پەیام خوێندرایەوە و بە دیاریکراوی لە پەیامەکاندا بەڵێن دووپاتکرایەوە کە لێپێچینەوە لە خیانەتکاران دەکەن.

لە پەیامەکاندا تێکۆشانی دژوار فەقیر لەپێناو خۆبەڕێوەبەری شەنگال بەبیرهێنرایەوە و پەیمانی گوڕدان بە تێکۆشان نوێکرایەوە.

مەراسیمەکە بە نمایشکردنی بەڵگەفیلم و وتنەوەی دروشمی 'شەهید نامرن' کۆتاییهات.

هـ . ب