سوپای تورک دوێنێ لە نیوەڕۆدا لە دەوروبەری گوندی هەسپستێی ناوچەی هەزەخی شڕنەخی دەستی بە هێرش کرد و تائێستاش هێرشەکان بەردەوامە.

سەربازان چواردەوری گوندەکەیان گرتووە و چوونەناوەوە و هاتنەدەرەوەیان لە گوندەکە قەدەغەکردووە. بەو هۆشەوە گوندنشینان لەبەردەم گوندەکەدا راگیراون و ناتوانن بچنەوە بۆ ماڵەکانیان. هاوکات سەربازان هەڵیانکوتاوەتە سەر چەند ماڵێک و دەستیان بە گەڕان و پشکنین کردووە.

گەمنارۆدانی گوندەکە تا ئێوارە بەردەوام بوو، دواتر سەربازان گوندەکەیان جێهێشت و لە دەوروبەری گوندەکە جێگیربوون.

لە نیوەشەودا دەنگی تەقە بیسترا و جارێکی دیکە سەربازەکان چوونەوە ناو گوندەکە. بە درێژایی شەوەکە سەربازان لەناو ماڵەکاندا جێگیربوون و سەرلەبەیانی لە گوندەکە کشانەوە.

لەلایەکی دیکەوە لە گەڕەکی ئاتاکەنتی ناوچەی هەزەخ سەرلەبەیانی ئەمڕۆ لە میانی هەڵکوتانە سەرماڵاندا نەسرەدین کایا دەستبەسەرکرا.

هـ . ب