تەرمی رۆژنامەوان سالاز کە لە ١٤ی تشرینی یەکەم بە هۆی نەخۆشیەوە لە نەخۆشخانەیەکی سلێمانی ماڵئاوایی لە ژیان کردبوو، لە وان بە خاکسپێردرا.

تەرمەکە سەرلەبەیانی گەیەندرایە شارەکە و گواسترایەوە بۆ مزگەوتی بۆیالار.

هاوسەرۆکی کۆمەڵەی رۆژنامەوانانی دیجلە فورات (دەفەگە) سەردار ئاتڵان، نوێنەرانی پارتی یەکسانی و دیموکراسی گەلان (هەدەپ)، پارتی هەرێمە دیموکراتیکەکان (دەبەپە)، توهای-دەر، مەبیا-دەر، کەسک و رێکخراوە مەدەنی و رۆژنامەوانیەکان بەشدارییان لە مەراسیمی پێشوازی لە تەرمەکە کرد.

دوای نوێژی نیوەڕۆ، نوێژی مردوو لە سەر تەرمەکە کرا و دواتر تەرمی سالاز گواسترایەوە بۆ گۆڕستانی ئاککوپروی توشبای سەر بە وان. پۆلیسەکان کە چواردەوری گۆڕستانەکەیان گرتبوو، جگە لە ئەندامانی خێزانەکەی رێگەیان بە کەسی تر نەدا بچنە ناو گۆڕستانەکەوە و ئەمەش ناڕەزایەتی و کاردانەوەی جەماوەری لێکەوتەوە.

تەرمەکە لەلایەن ٣٠ کەس لە ئەندامانی بنەماڵەی سالازەوە بەخاکسپێردرا دواتر جەماوەرەکە بەرەو هۆڵی پرسەکانی مزگەوتی هایرەتیەی کۆن کەوتنەرێگە، کە بۆ ماوەی دوو رۆژ پرسەکە لەوێ بەرێوەدەچێت.