ساڵەو ٢٠١٤ی خەڵکو شەنگالی چېرو هەیمەنەو پارېزنای ١٢ هەزار چەکڎارۍ پەدەکەی و ٦ هەزار سەروازۍ عێراقینە بۍ. بەڵام کاتێ چەتەکۍ داعشی هرووژمشا کەرد سەرو شەنگالی گرڎوو ئا  هێزا بڕەمۍ، گەلوو ئێزدییشا بێ پارېزنای جە بەینوو گلکەکا دڕندەی داعشینە ئاستۆ، دەیان هەزار کەسۍ کوشیۍ، بە هەزاران کەسۍ گیریۍ و بەهەزارانیچ زیڼە بەچاڵێکریۍ، چا کاتەنە تەنیا هێز کە فریاو گەلوو ئێزدی کەوت، گەریلاکۍ ئازاڎیی کورڎەسانی بێنۍ.

 عەمشێ ڕەشۆ ئشناسیۍ بە عەمشێ کۆرکۆرکی ئەندامەو تەڤگەرو ژەنا ئێزدی کە شایەتحاڵەو ڕووەدایەکا کۊمکوژی ٢٠١٤بۍ پەی ئاژانسوو هەواڵوو فوڕاتی(ANF)ی قسېش کەردۍ، عەمشێ سەرنجش وست سەرو بڕفانای کناچا ئێزدی و کوشتەی پیایا، ئاوارەبیەیشا سەرو خاکو ۋێشاوە، حەرپاسە جەنگەوانا ئازاڎیی کە شەنگالشا ئازاڎ کەرد، هاموەخت سەرنجش وست سەرو سیستەمو ۋێڕاوەبەری ئیساتۍ شەنگالی بە سەرمەشقایەتی فکر و فەلسەفەو ڕابەرو گەلوو کوردی عەبدوڵا ئۆجالانی.

 "بەنامۍ پارێزنەرۍ گەلی ئێزدیی بێنۍ، بەڵام جە حەقەتینەنە ترسنۆکۍ بێنۍ و بڕەمۍ"

 عەمشێ کۆرکۆرکی ئەندامەو تەڤگەرو ژەنا ئێزدی قسێش پەی ئاژانسوو هەواڵوو فوڕاتی(ANF)ی کەردۍ. سەرنجش وست سەرو ئا ڕووەدایا کە بەچەمۍ ۋێش دیێنێش و واتش: "من یووەنا چا ئەڎایا کە شایەتحاڵەو کۆمکوژیەکەینا، ۋەروو چەما ۋێماوە ژەنی و کناچۍ ئێمەشا بڕفانۍ و کۆمکوژێشا کەردۍ، بە دەیان کۆمکوژی ڕوو بە ڕووما بیێنێوە بەڵام قورستەرینشا کۆمکوژی ٧٤ەمینی بۍ، چنی ئانەی ژمارێوە فرەو ئەڎایا و کناچا ئێزدی کۊتۍ دەسوو داعشی، بەحیساب هێزێوەش چنەبۍ ئێمە پارێزنۆ ئێمە بە ئیسراحەت وسێنمۍ،  بەڵام ئا هێزەی کە قەرار بۍ ئێمە پارێزنۆ گرڎ بڕەمۍ و خیانەتشا جە ئێمە کەرد، بەمەڵامەتوو بڕەمای ئا هێزاوە هەزاران کەسۍ جە هاموڵاتیا  ئێزدی کوشیۍ و بە هەرزارانی تەریچ گیریۍ و زیڼە بەچاڵێکریۍ.

 "ئا هاوارە جە ۋیر نمەکریۆ"

 عەمشێ سەرنجش وست سەرو ئا کاتەی کە کناچۍ و ژەنا ئێزدیشا ۋەرو چەما ۋێشۆ بڕفانێنۍ و واتش:" جە کاتوو کۊمکوژیەکەینە ژمارێوە فرۍ جە کناچا و ژەنا ئێزدی ۋێشا سەرو تەپی و کەشەکا شەنگالینە ۋێشا فڕەدارە واری ۋەروو ئانەی بە زیڼەیی نەگنا دەسوو چەتەکا داعشی، دەگاو کۆرا ئەبدۆی یووەنە چا دەگایا هۆزەکەو ئێمە کۆرکرای کە ۋەرو هەڵمەتەکۍ کۊت و دەنگ و هاوارو قیژەو  کناچا و ژەنا ئێزدیش چنە بەرزبیۆ، چەتەکۍ داعشی بە ٧ ترۆمبێلۍ ئامۍ چەتەکۍ کناچۍ ئێزدیێ بڕفانێنۍ  ماکسی کناچە ئێزدیەکا کێشێنۍ و بڕفانێنێشا، بڕۍ جە کناچا و ژەنا دەگاکېما منیچ یووەنا چاڎیشا تاواما ۋێما بشارمېوە، نەیارێنمۍ سەرەما بەرز بکەرمۍ، ئێمە واچێنمۍ هەر هیچ نەبۆ بڕۍ جە ئێمە ۋێما ڕزگار بکەرمۍ، دەنگوو کناچا ئێزدی هەڵای گۆشێمەنە زرنگیای زرنگیۊوە کاتێ دەسە دەسە کناچا و ژەنەکا بڕفانێنۍ تاتە و براکاشا بە گولـلۍ کوشێنۍ، ئا کناچۍ جە هۆزو ئێمە بێنۍ داخەم نمەشۆ هەڵای چارەنویسشا دیار نیا"

"ئێمە جە یاڎما نەشیەن، جە یاڎیچش نمەکەرمۍ "

عەمشێ کۆرکۆرکی جە درێژەو قسەکاشەنە سەرنجش وست سەرو ئا ئێش و ڕێشەی کە بنەیانەو بارزانی و حکومەتو عێراقی سەرو گەلی ئێزدیرە ئاردەنشا و ئاماژەش پانەیە کەرد کە، جەنگەوانۍ ئاپۆیی' گەلوو ئێزدییشا چا ئێشەیە ڕزگار کەردەن: "هەڵای دەیان قەبرۍ بە کۆمەڵۍ هەنۍ هۊرنەدریێنۍ، بە دەیان و سەڎان ئێسقانۍ کەسوکاریچما کە وەڵتەر هۊردریێنۍ ئیساتۍ ئینۍ بەغڎا و نەگێڵێنێنێشاوە پەی شەنگالی، بڕۍ جە قەبرەکایچ هۊرۍ دریێنۍ ئێسقانۍ کەسوکاریما ئینۍ ۋەرو ۋەریۆ و کەس خاونداریشا ۋنە نمەکەرۆ. ئانە ئێشێوە گەوەرەبۍ پەی گەلی ئێزدی بێگومان ئا ئێشەیچە بەمەڵامەتوو حکومەتوو عێراقی و بنەیانەو بارزانیۆن، ئێمە ڕووبەڕوو ٧٤ کۊکوشیا بیێنمۍ بەڵام ئینەشا زیاڎوو گردی بە ئێشتەربۍ ئانەیچ کە ئیساتۍ موینمێش کە پی جۊرە ئێسقانۍ کەسوکاریما ئینۍ ۋەروو ۋەریۆ و کەس خاوندارییشا ۋنە نمەکەرۆ ئڼەو کۊمکوشیەکەی بە ئێشا پەی ئێمە، بەڵام مشۊم ئانەیچما جە یاڎ نەشۆ کە چنی ئا ١٢ جەنگەوانۍ ڕابەر ئاپۆی کیاستێبێنێش پەی شەنگالی دەورشا بۍ جە پارېزنای شەنگالی و ڕاشا جە فراوانتەربیەی کۊمکوشیەکەی گێرت، هامکات مشۊم ئانەیچما جە هۆش نەشۆ کە بنەیانەو بارزانی فرە کۊششا کەرد کە ۋەر پا ١٢ جەنگەوانا بگېرا پەی ئانەی فریاو ئێمە نەگنا بەڵام ئاڎۍ سنورەکێشا ۋییەرنۍ و ئامۍ  هاناماوە".

 "بە فکرو ڕابەر ئاپۆی سەر جە نۆ شەنگالما ئاوەڎان کەردۆ"

 عەمشێ سەرنجش وست سەرو فکرو ڕابەر ئاپۆی و جەختش چانەیە کەردۆ کە شەنگال بە فەلسەفەو ئازاڎیی ۋێش بە رێکوستەی مکەرۆ: " تائێمە مەنمۍ جە یاڎش نمەکەرمۍ کە ئێمە قەرزارۍ ڕابەر ئاپۆ-ینمۍ، ئەگەر فکرو ڕابەر ئاپۆی نەبیۍ ئێمە ئازاڎۍ نەبێنمۍ، ئانە ١٠ ساڵېن ئێمە پا فکرەیە ۋێما بە ڕێکوستەی مکەرمۍ و ئەرەکۊشای مکەرمۍ، سەرەڕاو ۋییەردەی ١٠ ساڵا سەرو کۊمکوژیرە بەڵام ئێمە گرڎ کاتێ گەشمەرڎا ۋێما یاڎۍ مارمێوە، ئێمە پېسە گەلوو ئێزدی ئیساتۍ شەنگالەنە جە دەورو یۊترینی کوۍ بیێنمێوە، هێزو پارېزنای ۋێما یەبەشە و یەژەشە، ئاسایش، ئەنجوومەن و فەرمانگەکا پەیوەس بە ڕاوەبەردەی هەرمانەو گلېرگەیما بنیاڎ نیان، بێگومان ئینێچ گرڎ چېرو فکر و ڕامانو ڕاپەر ئاپۆینە بنیاڎ نریێنۍ و ئا فکرە کاریگەریش بۍ جە بنیاڎنیای ڕێکوستەیۍ هێقمینە جە شەنگال".

 "تەڤگەرو ژەنا ئێزدی جوابا پەی کۆمکوژی سەرو ژەنا ئێزدی"

 عەمشێ سەرنجش وست سەرو ئانەی کە جە سەیەو فکرو ڕابەر ئاپۆیۆ  ژەنی  بیێنۍ بە سەرمەشقۍ گلېرگەی  و ئاماژەش پانەیەکەرد: "تەڤگەرو ئازاڎیی ژەنا دماو کۊمکوژی سەرو ژەنا ئێزدی بنیاڎنریان، چەتەکۍ داعشی و هێزە کۆنەپەرسەکۍ گەرەکشانە ژەناو ئیزیدی بە کۆیلە بکەرا و مامەڵەو کۆیلەیما چنی کەرێنۍ ، بەڵام جە سەیەو فەلسەفەو ڕابەر ئاپۆیۆ تاواما  تەڤگەرو ژەنا ئێزدی شەنگالی  بنیاڎ بنیەیمۍ و ئا تەڤگەرە بی بە جوابۍ پەی گرڎوو ئەرەگیرا و چەتەو نۆکەرا و ژەنی ئیساتۍ جە گلېرگەو ئێزدینە سەرمەشقېنۍ".