مەجلیسوو عەشتاری کەمپوو پەنابەراو گەشمەردە ڕۆستەم جودی (مەخمور)ینە بە درووشموو "بە هاواروو ژەنی، ژیوای، ئازادی، تەونەو ژیوای چنمێ" چالاکییەکاو ٨وو مارسی دەسشا پەنە کەرد.

وەردەموو مەجلیسەکەینە و بە ئامادەبییەی ژەناو کەمپەکەی ئەرەیاوناێوە ونیاوە، دماو ڕێزگێرتەی وەنەو گەشمەردا، ئەنداموو ڕاوەبەریی مەجلیسوو عەشتاری قادر کار ئەرەیاونیاو ئەوەڵیش واناوە.

تیشکە وزیا سەروو گۆشەگیری ڕابەروو گەلوو کوردی عەبدوڵا ئۆجالانی و ئەرەیاونیا ئی گۆشەگیرییە بە ئامانجوو دلێنەبەردەی تەڤگەروو کوردی و سەرکوتوو شۆڕشی تند کریان، جە کەسایەتیی ڕابەروو گەلوو کوردی عەبدوڵا ئۆجالانینە وەراوەروو ئینسانیەتیوە کریۆ، ماچۆ:"سەرەڕاو گۆشەگیریی تندی، جە هەلومەرجوو ئیمراڵیینە، ڕابەرێتی پەی وەڵێوستەی پارادایموو نەتەوەی دیموکراتیکی و ئازادیی ژەنێ، کۆشیاێوە گەورە کەرۆ. وەراوەروو سیستموو دەسەڵاتیوە، کە وێش سەروو کۆیلەکەردەی فیکر و ئیرادەو ژەنێ قەوەت کەرۆ، ڕابەرێتی ڕاو ئازادی و کۆشیای ژەنێش دەسنیشان کەرد".

هەرپاسە ئەوەخوایش کەرۆوە، ژەناو کوردی پا هێزەوە  جە ڕابەروو گەلوو کوردی عەبدوڵا ئۆجالانی و سەرمەشقەکاشا ورش گێرا، دژوو دەسەڵاتی و زیهنیەتوو دماڕۆی مرداوە.  

ئەرەیاونایەکەنە تیشکە وزیێنە سەروو هجوومەکاو سەروو ژەنا بە درێژایی تارێخی، هەرپاسە مدرامانی بەردەواموو ژەنا دژوو دەسەڵاتی و زیهنیەتوو پیاسالاری، ئەوەخوایش کەرۆوە ئی سەدە بە کۆشیای ژەناو کوردی و جیهانی بۆ بە سەدەو ئازادیی جەستەیی ڕابەروو گەلوو کوردی عەبدوڵا ئۆجالان و ئازادیی ژەنێ.

مەجلیسەکە ماچۆ بە درووشموو "بە هاواروو ژەنی، ژیوای، ئازادی، تەونەو ژیوای چنمێ" چالاکییەکاو ٨ مارسیشا دەس پەنە کەردێنێ، ئی یادە جە ڕابەروو گەلوو کوردی عەبدوڵا ئۆجالانی و ژەناو کوردی و تەماموو ژەناو جیهانی مەبارەک کەرۆ، ئاماژە پانەیە کەرۆ جە ١ و ٢ـێ مارسینە سیمینارێوە سەروو کۆشیای ژەنا پێشکەش کریۆ، هەرپاسە جە ٣ و ٥ـوو مارسینە شانۆ پێشکەش کریۆ، جە ٤ـوو مارسینە سیمینارێوە پەی تەلەباو ئامادەیی و جە ٦ـوو ئادارینە وەڵێکریێوێ بەشێ کەرا، جە ٧ـوو مارسینە ڕاپیمای جەماوەری کریۆ و جە ٨ـوو مارسینە ئاهەنگی گەورە کریۆ.

ئاخرۆ درووشموو "ژەنی، ژیوای، ئازادی"ی و "بژیوۆ ڕابەر ئاپۆ"ی بەرزێ کریێوە.