ڕابەر ئاپۆ جە پەیامو سەرەوەشینە پەی سری سورەیا ئۆندەری، واتش: "نەریتو ئەنادۆڵی تورکمانەکۍ ڕۆڵێوە گۊرەشا جە دەسدا"، "ئاڎ شناسنامە و کەلتوورو ئاشتیێوە حەقەتینە بۍ "، " نمەبۆ حەجگیز ئی هومېڎە بە نیمەناچڵی مەنۊوە".
ڕابەر ئاپۆ جە زینانو ئیمراڵیوە پەیامێوە سەرەوەشیش کیاست بۊنەو کۆچی دماینو ئەندامو شاندو ئیمراڵیی پارتو یەکسانی و دیموکراسیی گەلا (دەم پارتی) و یاگەگیرو سەرۆکو پەرلەمانی سری سورەیا ئۆندەری.
جە پەیامەکەو ڕابەر ئاپۆینە بە نامونیشانو "پەی یاڎو سری سورەیای ئازیزی" ئامان:
"کۆچی دماینو سری سورەیا ئۆندەری ئازیزی، جە دڵۆ خەمبارێش کەردیمۍ. ئاڎ ئینسانێوە بە قیمەت بۍ، کوڕی حەقەتینەو گەلی بۍ. نەریتو ئەنادۆڵی و تورکمانەکا، ڕۊڵێوە قارەمانشا جە دەسدا، گرڎو گلېرگەی و گەلا ئی جوگرافیایە، هەڤاڵێوە گۊرەشا جە دەسدا. ڕێزی فرەم پەی یاڎەوەریی ئاڎیی هەن. ٢٧ و شوباتی، جە دماین دیدارمانە، دمایین ڕستە کە پەی بانگەوازەکەی زیاڎما کەرد، ئاڎ بە دەسو ۋێش نویستش و گەرەکش بۍ ۋێش بوانۊشۆ. خاوەن هەوڵ و کۊششێوە جە یاڎ نەکریا بۍ پەی پێوەرە ژیۋای ئاشتییانەی. ئاڎ ئینسانێوە چنە ئاما بۍ کە گرڎو نەرێنیەکا فاڕۍ پەی چێوی ئەرێنی. ئاڎ شناسنامەی حەقەتینەو ئاشتی و کەلتوورو ئاشتی بۍ.
ئاڎ عال زانۍ کە ئاشتی و پرۆسەو ئاشتی پەی گرڎیما بە ئیسفاڎەن، ئینە گۊرەتەرین ویستو وەرمش بۍ. نمەبۆ حەجگیز ئی هیواو هومێڎەیە بە نیمە ناچڵی مەنۊوە. گرنگ پەی گرڎیما ئینەنە، ئی ڕۆحییەتەیە بیاونمۍ بە ئاشتی و بە نامۍ سری سورەیا ئۆندەریوە تاجدارش بکەرمۍ.
دیسان دڵسۆزی ۋێم پەی یاڎو ئاڎیی بەربڕو، سەرەوەشی جە بنەیانەکەیش و دۊسا و وەشەسیایا و هەڤاڵاش و گەلەکەیما مکەرو.
سەرەوەشی جە گرڎ لایۍ مکەرو.
عەبدوڵا ئۆجالان
٣ ۍ ئایارو ٢٠٢٥".
