کوردیناسیۊنوو کۊمەڵەو گەنجاو کوردسانی بانگەوازێوەش ئاراسەو گەنجا کەرد و ئەرەیاوناش: "بە ڕۊحوو هەقسانایۊ گەشمەرڎە بیشەنگی و سارایاوە بەشداریی کۊشیای کەردێ، ئاویروو مدرامانی دژوو فاشیستاوە گەش کەردێوە".
بەیاننامەی نویسیاو کوردیناسیۊنوو کۊمەڵەو گەنجاو کوردستانینە پاسە ئامان:
"جەنگوو سەربەوێ کوردستانی نموونێوە ڕۊشنوو ئی جەنگە تاریخییەینە پەی ڕزگاریی گەلی ستەموەنەکریای و ئا گەلەیە کە تارێخەنە فرەتەرین چەوسیایۊشا انەوەیان بەرامبەر کریان، بە سەرۊکایەتیی ڕابەر ئاپۊی و پەکەکەی، نیم سەدەن ئی کۊشیایە بەرڎەواما. گەورەتەرین، دڵسۊزتەرین و مەبارەکتەرین مدرامان دژوو دڕندەترینوو تارێخی بەرز کریۊەوە، جە کەسایەتیی جوانتەرین و بەنرختەرین ڕۊڵەو گەلوو کوردینە. شۊڕشگێڵنیی فیدایی ئاپۊیی بەجۊشوخرۊش، شادی و دڵگەرمییوە کۊشیایێوە شۊڕشگێڵنانە کەرا. ئانە کە پەکەکە چەویشای تەری جیاواز و بێوێنە کەرۊوە ئی ڕاسییەنە. گەشمەردێما ئانێنێ کە بیێنێ بایسوو بەرڎەوامبییەی کۊشیای.
چا ئەرەیاونایەنە گەشمەردێ بیشەنگ بروسک و سارا هۊگر ڕحا یادێ کریێوە و پاسە باسوو ڕەنج و کۊشیاییشا کریا:
"سەروو ئا بنەمێوە، بە ڕێز و حورمەتۊ سەرمەشقەکاو جمیەروو گەنجا و ژەنە گەنجا، بیشەنگ بروسک و سارا هۊگر ڕحای، کە ٢٨ تەموزوو ٢٠٢٣، هەرێمەکاو پارێزنایی مێدیاینە گەشمەردێ بیێ، یاد کەرمێوە و ڕێز و سڵاموو وێماشا ئاراستە کەرمێ".
ئەوەڵ سەرەوەشیی وێما ئاڕاستەو کەسوکاروو گەشمەرداما و سەرجەموو گەلوو کوردستانی و گەنجا کەرمێ.
هامڕا بیشەنگ ساڵەو ٢٠١٠ دەس بە کۊشیای کەرۊ و پەیوەندیی بە ڕیزەکاو شۊڕشوو ئازاڎیی کوردستانیوە کەرۊ و تا گەشمەرڎەبییەی بەرڎەوام بییەن جە کۊشیای. ماوەو ١٣ ساڵا بە ئامانجوو یاوای بە ڕێباز و ویرۊکە ئاپۊییا جە خەباتوو گەنجاو کوردستانینە ژیواییش جە خەباتوو گەنجاو کوردستانینە تەرخان کەرڎەن. کۊشیای ئازاڎی سەرنیشتنە دەسش پەنە کەرد و بە چالاکیی شۊڕشگێڵنانە پانیشت و وەرکەوت و وەرنیشتنە درێژەش بە خەباتوو وێش دا. جە هەر چوار پارچەو کوردستانینە خەباتی بێوێنەش کەرڎەن. کوردستانی بەشکریاش جە کەسایەتییشنە کۊ کەردۊ و کەردش بە یەک پارچە. چوارچوە شۊڕشینە گرد یاگێوەنە چالاک بی و بە ئیرادە و یاواینەی بە حەقیقەتی ئاپۊیی جە کەسایەتیی وێشنە یاوا سەرکەوتەی. ساڵەو ٢٠١٤ سەرەڕاو ئانەی لاو دوژمنوو فاشیستیوە ئشناسیا و داوا کریابێ، بە ئیرادێوە بەرزی شۊڕشگێڵنییوە، لوا دلێ شاروو سەرەوردایۊ نسێبیننە سەرنیشتوو کوردستانینە و پێسە سەرمەشقێوە چالاکییەکاو گەنجاش بەردێ ڕاوە. بە ئامانجوو سەرکەوتەیی شۊڕشوو سەرنیشتی، سەرەڕاو گرد جۊرە سەختی، تەرسی و ئاستەنگێوە، تا شایستەو ڕابەر ئاپۊی بۊ بە گرد لەونێ کۊشیێ. هەرمانە و وەرپەرسییچ کەرێ، گردوو بوارەکاو شۊڕشینە هەستیاریی وێش نیشانە دا. بە چالاکییەکاش پانیشت و وەرکەوتنە لاو گەنجاوە فرە وەشەسیابێ و دەورێوە گەورەش بێ جە بەیاگەیاونای وەڵێئامایە گرنگەکانە. وەرنیشتنە شەو و ڕۊ پا خولیێوە پەی بنیاتنیای پارادایموو مۊدێرنیتەی دیموکراتیکی هەرمانە کەرێ، تا کولتوور و یاواینەی شۊڕشی بە گەنجا بشناسۊ بە گردوو تواناو وێشۊ خۊیەوە کۊشیا.
وەشەسیای هامڕا بیشەنگێ پەی کەشەکا فرە جیاواز بێ، ڕاسی و شکۊمەندیی کەشەکاو کوردستانییش وێشنە ورگێرتەبێ و ئینەیە بەڕۊشنی نیشانە دێ. حەرچەندە شارەکانە ژیوێ، بەڵام زانێ کە گرد یاگێوەنە کەشەوانە بۊ. بە پرەنسیپ و پیمەرەکاو کەشەوانبییەی، حەر لاێوەنە بییێ هەست بە قورسایی پەکەکەی کەرێ. مدرامانوو جزیرە بۊتانیش گرد لاێوە ورسەنگنابێ. ڕا نەدێ بەغەڵەت بژیوۊ و تا دمایی چەنی ڕاسییەکا ژیوا. چا باوەڕەنە بێ، کە جەنگوو سروشتی بە هەقسانایۊ دوژمنی و هەوڵدای پەی ئانەیە شایسێ ڕابەر ئاپۊی بۊ بە کۊشیای دژوو دوژمنی، هەوڵێ فرێش دێ. پی مانێ هەمیشە ڕۊحی شۊڕشگێڵنانە و خاوەن ئیرادێوە بەرزە بێ، گردوو عومریش بە شۊڕشگێڵنیی بەرد سەر.
هامڕا بیشەنگە سەرەمڕ وێش بە قەرزدارەو ڕابەری زانێ. بە دڵ و گیان سەروو ویرۊکەکاو ڕابەر ئاپۊیۊ بێ. گردوو وەختەکاو ژیوایش چی چوارچوەنە پەی گەشەسانای کۊشیای بەرڎەن سەر. سەرەڕاو گردوو کۊشیایەکاش، بەقووڵی هەست بە نەبییەی ڕابەرایەتی کەرێ. ئازاڎیی جەسەیی ڕابەر ئاپۊی بەشێوە بێ جە چالاکییەکاش. چێوە پێسە ژیوا و کۊشیا، چەنی گەلەکەیش پیمەرەکاو ئازاڎییش بەرزێ کەردێوە و بییە بە سەرمەشقێوە زانێ خەتەو ئازاڎیی ژەنانە. هامڕا بیشەنگە یاوێبێ ئا باوڕە کە بە شکسپەنەئارڎەی عەقڵیەتوو دەسەڵاتداریی پیای، هەم وێش ئازاڎ کەرۊ و هەم جە ڕابەر ئاپۊی نزیک بۊوە. هامڕا بیشەنگە پا گردوو تایبەتمەندییاوە بییە بە کۊشەرێوە سەرمەشقەو خەباتوو ئازاڎیی کوردستانی و بییە بە نموونێوە جە جمیەروو گەنجاو کوردستانی.
هامڕاما سارا مەنتێقەو وێرانشاروو شاروو ڕحاینە پەیدا بییەن، ساڵەو ٢٠١١ پەیوەندییش بە شۊڕشوو ئازاڎیی کوردستانیوە کەرڎەن. مزانیۊ کە شاروو ڕحای تارێخنە نوێنەرایەتیی بەهاکاو تارێخی دێرینوو کوردا کەرۊ. هامڕا سارا بەهاکاو ئا خاکەیە کە پەیدا بییەن دلێشنە کەسایەتیی وێشنە ورگێرتەبێ. حەرچندە مێرسین چێروو کاریگەریی ئەرەگیرکاریینە بییەن، بەڵام ئاد کەسایەتیێوە پاکش بێ. چانیشا بێ کە فرە کاریگەریی دوژمنیش سەرۊ بێ. هامڕا سارا ساعیبەو دڵێوە پاکی و عەقڵیەتێوە پاکی و هەستی هەقەتینی و ڕۊحێوە پەر جە موراڵی بێ.
هامڕا سارا فرە وابەسێ بەهاکاش بێ، بەشداریکەرڎەیش جە ڕیزەکاو گەریلاینە بە هەقسانایۊ براکەیش کە ساڵەو ١٩٩٢ گەشمەرڎە بێ دەسش پەنە کەرد. وەرمەکاو زارۊڵەییش پەشتگۊش نەوستێ و گێڵا شۊنیشارە و چەنی تووڕەیی وەنەپەرسەیۊ هەرمانە دوژمنکارانەکاش ژیوا. وەراوەروو دوژمنیوە فرە قەوەتە بێ. دماو ئانەیە زیندانەکاو دوژمنینە ڕزگارش بۊ، ملۊ کەشەکاو کوردستانی. سەروو ئایدۊلۊژیاو ڕابەر ئاپۊی وێش پەروەرڎە کەرۊ. ویرۊکەی ئاپۊیی سەبارەت بە ژیوای، خەبات و فیداکاری نیشانەو گەنجە کۊشەرا دێ. جە پەروەرڎەکەرڎەی و ڕێکوستەی گەنجاو کوردستانینە مەخموورنە و وەرکەوتنە کۊشیای وەرەچەم بی و کاریگەریێوە فرەش سەروو گەنجاو مەخمووری و وەرکەوتی نیابێرە.
هامڕا سارا دڵسۊزە بێ. بەشداریێوە فیداکارانەی دڵسۊزش پەی ڕابەر ئاپۊی، گەشمەردا و هامڕایاش بێ. دژوو هجوومەکاو دوژمنی چەنی هامڕایاش جگە جە پارێزنای ڕابەر ئاپۊی و حیزبی ویرێشا جە هیچی تەری نەکەردێنێوە. دژوو هجوومەکاو سەروو ڕابەر ئاپۊینە چالاکییە فیداییەکاش پەرە پەنە دێ و نیشانەش دا، کە جە حەروەختێوەنە ئامادێنە پەی حەرکۊشیایێوە. کەسایەتیی سروشتیی وێش یاونا ئاستوو فیدایی و سەلەمناش کە ملیتانێوە سەرمەشقەنە.
گەشمەردێما بە ونەو وێشا داروو ئازاڎیی کوردستانیشا ئاوی دا و عەلەمەو مدرامانیشا دژوو فاشیزمی قڕکەری یاونا قەلاپۊپە. گەشمەرداما کەرمێ مانیفێستوو کۊشیای. وەعدما بە گەشمەرڎە بیشەنگێ و سارێ مدەیمێ کە بە دڵ و باوەڕۊ ڕێبازشا وەرمەدەیمێ. کۊشیای ئازاڎیما بە فەرمانەی ڕۊحییەو شمە سەرگنۊ و دەوڵەتی فاشیستوو تورکی دژوو گەنجە فیداییەکاو ئاپۊیی مەڕیا. ئا بەها و ڕەنجێ شمە کە بە کۊشیای خوڵقنانتا و کەسایەتیی بێوێنە و ئیرادەی بەرزوو کۊشیایتا پەی سەربەوێیی کوردستانی ویرما مەشۊوە و درێژەش پەنە مدەیمێ. دوژمنی فاشیست و قڕکەر مشۊم بزانۊ گەنجاو کوردستانی دڵوو وێشانە بیشەنگێ و سارێشا بووژێنێنێوە و فاشیزمشا نیان قەبرە. تۊ و ئینسانکوشەکات بەهەشتوو کوردستانینە وزیا بەرۊ و ناچارێ با بە ئاویروو مدرامانی سزا بدریا. سەروو ئی بنەمێوە بانگەوازوو ئێمە پەی گردوو گەنجاو کوردستانی ئینەنە: "بە ڕۊحوو هەقسانایۊ بیشەنگێ و سارایاوە بەشداریی کۊشیای کەردێ و ئاویروو مدرامانی دژوو ڕانەگەلوو فاشیستا گەشە دەیدێ پەنە".
