هامسەرۆکو گرڎیی دەم پارتی تونجەر باقرخان جە چالاکی "ئازادی"ئامەدینە قسێش کەردۍ، ناڕەزایش بەربڕی ۋەرا ۋەر بە پۆلیسی کە چڼین جارۍ دەنگو سیاسەتمەدارا کپ مکەرا، ئەرەیاۋناش ئینە دووە ڕوویی ئاڎیشا بەروزۆ کە ماچا "ئاشتی تورکیانە بەدی مارمۍ"، واتش: "دەیان هەزار کەسۍ جە گرڎو تورکیایۆ هەوڵشا دا بەیا پەی ئامەدی پەی شەرمەزارکەردەی گۆشەگیری، تەماشە کەردۍ پیلانگێڵنی و گۆشەگیری ئی وڵاتشە یاۋنان بە چ ئاستۍ".

باقرخان ئەرەیاۋناش گلېرۆبیەو دەیان هەزار کەسا ئارۆنە نیشانۍ شکسو پیلانگێڵنی و گۆشەگیری و مایەپووچبیەی سیاسەتو ئاڎیشان، ئەرەیاۋناش وستەیرەو بەرەکا ئیمراڵی زەرەرا پەی دیموکراسیی وڵاتی، واتش: "دەنگو ئێژا عەبدوڵا ئۆجالانی بژنەودۍ کە ماچۆ با بە ئاشتی و دیموکراسی بژیۋمۍ. ئێژا عەبدوڵا ئۆجالان هیواو ئاشتییا پەی گەلوو کوردی. نمەتاودۍ ئێژا عەبدوڵا ئۆجالانی جە کونجێنە بازدۍ، ئێژا ئۆجالان، زەحمەتکێشێوە ئیستەنبوڵین، هەمڕاو ژەنا ئامەدین.

نامونیشانو ئاشتی کۆمەڵایەتی، ئیمراڵییا. نامونیشانێوەتەر پەرلەمانا. بەرەکاو ئیمراڵی بکەردێوە. ئێژا عەبدوڵا ئۆجالان دەسو ئاشتی درێژ مکەرۆ، ئاڎ هیواو ئی وڵاتەینە. من چێوە داوا جە پەرلەمانی مکەرو؛ پەرلەمان نمەتاوۆ ئی پرسەیە پېسە پرسێوە ئەمنی تەماسە بکەرۆ. ئیتر وەسێن. ئەگەر جوانۍ گەرەکشانە هەرمانە پێڎا بکەرا، بژێوی ژیۋایشا پێڎا بکەرا، ژیۋای ۋێشا جە دەس نەڎا، ئەگەر گەرەکتا نیا جەنگو ۋەرکۆتوو مېیامینی چۍ وەڵا بۆوە، پەنەوازا چارەسەری پرسو کوردی چنی مخاتەبەکاش بکریۆ. دەم پارتی پەی ئینەی ئاماڎەن.

ئی ئاشتییە بە سیاسەتو گۆشەگیری نمۍ دی. بە قفڵکەردەی بەرەکا ئیمراڵی نمەبۆ. سەرەڕاو گرڎ باج و ستەم و ئێشێوە، دیسان باسو ئاشتی تورکیای مکەرمۍ. پەی چارەسەری، جە بەرە مېیاننەتەوەییەکا مڎەیمۍ. جە دمایین هۆرچنیەکا دلێینەینە گەل واتش "نا" پەی سیاسەتو گۆشەگیری".