دماو ٢٦ ساڵا پەی یووەمجاری ڕابەر ئاپۆ پەیامێوە ڤیدۆییش وەڵاکەرڎۆ. بانگەوازەکەو ڕابەر ئاپۆی ٩و تەمووزی جە ئاژانسوو هەواڵو فورات( ANF )یۆ پەخشکریا، گەلو سەرنیشت و ۋەرکۊتوو سووریای عەیامێوە بە حەسرەتۆ چەمەڕۍ ڕوې چامنەینې. بنەیانەو گەشمەرڎا سەرو وینای ڕابەر ئاپۆی گوزارشتشا جە هەستو ۋێشا کەرڎ.

'ئێمە چەمەڕاو دییەو ڕابەرەکەیما بێنمې'

سەرەتا شازیا ئیبراهیم-ە کە ئەڎاو گەشمەرڎا عەلی و بیرهاتین فرەو وەختی ڕابەر ئاپۆش دیەن، واتش: "پېسە ئەڎاو گەشمەرڎا زوۆن چەمەڕاو ئی ساتە وەختیە بێنمې و واتش: "ماوەو ٢٧ ساڵانە نزیکەو یەرې جارا وێنەو ڕابەر ئاپۆی جە ئیمراڵینە وەڵا کریانۆ، چا ماوەنە بە پەشت بینای بە وێنەکاش ئاژەو ڕابەر ئاپۆی هۊرسەنگنێنمې، بەڵام ئیجارە، وینای دیمەنو ڕابەر ئاپۆی پەی ئێمە ژیۋایې تازەن."

'قسەکې ڕابەر ئاپۆی پەی ئێمە مۊچیارییا'

شازیا ئیبراهیم-ە ئاماژەش پانەیە دا کە پەیامەکەو ڕابەر ئاپۆی پەی گەلو کوردی مۆچیارییا و جە درێژەنە واتش: "ڕابەر ئاپۆ جە پەیامەکەشەنە واتش کە من حەجگیز ویرم جە ئازادیی ۋێم نەکەردەنۆ، ئازادیی من پېوەسا بە ئازادی گەلیۆ." ئێمەیچ پېسە گەلی وەڵتەر واتەنما ئەر ڕابەر ئاپۆ ئازاد نەبۆ، ئێمەیچ ئازادې نیەنمې. ئینەیچ پا مەعنێنە کە پەیامەکەو ڕابەر ئاپۆی و قسې گەلی پېسەنې یۆی و کەس نمەتاوۆ گەل و ڕابەر ئاپۆی جە یۆی جیا بکەرۆوە."

هەرپاسە نوری ئەحمەد براو گەشمەرڎە حەمیدی، بە وینای ڕابەر ئاپۆی باسش جە هەستو ۋێش کەرد و واتش: ''٢٧ ساڵې موېیەرۆنە، بەڵام کاتێ تەماشەو دیمەنو ڕابەر ئاپۆیما کەرد، ئا هێڵە ڕاس و بەبڕیار و هێڵە مرۆییې هەڵای مېیاچەماشەن پیویې. چنی ۋێش گرڎو جەهانی گێرۆنە ئامێز و ئینەیچ چا باوەڕۆن کە جە گەلەکەیشۆ سەرچەمە گێرۆ وەڵې ئانەینە دیمەنەکەو ڕابەر ئاپۆی سەرو شاشەکاوە بوینمې، بەردەوام چەمەڕاو بەرکۊتەیش بێنمې. دماو ٢٦ ساڵا، ئینە یووەمجارا ڤیدیۆو ڕابەر ئاپۆی وەڵا مکەریۆوە و پەی ئێمە مەعنێوە فرەش هەن."

'پەنەوازا ئێمە خاوەنداری جە ڕەنجو ڕابەر ئاپۆی بکەرمې'

هەرپاسە ئەڎا ڕەبیعە قەواسە، ئەڎاو گەشمەرڎە مەمۆی، ئەرەیاۋناش کە بە دەنگ و دیمەنو ڕابەر ئاپۆی، مۆڕاڵێوە گۊرەش هۊرگێرتەن و واتش: "چا کاتۆن دیما، فرە بە ورە و دڵوەشێنمې، چونکی دماو چڼین ساڵا دەنگ و دیمەنو ڕابەر ئاپۆیما دی، کاتێ ئاژەو ڕابەر ئاپۆیما دی، مۆڕاڵ و هێزش ویناما، ئێمەیچ هێز و مۆڕاڵما هۊرگێرت. مەشۆم چیولای سەرو ئا بنەمایې بەردەوامې بیمې، ڕابەر ئاپۆ ساڵانێوە فرەن جە ئیمرالینە درێژە بە ئەوەکۊشای مڎۆ، پۊکەی مەشۆم پا جۆرە بەردەوامې بیمې و خاوەنداری جە ئەوەکۊشای و ڕەنجو ڕابەر ئاپۆی بکەرمې."