فایەق حامید نوویسەر و چالاک و ۋەرکەوتوو کوردسانی، کە جە ساڵەو ٢٠٢١ینە بەبێ حیچ تۆمەت و تاوانێوە پۍ ماوەو چن مانگۍ جە زینڎانەکا پەدەکەینە زینڎانی کریان و جە مافە سەرەتاییەکاش بێ بەش کریابۍ و پاشێلکاریش ۋەران ۋەر کریابۍ ، نامبریا سەبارەڎ بە دۆسیەکەیش و خراپی ئاژەو زینڎانەکا پەدەکەی و چن پەرسێوە تەری جە چەمپنەکۊتێوە تایبەتەنە پۍ ئاژانسوو هەواڵی فورات (ANF)ی قسێش کەردۍ.

نوویسەر و چالاکی مەدەنی و خێرۆمەنڎینا

جە سەرەتاو قسەکاشەنە فایەق حامید نوویسەر و چالاک ۋێش ئشناساو واتش: "من نامێم فایەق حامید-ا تەمەنم ٤٢ ساڵێن و جە ئەڎابیەو شاروو بۆکانینا و ماوەو ١٥ ساڵان ئەرەنیشتەو شاروو پیرانشارینا، هەرمانەو من پزیشکوو ئاژەڵانا و پەناو هەرمانەکێمەنە هەرمانەو نوویسەری و هۊرگێڵنایم کەردەن پۍ چن کتێب و مژارێوە چنی هەرمانەو لووایۆ پۊرەیرە، حەرپاسە جە ڕێکوزیا مەدەنی و خێرخوازیەکانە چالاک بیەنا،  ماوەو نزیک بە پەنج ساڵایچا ڕاوەبەر و بەرهەمئاوەروو ڕێکوزیاو ئاژەڵپارێزنا بەهارانوو پیرانشارینا، بە مەڵامەتوو هەرمانەکامۆ چن دۆسێوەم جە هەرێموو کوردسانیوە ئامۍ شۊنیمەرە، واتشا کە نامیەیی منشا ئەژنیەن و حەزکەرا پێوەرە هەرمانە کەرا، منیچ پەی خزمەتکەردەی لووانی".

پۆلیسۍ پەدەکەی فرە بێ ڕێز و ناشرین مامەڵە کەرێنۍ

جە درێژەو قسەکاشەنە سەبارەڎ بە لووایش پێ مەنتیقەکا پەدەکەی پاشێلکەردەی مافەکاش جە تەرەفوو هێزەکاو پەدەکەیۆ، نامبریا واتش: "دماو ویەرناو ئاژەو پەتاو کۆڕۆنای جە هامنوو ساڵەو ٢٠٢١ بەداواکاری کەسێوە جە هەولێرەنە سەردای شارەکەیم کەرد کارتوو ئەرەنیشتەبیەیما هۊرگێرت، جاڎێوە هەولێرینە ویەرێنمۍ تووشوو پۆلیسێوە ئامایمۍ کە بەشێوێوە فرە ناشرین پرسیارەش کەردە کە ئێمە چێش کەرمۍ شارەکەنە، پۆلیسەکە حۊڵ دۍ دەدا گێچەڵەما پنە کەرۆ، پنەم سەیر بۍ کە ئا پۆلیسە چن بێ رێز بۍ ۋەران ۋەرما و ئێمەش بەردیمۍ پۍ بنکەو پۆلیسی و چا پنەشا وات ئینە چێشا و پۍ چی ئینێتە ئاردێنۍ؟ ئاڎیچ ئاماوە جوابوو واتش ئینۍ ئێرانیێنۍ و ئیرانیێچ یا سیخوڕێنۍ یا قاچاخچی".

دلۍ سیستموو دەسەڵاتوو پەدەکەینە تۆمەت هۊربەستەی فرە ئاسانا

فایەق حامید باسش جە سیستموو تۆمەت هۊربەستەی پەدەکەی کەرد دلۍ زینڎانینە و ئاشکراش کەرد : "دلۍ سیستموو دەسەڵاتوو پەدەکەینە پێسە ئاو واردەیۆ دروۍ کریا، وەختۍ ئێمەشا بەردۍ پۍ لاو دادوەری، دادوەر پرسیارەش ۋنەکەردیمۍ کە چ کارێنمۍ چۍ، پنەم وات کە ئێمە خوڵقە کریێنمۍ و کارتوو ئەرەنیشتە بیەیم نیشانەدا، دماتەر فاڕیایمۍ پۍ زینڎانوو پۆلیسی، دماتەر ئاگاڎارۍ بیەیمۍ کە دووۍ کەسی ئێرانیۍ بە بازرگانی مادەی هۆشبەریۆ و واردەیۆ کحولییەکاوە گیریێنۍ، ئانەی چا زینڎانەو پەدەکەینە دیم، جە ژوورێوەنە ٤٠ کەسێش چنەبێنۍ بە تەمەنە جیاوازەکاوە، کە ۋێم ئشناسا دووۍ کەسۍ بەتەمەنێش چنەبێنۍ کە ئاڎێیچۍ دکتۆرۍ بێنۍ، فرەو زینڎانیا بە تۆمەتۍ گولانۍ یان حیچیۆ گیریێبێنۍ، دماتەر کەسێوە ئاما کە تۆمەتێما پۍ هۊربەسۆ، حبێوە کیسەو هامڕاکەیمەنە بۍ واتشا ئینە مادەی هۆشبەرا ئاڎیچ واتش جە وشگناگانە وشکنایش پۍ کەردۍ تا بزاندۍ کە ئینە مادەی هۆشبەر نیا".

پەدەکە جە ڕاو نمایش کەردەو هێزەکاشۆ حۆڵمڎۆ خەڵکی تەرسنۆ

ئا چالاکە باسش جە ماوەو مەنەیۊیش جە زینڎانەکا پەدەکەینە کەرد، ئەرەیاۋناش: "جە تەماموو ژیۋایمەنە بێ ڕێزیم نەڎییەبۍ بەڵام ئانەی جە زینڎانوو پەدەکەینە دیم پۍ من فرە قورسبۍ، دماو ١٧ ڕووا جە مەنەیۆ زینڎانەنە بەشێوێوە فرە ناشارستانی کەلەپچەکریایمۍ و جە کەش و هەوایۍ گەرمەنە دلۍ شۊنمایۍ گرڎیی و خەڵکینە ئێمەشا بەردۍ و دەنگو فرەیی ترۊمبێلەکا ئاسایشی ئۍ تا خەڵکش پنە تەرسنا کە هێزێوە ئەمنی هەن، دماو ئەوەکۊڵیای کە زاناشا حیچ تاوانێما نیەنە، واتشا فەرماودۍ دیسان نەزاناما پۍ کۊیما بەردۍ پۍ ئازاڎیی یا زینڎانی، جە پەشتەو بیناکێنە ئێمەشا کەردۍ زینڎانێوە سەردەموو سەدام حسێنی، دماتەر ئێمەشا کەردۍ ژورێوە فرە پیسۆ کە درێژی و پانی ژورەکەی پەنج بە نۆ مەترۍ بۍ، نزیکەو ٥٠ کەسا چا ژورەنە بێنمۍ و ساڎەتەرین پەنەوازی ئینسانیش چنە نەبۍ، هەروەختۍ کە ژمارەو گیریایەکا یاوۍ ٧٠ کەسۍ ژمارەکەی کەم کەرێنێوە".

بەشێوە جە زینڎانی کریایا کریێنۍ بە زۆردار سەروو زینڎانیا تەریرە

حەرپاسە دەربار بە خراپی مافوو مرۆڤی جە زینڎانەکا پەدەکەینە واتش: "ڕووانە ماوەو پەنج پۍ ١٠دەیەقا بەرە کەرێنێوە پۍ گرڎوو پەنەوازیەکاما، ماوەو حەفتێوە چایچ گیریایمۍ، دماو ماوەو ٢٤ ڕووا جە گێرتەی فاڕیایمێوە و هامڕاکەم ئەجێشەنە ئازاڎۍ کریایمۍ بەڵام دیش کەسێوە زێرەڤانی پەدەکەی چەمەڕاو ئێمە بۍ و ئێمەشا بەردیمۍ پۍ شۊنمێوە نادیاری، دماتەر یاوایمۍ ئاسایشوو گرڎینوو هەولێری و کە شۊنمایۍ فرە خراپتەر و پیستەر بۍ حەرپاسە ٧٨کەسۍ جە ژورێوە ٣٥ مەترینە بێنمۍ و تەنیا موبەڕیدێوەش چنەبۍ، چا زینڎانەنە کەسانێوە کە زینڎانی کریێنۍ جە تەرەفوو پەدەکەیۆ کریێنۍ بە چەمڎارۍ و کریێنۍ بە زۆردار سەروو زینڎانیا تەریرە کە ئا زینڎانی کریۍ  هەرمانە پۍ دەسەڵاتی کەرا ژیۋای زینڎانی فرە ناوەشتەر کەرا".

ئەگەر تاوانباریچ نەبی ئەشکەنجە مڎریەی

سەبارەڎ بە خراپی زینڎانەکا پەدەکەی ئا نوویسەر و چالاکە ئاشکراش کەرد: "هەر کەسێوە جە ئاسایشوو گرڎیی پەدەکەینە پۍ ئەوەکۊڵیای چڕیابیۍ ئانە ئەشکەنجە دریۍ ئەگەر تاوانباریچ نەبیۍ، دماو مەنەیۊیم پۍ ماوەو دوو حەفتا حیچ دەنگ و باسێوە نەبۍ و دماتەر چڕیەیمێشا، فرەو کەسەکا چەمێشا بەسیێنۍ جە وەختوو لووایشانە پۍ ئەوەکۊڵیای، دماو ئەوەکۊڵیای گێڵایمۍ ژوروو زینڎانی، دماو ١٩ ڕوواتەری دیسان چڕیەیمێشاوە پۍ لووای پۍ دادگای بەڵام سەردای کەردەی دادوەری تەنیا مژارێوە (شکلییا) تاوەکو واچا جە بواروو ڕاوەبەرینە هەرمانەکێما کەردێنۍ، جە ماوەو ١٠ دەیەقانە دادوەر ١٩ کەسۍ ڕایی کەرۍ، جە سەردەموو کۆڕۆناینە بێنمۍ حیچ ڤاکسینێوەشا نەڎا بە خەڵکی جە وەختوو وینای دادوەریچەنە تەنیا یەک دەمامک بۍ کە ٢٠ زینڎانیۍ بەکارش ئارێنۍ، کە ئینەیچ پاشێلکەردەو ساڎەتەرین مافوو مرۆڤیا".

حۆت مانگۍ بەبێ دادگایی کەردەی زینڎانەنە بێنا

فایەق حامید باسش چانەیچ کەرد بەبێ دادگایی کەردەی پۍ ماوێوە درێژمەودای پەدەکە خەڵکی زینڎانی کەرۆ، و ئەرەیاۋناش: "دادوەر کە پرسیارەش ۋنە کەردا جە جوابشەنە واتم ماوەو دووۍ مانگان بەبێ ئانەی بزانوو پۍ چی جە یەرۍ زینڎانانە بیەنا، حەرپاسە واتم ئەگەر دادپەروەری بیۍ ئشیۍ من شەکوام چا کەسەیە کەردۍ کە ئێمەش دا گێرتەی، حۊت مانگۍ دماتەر بەبێ سەردای جە دادگای شەوێوە وەرمەنە هورشا ئێزنانی واتشا هورزە کەلوپەلت کۊکەرۆ و لووە بەبێ ئانەی پنەم واچا سەروو ئانەی گیریانی".

بەڵگەو ستەم ۋنەکەردەیم بە گرڎوو جەهانی نیشانە مڎەو

فایەق حامید  باسش چانەی کەرد کە دماو بەرشیەو قەراروو بێ تاوانیش بەڵام ستەموو پەدەکەی بەردەوامیش بۍ، و ئاماژەش پانەیچ کەرد کە حیچ وەخت بێ دەنگ مەبۆ جە ۋەران ۋەروو ئا ستەمەی کە جە ۋێش و زینڎانیا تەری کریا و ئەرەیاۋناش: "دماو بەرشیەو قەراروو بێ تاوانیم ئامانی پۍ فەرمانگەو نشینگەی تا مۆرێوە بەرشیەی جە پاسپۆرتەکەیم بڎا، بەڵام ڕةڎشا کەردۆ کە مۆرەو بەرشیەیم پۍ کەرا چونکی پەدەکە خەڵکوو ووڵاتا تەری ناچار کەرا کە دیپۆڕتۍ باوە یان بە قاچاغ گێڵاوە منیچ ناچاربیا بە قاچاغ گێڵووە، جە وەختوو گێڵایۊیمەنە پۍ ئێرانی دووۍ بەڵگۍ ئاسایشی و دادگایم چنی ۋێم ئاردۍ، پێسە بەڵگێوە بە گرڎوو دنیێش نیشانە مڎەو، هەر دادگایۍ قبووڵ کەرۆ ئا هاوار و شەکوایا ۋێم و ئانیشا کە زینڎانەنە چنیم بێنۍ میاونوش بە دادگای".

پۍ دڎان نیایپۊرەی ساختەی جۆرەها ئەشکەنجە بەکارمارا

فایەق سەرنجش وست سەروو دڎان نیایپۊرەی زۆرەملێرە جە زینڎانەکانە جە تەرەفوو دەسەڵاتوو پەدەکەیۆ و ئاشکراش کەرد: "ڕازۍ دڕندەیی زینڎانی فرۍ بێنۍ یۆ چا ڕازا ئەشکەنجەداین، ئەگەر دەسەڵاتوو پەدەکەی پەنەوازش پانەی بۆ کە دڎانش بنیەی پۊرە ئنە ئەشکەنجەت مڎۆ تا دڎانە پا تاوانێرە بنیەی کە ئاڎیی گەرەکا، هامڕام هەن کە ماوەو ٣ ساڵان زینڎانی کریان چونکی ئاماڎەنیا دڎان بە تاوانێرە بنیۆ کە نەکەردێنەش، حەرپاسە جۆرەها ئەشکەنجە بەکارمارا چانیشایچ دایوەنەی، جەکارەبا دای و جۆرەها ئەشکەنجەو سایکلۆژی و جەسڎەیی تەر، یۆ جە هامڕاکام بەردشا پۍ ونەکۊڵیای کە ئاماوە شەل و کوت بیەبۍ".

ئاسایشەکۍ پەدەکەی هەست بە کەموکوڵی کەرا و قۊرتەی دەروونیەشا هەنە

فایەق حامید، باسش جە عەقڵیەتوو ئاسایش و هێزە ئەمنییەکا پەدەکەی کەرد وەختۍ کە چێژ جە عەزیەتدای ئینسانی گەورەی وینا، و ئاماژەش پانەی کەرد: "ئەگەر جە ڕوو دەروون ناسییوە تەمەشە و ئا ئاسایشاو پەدەکەیە کەرمۍ، کە خەڵکی زینڎانەکانە ئەشکەنجە مڎا کەسانێوەنۍ کە بێ نازوو ئەڎا و تاتەی بیێنۍ و هەست بە کەمکوڕی کەرا و قۊرتەی دەوورنیشا هەنە کە ۋێشا بە کەم وینا کە مافوو ژیۋای کەردەی زیاڎا پۍ ئا کەسا کە خەریکۍ ئەشکەنجداو خەڵکینۍ، ئا کەسەی کە هەرمەنەو ئەشکەنجەدای کەرۆ جە زینڎانەکا پەدەکەینە شەرم مەکەرۆ کە تۆ کێنی و کەسایەتی و بنەیانەت کێن، بەڵکم پنەش وەشا و ماچۆ کە جە دکتۆر، ئەندازیاری یان زارۊڵێوە و پیرێوەم دان، کەواتە ئەشکەنجە پۍ ئاڎیی جۆرێوەن جە بەربڕیەی نەوشی ئەنداماو هێزەکا پەدەکەی".

٧٠٪و ئا کەسا کە جە تەرەفوو پەدەکەیۊ گیریێبێنۍ بێ تاوانۍ بێنۍ

حامید باسش جە بێ تاوانی بەشێوە فرەو زینڎانی کریایا زینڎانەکا پەدەکەی کەرد و ئاشکراش کەرد: "فرەو گیریایەکا کەیسەکاشا گەورە کریۍ تا نیشانەش بڎا کە دەسکۊتشا بیەن، رۆنامەنوویسێوە بۍ تەمەنش نزیکەو ٢٠ ساڵۍ بۍ کە منافسوو کەناڵوو ڕووداوو پەدەکەی بۍ پۊکەی ئەنداماو ڕووداوی شەکواشا سەر تۆمارکەردەبۍ، کە گیریا حبێوە نەوەشی سەرعیش بۍ، پنەشا واتەبۍ ئی حبۍ قەڎەغە کریێنە و قاچاخەنە پۊکەی گیریانی، گرڎوو ئی تۆمەتە ساختا پەی ڕازیکەردەی فەرماندەکاشا و بنەیانەو بارزانی بۍ، ٧٠٪و ئا کەسا کە جە ئاسایشوو گرڎیی پەدەکەینە گیریێبێنۍ بێ تاوانۍ بێنۍ، مەزانوو ئەنداماو هێزەکا پەدەکەی بە چ شەرەف و ویژدانێوە مژیوا و نان وەرا".

جە زینڎانوو پەدەکەینە ئینسان جە تەماموو مافەکاش بێبەشکریان

حامید باسش جە خراپی ئاژەو مافوو مرۆڤی و پاشێلکاریەکا پەدەکەی ۋەران ۋەر بە زینڎانیا کەرد و ئەرەیاۋناش: "گەرەکم نیا تەرەفڎاری پۍ حیچ لێوە کەروو، بەردەوام تەرەفڎاروو ڕاسی بیەنا حەرچنڎە کە ڕاسی قورسیچ بیەبۆ بەڵام واتەنم جە بارەو ڕاسگۆیی ۋێمۆ سەر بەرزەنا، زینڎانیچەنە بەرشیانی ژیۋایم هەر بەردەواما، کەسانوە کە جە زینڎانەکا ئێران، تورکیا، و سوریاینە بیێنۍ کەس بۍ کە پۍ ماوەو ١١ ساڵا زینڎانی سیاسی عیراقی بیەن، بەڵام پێسە دووۍ حەفتا زینڎانەکا پەدەکەی نەبیەن، جە حیچ یاگۍ دنیێنە شۊنمێوە خراپی پێسە ئاسایشوو گرڎی پەدەکەی نیا جە هەولێرەنە کە بە زینڎانی وەختی نامۍ بریان بەڵام بە ساڵان چنەشەنە زینڎانیت کەرا و یاگەگۍ پۍ ٢٤٠ کەسا وەشکریان بەڵام ٩٠٠کەسێش ئینۍ چنە، گرڎ دەیەقێوە ڕۊی دلۍ ئا زینڎانەینە ئەشکەنجەن و ئینسان جە تەماموو مافە سەرەتاییەکاش بێبەشکریان و پاشێلکاریش ۋەران ۋەر کریۆ".

جە مەنتیقەو بنەیانەو بارزانینە دیکتاتۆریەتێوە هەن کە جە حیچ ووڵاتێ دنیێنە نیا

فایەق حامید پی جۊرە باسش جە دکتاتۆریەتی بنەیانەو بارزانی کەرد: "وەختۍ ویر جە کەلیمۍ دکتاتۆری کەرمێوە گرڎ کەسۍ زینڎانەکاو سەدام حسێنیش ویر مەیاوا بەڵام کەسانێوە چنیما زینڎانی کریێبێنۍ کە سەردەموو سەدام حسێنیچەنە زینڎانیۍ بیێنۍ، واچێنۍ زینڎانەکۍ پەدەکەی فرە خراپتەرێنۍ جە زینڎانەکا رژێموو بەعسی، ئەجۊمەنە کەس نیا پێسە بنەیانەو بارزانی دکتاتۆرۍ با، بنەیانەو بارزانی کەسۍ ماساوچیێشا جە دەوروو ۋێشا کۆکەردێنۍ زەڕی دزیاو مووچەو خەڵکی و نەوتۍ هۊرگێرا و مڎاش بە ماساوچییەکاشا، خەڵکێوە فرە جە بنەیانەو بارزانی بێزارێنۍ بەڵام مەتاوا دەنگ هۊربڕا، یەک چێوم پنە سەیر بۍ کە ئاسایشەکۍ خەڵکی ناچار کەرێنۍ کە قەسەم بە قەبرەو بارزانی وەرا تا ئازاڎۍ با بەڵام دروێشا چنی کەرێنۍ و ئازاڎێشا نەکەرێنۍ، جە مەنتیقەو پەدەکەی و بنەیانەو بارزانینە دیکتاتۆریەتێوە هەن کە تەنانەڎ جە کۆریای سەرنیشتی و حیچ ووڵاتێوە تەرینە نیا".

بنەیانەو بارزانی  گرد هەوڵێوەشا پەی زەڕی بۍ  نەک ئازادی و ماف

هەرپاسە نامێبریا ناوبراو باسوو ئانەیش کەرد کە ئامانجوو بنەیانەو بارزانی بە درێژایی تاریخی هەر زەڕ بییەن هیچ باوەڕێوەشا بە ئازادی و مافوو نەتەوەی نەبییەن و خەڵکشا پەی بەرژەوەندییشا دان کوشتەی و واتش: "یاگۍ شەرمەزاریینە پەی بنەیانەو بارزانی کە ئا گردوو خەڵکیشا دا کوشتەی تا نیمەحکومەتێوە ورگێرا کە هیچ شۊنەو ئازادی و مافیوە نەبێنێ، بەڵکوم پەی زەڕی بێ، هومێد کەروو خەڵک بلۊ ویرەوەرییەکاو (پۊڵ برێمەر)ی بوانۊوە، کە حاکموو عێراقی بۍ دماو وڕیای ڕژێمی وەڵینوو بەعسی، ماچۊ ' وەختۍ مەسعود بارزانی و مام جەلال ئامۍ زانام بە زەڕ گرد چێوۍ کەرا چونکوم  ئامانجشا تەنیا زەڕا ' و خەڵکیچشا تەنیا پەی زەڕی چەوسنانۊ، کە چەمشا شۊنەو زەڕیوە بۊ، سەڕەڕاو بییەی نەوتۍ فرۍ بەڵام خەڵکی بێنەوتێنۍ و هەردووە بنەیانە و دەسەڵات زەڕوو نەوتەو خەڵکی پەی وێشا بەرا، ئیساتۍ بنەیانەو بارزانی مەنتێقەو مەسیفیشا پەی وێشا داگیر کەردەن و کەردەنشا بە خەتەی سوورە، کە سەرۊکی حیچ وەڵاتێوە پاسە مەنتێقەش پەی وێش داگیر نەکەردەن، کە ڕا مەدۊ کەس نزیکش بۊوە."

ئشیا پەدەکە نامێش "پارتوو بنەیانەو بارزانی"ی بیێ

هەرپاسە ئا چالاکە باسوو چەمچنۊکیی بنەیانەو بارزانییش کەرد و واتش: "پەدەکە نامۍ وێش نیێنە "پارتی دیموکرات" بەڵام ئشیا نامێش پارتوو بنەیانەو بارزانیی  بێی، فریودای خەڵکی وەسێن، ئانۍ بنەیانەو بارزانی مداش بە خەڵکی خاسەو وێشا نییا بەڵکوم مافوو ئا خەڵکەینە کە ٩٠٪ لاو بنەیانەو بارزانییوە دزیان، چەنی بۊساڵێوە دماو سەربەوێبییەی هەرێموو کوردستانی مەیا ڕیزوو دۊڵەمەندتەرین کەسەکاو جیهانیوە، پەی ئانەی وێشا دۊڵەمەند کەرا خەڵکشا قڕ کەردەن، بە ملوێنەها کەسۍ ئاورۍ و هەژارۍ بیۍ  تا سەدان کەسۍ دۊڵەمەندۍ بیۍ و بزاندۍ کە دیکتاتۊریەت چەنینا."

ڕۊو بنەیانەو تەمامیان، مشۊم چەمەڕۍ ڕۊی سیاویشا با

ئاخروو قسەکاشنە، حامید فایەق نویسەر و چالاک، باسش جە بێدەسەڵاتیی بنەیانەو بارزانیی کەرد، کە سەرەڕاو بییەی هێزێوە فرەی هەوڵۍ مدۊ، کە وێش قەوەت  نیشانە بدۊ، جە ڕاو هێزە سەرکوتکەرەکاشۊ، واتش: "ئاسایشەکەشا تەماموو شانازیی بنەیانەو بارزانیین، وەختێوەنە کە تەماموو وەڵاتەکاو دەوروبەری و جیهانی ئامێنۍ  سەروو خاکوو پانیشتوو کوردستانی پەدەکە نەتاوانش پارێزگاریی جە پانیشتوو کوردستانی کەرۊ، بکات، بەڵام وەختۍ کەسێوە دەبێوە ئاوی بدۊ گەریلاکاو پەکەکەی ئیتر دەسەڵاتوو بنەیانەو بارزانی بە تۊمەتوو سیخوڕی و خیانەتی گێراش، من یوەم کەس نییەنا، کە ڕەخنە جە بنەیانەو بارزانیی گێروو سەرتاسەروو جیهانینە کەسانێوە فرۍ هەنۍ ڕەخنە وەنەو بنەیانەو بارزانیی گێرا، پەدەکە و بنەیانەو بارزانییچ  کەسۍ بەکرێگیریۍ گێرا پەی تیرۊرکەردەی ڕەخنەگێرا، ئیتر ئانە نەمەن پەدەکە خەڵکی بە تیرۊرکەردەی بێدەنگ کەرا، ڕۊو بنەیانەو بارزانی تەمامیان، مشۊم بنەیانەو بارزانی چەمەڕوانۍ ڕۊو سیاوو وێشا با."