هاوسەرۆکو گرڎیی پارتو یەکسانی و دیموکراسیی گەلا (دەم پارتی) تونجەر باقرخان جە ئامەدەنە سەرش ۋنەو پارتە کوردییەکا دا. باقرخان سەرەتا سەرش ۋنەو پارتو مرۆڤ و ئازادی (پیا)ـی دا. هاموتەواچا دەسوەڵێوستەی یۊبیەی دیموکراتیکی، موحەمەد کۆجاک و گولجان کاچماز ساگیتە و ۋەرپەرسو کۆمیسیۆنو پەیوەندییەکا پارتە سیاسییەکا و یاگەگیرو هامسەرۆکا گرڎیی ئۆلزەم گوندوزیش ئاماڎۍ سەرۋنەداکەی بێنۍ.

دماو خێرئامایشا، تونجەر باقرخان ئەرەیاۋناش جە چوارچێوەو پرۆسەکەینە چنی پارتە سیاسییەکا کۊباوە و سەرنج و تێبینیی پارتە سیاسییەکا گلېرمکەرمېوە و واتش: "هەوێش ئېژا ئۆجالا بە تایبەت سەرنجش وستەن سەرو گرنگی سەرەنجو کۆو پارتە سیاسیەکا و داواش ۋنەکەردیمۍ جە نزیکۆ گرنگی بڎەیمۍ بە سەرنجو پارتە کوردییەکا. جە سەرۋنەدایەکا تەریمانە داواشکەردە سەرو بنەماو ئی گلېرۊبیەیا ئاگاڎارش بکەرمېوە. پۊکەی ئی گلېرۊبیە و سەرۋنەدایێما دەسپنەکەردێنۍ."

دماتەر ئەحمەد کایای هامسەرۆکو پیای قسێش کەردۍ و جەختش جە پەشتیوانی پارتەکەیش پەی پرۆسەکەی کەردۆ.

جە گلېرۊبیەکەینە باقرخان جوابو پرسیارەو ڕۆنامەواناش داوە و پېوەس بە داواو ڕابەر ئاپۆی پەی چەمپنەکۊتەی چنی سەرکردە کوردییەکا پېسە مەسعود بارزانی، بافڵ تاڵەبانی و مەزڵوم عەبدی... قسێش کەردۍ و ئاماژەش پانەی دا یۊبیەی نەتەوەیی کوردی گرنگیێوە فرەش هەن لاو ڕابەر ئاپیۆ و واتش: "باسو سەرکردێوەر سیاسی مەکەرمۍ کە جە ساڵەکا ١٩٩٠یۆ چنین جارۍ بانگەوازش پەی یۊبیەی نەتەوەیی دیموکراتیکی کەردەن و پەی ئی مەبەسیچە داواو کۆنگرەی نەتەوەییش کەردەن. هیواڎارەنا جە ئایندەنە ئېژا ئۆجالان جە درێژەو پرۆسەکەینە پەیلوای ۋێش چنی سەرکردە کوردییەکا فاڕۆوە و پەیلوایەکاشا هۊرگېرۆ. بەراسی ئینە گرنگ و بنەڕەتییا پەی وەڵێکۊتەی پرۆسەکەی. پېسە دەم پارتی باوەڕیما چامنەن ئی چەمپنەکۊتەیۍ هامکاریێوە گۊرەو پرۆسەکەی مکەرۆ و پەنەوازا ئەنجام بڎریۆ."

دماتەر گلېرۊبیەکەی دوور جە ئەرەیاۋناکا بەردەوام بۍ. دماو گلېرۊبیەیش چنی پارتو پیای، باقرخان و شاندەکەش سەرشا ۋنەو جەمەو چاندی دیموکراتیکی شۆڕشگێڵنی (دەدەکەدە)ـی دا. چا سەرۋنەداینە موحەمەد کاماچ قسێش کەردۍ و سەرنجش وست سەرو گرنگی یۊبیەی کوردا. کاماچ ئەرەیاۋناش جە ٢٦و تەمووزینە جە بازید و جە سەرەتاو مانگۊو تشرینی یووەمینە جە مێردین کۆنفرانسێوە ڕێکوزا.