پارتو یەکسانی و دیموکراسی گەلا (دەم پارتی) بە ئەرەیاونێوە نویسریا ٣ی ئایاری ڕۆو جەهانی ئازادی ئەرەیاونایش موبارەک کەرد و ئاماژەش پانەیە کەرد، ئا ڕووە بە قەرارو نەتەوە یۆگێرتەکا ساڵە و ١٩٩٣ێ پێسەو 'ڕۆو جەهانی ئازادی ڕۆنامەوانی' موبارەک کریۆنە، بەڵام ئی ڕووە تورکیانە دوور جە گرڏ تایبەتەمەندییەکا موبارەک کریۆنە و گرڏ جۆرە کۆمکووژی و فشارێوە سەرو ڕۆنامەوانا بریۆ ڕاوە.

جە درێژەو ئەرەیاوناکەینە ئاماژەش بە فشار و سانسۆری کریان، باڵبەسکەردەی بێ هۆ، ئەشکەنجە و کۆمکووژیی سەرو ڕۆنامەوانا کریان و ماچۆنە: "بە پاو پێوەرەکا ئازادی ئەرەیاونای جەهانی ڕۆنامەوانا بێ سنوور (RSF) ئێساڵ تورکیا جە بوارو فشار و هرووژمەکا سەرو ڕۆنامەوانا بەینو ١٨٠ وڵاتانە ئینا ڕیزبەندی ١٥٩ـەمین وڵاتەنە."

زیاڏ جە ١٥ ڕۆنامەوانێ کوشیێنێ

جە بەردەوامی ئەرەیاوناکەینە سەرنج وسیان سەرو هرووژم و فشارەکا دەسەڵاتداری و دۆڵەتو تورکی پەی سەرو ڕۆنامەوانا و ئامان: "جە ماوەو پەنچ ساڵا دماینە، ١٥ ڕۆنامەوانێ جە هرووژمی سەروازینە سەرو هەرێمو کوردەسانی و وەرنیشتوو کوردەسانی کوشیێنێ. مەڵامەتو کوشتەیشا ڕووماڵکەردە و بەر وستەو حەقیقەتەکا بێ."

دمای ئەرەیاوناکەینە یاڏو گەشمەرڏا ئەرەیاونای کریاوە و ئامان: "پێسەو دەم پارتی سڵام جە گرڏ و ئا ڕۆنامەوانا مکەرمێ کە جە بنیادنیاو ئاشتی و گلێرگەو  دیموکراتیکینە بە شایستەوە ئەرکو وێشا جابەجێ کەردەن. جە کەسێتی مەتین گۆکتەپەی، غوربەتلی ئەرسۆز، هرنات دینک، ئاپێ موسا، ناگیهان ئاکارسەل، نازم داشتان و جیهان بیلگینینە گرڏ و گەشمەرڏا ئەرەیاونای ئازادی بە ڕێز و پنەزانایۆ یاڏ مکەرمێوە. ئی ڕووەیە جە گرڏ و ڕۆنامەوانا موبارەک مکەرمێ."