دووۍ کاندیدۍ پەدەکەی بە تۆمەتوو بە عسیبیەی جە پڕۊسەو هۊرچنیەینە دوورۍ وزیېوە
دماو ئانەی سەرۆکوو لیستوو بەرەی تورکمانی بە تۆمەتوو بەعسی بیەی جە هۊرچنیەی دوور وزیاوە بەهەمان تۆمەت دووۍ کاندیدۍ پەدەکەیچ جە هۊرچنیەی دوورۍ وزیېوە.
کۆمسیۆن و سەربەخۆو هۊرچنیەکا عێراقی دووۍ کاندیدۍ پەدەکەیش بە تۆمەتوو بەعسی بیەی جە هۊرچنیەکا ئەنجوومەنوو پارێزگاکا عێراقینە دوورۍ وستېوە، ئانە جە وەختېنە هەمان کۆمسێۆن وەڵتەر تۆرهان عەبدولرەحمان، سەرۆکوو لیستی بەرەی تورکومانی جە کەرکوک دووروستەبېوە.
جە چوارچێوەو دووروستەیۊ بەعسیەکانە کۆمسیۆن حەر یۊ جە یوسف محمود و مەهدی حاجی علو، کاندیدۍ پەدەکەی جە پاریزگاو نەینەوای دوورۍ وستۍ، سەرەڕاو ئانەی ئا دووە کاندیدەو پەدەکەی تەعنشا جە قەرارەکەو کۆمسیۆنی گېرتەبۍ بەڵام تەعنەکەشا ڕەڎکریاوە و بە تەمامی جە پرۆسەو هۊرچنیەی دوور وزیېوە.
ئا ۋەرنگاربیەیۊ کۆمسیۆنی جە وەختېنە، تورکیا گرڎوو حۊڵ و ۋېش مڎۊ کە بەرېوە پۍ عەرەبی سونەی، بەرەی تورکمانی، ئا کورڎا ڕێکوزۊ کە ئەوەمەنۍ سیاسەتوو تورکیاینۍ، پۍ ئا مەبەسیچە جە حەفتەی ۋیەردەنە حەریۊ جە محەمەد حەلبووسی، خەمیس خەنجەر، پەدەکە، یەکگرتوی ئیسلامی و کۆمەڵی دادگەری چڕیۍ بېنۍ پۍ تورکیای کۆبیەیۊشا پنەکریابۍ.
