جە شاروو سلێمانینە و جە هۊڵوو هۊتێل داواو سلێمانینە، ئەرەمەرزیاو کەریموو ئەلەکەی و ئەنجوومەنی ئەدەبی زارۊڵا، سەروو ئەرکی دارایی د. تەها ڕەسووڵی یووەمین دیڎاروو ئەدەبیاتوو زارۊڵا لوا ڕاوە، دلێشەنە جگە جە پێشکەشکەرڎەی ١٣ ئەوەکۊڵیایا سەروو دلێنە و تەشکوو ئەدەبیاتوو زارۊڵا و پەیام و گرنگیی ئەدەبیاتوو زارۊڵا، خەڵاتی تابیەت دریا بە شاعیری ساحێب پایەو کوردی لەتیف هەڵمەت.

جە درێژەو مەراسیمەکەینە و وتاروو کەرڎەیۊ مەراسیمەکەینە "شاخەوان سدێق" سەروو نامەنیای مەراسیمەکەی بە نامۍ شاعیر لەتیف هەڵمەتیوە، ئانەشە ویروو ئاماڎەبییا وستۊ، کە دماو عەبدوڵڵا گۊرانی و بێکەسیوە لەتیف هەڵمەت یۊن چا ئەوەڵینا، کە شیعرێش پەی زارۊڵاو کوردی نویستۍ و ناستش هەستی کورڎانە و ئینسانانەشا فکر بشۊوە، گرنگیی هەڵمەتی ئینا چانەینە کە تەنیا بە شیعرواتەی و نویستەی وێش نەساکیانرە بەڵکوم ئەدەبوو زارۊڵایچش ورگێڵنان پەی زوانوو کوردی و ئا کەلەبەریچشە پەڕ کەرڎەنۊ.

شاعیروو ئەدەبیاتوو زارۊڵاو شاعیری نەوگەر لەتیف هەڵمەت، میانەو وتارەکەیشنە، ڕەخنەی تنڎش گێرت ئۊو ئەرەمەرزیایە میدیاییەکاو پانیشتوو کوردسانی و بە کەمتەرخەمێش زانۍ مەیڎانوو ئەدەبیاتوو زارۊڵانە و باسوو ئا شپرزییەیشە کەرد، کە شاعیرۍ و نویسەرۍ بواروو ئەدەبوو زارۊڵا ئارڎەنشا ملوو ئەدەبەکەیرە.

لەتیف هەڵمەت نامێوە دیارەو بواروو شیعرۍ نەوۍ کوردیێن، کە ئەوەڵوو حەفتاکاو سەڎەی وەڵینینە، بە یۊ جە نەوگەرتەرین شاعیرەکا ئشناسیان، بە ئەرەمەرزنای گرووپێوە نەوگەرای بە نامۍ گرووپوو کەرکووکی، دنیاو ڕۊشنویری و پەروەرڎەو زاڕۊڵانە پانیشتوو کوردسانیچنە، کتێبە پەروەرڎەییەکانە یاگۍ تایبەتەش هەنە و شیعرەکێش ونیا.

س.ز‌‌‌‌