چوارچوە هەڵمەتەو "ئازاڎیی پەی عەبدوڵا ئۆجالان، چارەسەری سیاسی پەی پەرسەو کوردی" شاروو ژنێڤوو سویسراینە بە ناموونیشانوو "زینڎانییا جیهاننە و تورکیا"نە کۆنفرانسێوە کریۆ.  

ئەرەنیشتەی دووەمنە بە ناموونیشانوو "مامەڵەکەردەی وەراوەروو زینڎانییە تاریخی و سیاسییا زینڎانەکاو تورکیا"ینە و "دۆخوو ئیسەوزینڎانەکاو تورکیا"ی پانێڵێوە لوا راوە. نوێنەرایەتیی ئۆفیسوو ژنێڤوو نەتەوە یۆگێرتەکا و تەڤگەروو دۆسایەتیی گەلا و کۆشیای دژوو نەژادپەرسی، جیانفرانکۆ فاتۆرینی پانێڵەکێش بەردە ڕاوە. هامسەرۆکی گردینوو کۆمەڵەو مافەکاو ئینسانی (ئیهەدە) ئەرەن کەسکین، ئەنداموو کۆمیسیۆنوو زینڎانییاو کۆمەڵەو مافشناسا پەی ئازاڎی (ئۆهەدە) پارێزنەر زەلال ئایدۆگان و سیاسەتمەداروو کوردی کەمال ئالتاش کۆنفرانسەکەنە قسێشا کەردێ.

کەسکین: هەردەم یاسێوە تایبەتە دژوو کوردا بریۆ ڕاوە

ئەرەن کەسکین بە ئۆنلاین بەشدار بی، واتش دەوڵەتوو تورکی هەرگیز دەسش جە سیاسەتوو نکۆڵیکەردەی ورنەگێرتەن و سەرمڕ دژوو کوردا یاسایێ تایبەتەش بیێنە و واتش: "ئەگەر ماچدێ چی وەڵاتنە پەرسەو کوردی هەنە، ئەگەر ماچدێ تاریخوو ئی وەڵاتەینە قڕکەردەی ئەرمەنەکا هەن، ئانە بەردەوام چی وەڵاتەنە پێسە تاوانباری موینییەی".

"ئیمراڵیینە حیچ یاسایێوە مەیاویۆ یاگێ"

کەسکین واتش: "ئیمراڵی بە پاو یاسایەکاو دلێ تورکیای مەلۆ ڕاوە. نمەزانمێ ئیمراڵی بە کام یاسێ هەرمانە کەرۆ، چا ڕووەوە عەبدوڵا ئۆجالان زینڎانیی کریان، سەرەمڕ ڕووبەڕوو یاسێوە تایبەتێ بییەنۆ".

یاساو دوژمنی

کەسکین واتش سڵامەتیی گیانوو ئۆپۆزیسیۆنەکا نییا و دایم هەڕەشێ مەردەیشا سەرنە، واتش: "هیچ یاسێوە پەی ئۆپۆزیسیۆنەکا و بەتایبەت کوردەکا نییەنە، تەنیا یاسایێوە هەنە، کە یاساو مەردەینە".

زەلال دۆگان: ڕژێمێوە گۆشەگیری مەرزیانرە

زەلال دۆگان واتش: "دماو ئاردەی عەبدوڵا ئۆجالانی پەی بۆ ئیمراڵی سیستمێوە تازە زینڎانەکانە نریانرە،چا ڕووەوە تا ئارۆ ڕژێمێوە گۆشەگیر دژوو زینڎانییە سیاسییا ئەرەمەرزیان".

ئایدۆگان تیشکەش وستە سەروو وەزعەو زینڎانییە نەوەشا و واتش: "مەسەلێ زینڎانییە نەوەشا جە یاسێ زیاتەرا، وەڵێ گرد چێوێوەنە مەسەلێوی ئینسانی و ویژدانییەنە".

کەمال ئاکتاش: زینڎانەکاو ئامەدیوە تا ئیمراڵی مدرامان هەن

سیاسەتمەداروو کوردی کەمال ئاکتاش واتش: "هەتا خاس جە گۆشەگیریی ئیمراڵی نەیاومێنە. ئارۆ هیچ کێشێوە جە زینڎانەکاو تورکیاینە خاس نمەیاومێنە ".

ئاکتاش تیشکەش وستە سەروو کارە نائینسانییەکا زینڎانەکاو ئامەدینە و واتش: " زینڎانەکاو ئامەدینە تەنیا ئەشکەنجەی قورس نەبێ، جە کەسێتیی زینڎانییانە نکۆڵی وەنەو گەلێوە کریێ، ئارۆ هەمان سیاسەت و هەرمانەی دژەئینسانییە جە  کەسێتیی ڕابەر ئاپۆینە ئیمراڵیینە کریۆ. ئێمە جە زینڎانوو ئامەدینە بە مدرامان گردوو سیاسەتەکاو دەوڵەتوو تورکیما پووچەڵێ کەردێوە، ئارۆ هەمان مدرامان ئیمراڵیینە و زینڎانەکانە کریۆ".

دما ئەرەنیشتەی کۆنفرانسەکەینە، پارێزنەرەو نویسگەو یاسایی سەدەی، ڕازیە ئۆزتورکە، پارێزنەرە جە نویسگەو ژنێڤی، ئۆلیڤەر پیتەر، پارێزنەروو ڕابەروو گەلوو کوردی عەبدوڵا ئۆجالانی، مەحموود شاکار، قسێ کریا دەربارەو ناموونیشانەکاو "عەبدوڵا ئۆجالانی و سیستموو ئیمراڵی" و "تارێخوو زینڎانوو ئۆجالانی و پارادایمەکەی"ش و "سیستموو ئیمراڵی و گۆشەگیری".