ڕاوەبەروو دەزگاو بنەیانەو گەشمەرڎا سەعدون میرزا عەلی جە ٢١و شوباتی جە ئاکاموو هجومۍ ئاسمانی دەوڵەتوو تورکی ئەرەگیرینە جە شەنگال گەشمەرڎە بی و بە مەراسیمێوە جەماوەری جە قەبرسانوو کەش و شەنگالینە ئەسپەردە بە خاکی کریا.

سەعدون میرزا عەلی جە دماو قڕکاریەکەو ٢٠١٤یۆ بەشداریش جە وەرگیری و پارێزنای شەنگالینە کەردەبۍ، جە ماوەو ١٠ ساڵی ۋیەردەیچەنە جە بواروو ۋەرگیریوە تا کاروبارەکاو ئەنجومەنەکا گەلی، جە چنڎین بوارێنە خاوەن رەنج و کۊشیای بۍ. گەلوو شەنگالی کە خاوەنداریش جە گەشمەرڎاش کەردەن، ئا وەعدەشە واوەی کەردۆ کە جە ۋەرا ۋەروو هجوومەکانە حەجگیز چۆک مەڎۊرە و حەقەو گەشمەرڎە سەعدون میرزای جە دوژمنی کەرۊوە.

ئەنداموو ئەنجومەنوو گەلی گوهبەل عەلی خێری ئەرەیاۋناش، گلێرگەو ئێزدی چنڎەیچ گەشمەرڎۍ بەخشۆ حەجگیز دەسبەرداروو دۆزوو ۋێش مەبۆ و واتش، " دەوڵەتوو تورکی ماچۆ، 'من پەکەکەی کەروو ئامانج'، بەڵام جە راسینە دەوڵەتوو تورکی پێویسا واچۆ، شەنگالی کەروونە ئامانج تا گلێرگەو ئێزدی دلێنە بشۆ'. دەوڵەتوو تورکی هجووم کەرۆ سەروو ئا کەسا کە جە قڕکاری ٢٠١٤ینە گەلەکەشا پارێزنا. ئێمە پێسە گەنجاو شەنگالی ئاماڎێنمۍ کە بە تنتەرین شێوە ۋەرپەرچوو ئەرەگیرا بڎەیمۍ. وەختۍ گەنجێوە گەشمەرڎە بۆ، ئێمە بە سەڎان گەنجۍ ۋێما ئاماڎە کەرمۍ کە یاگۍ ئا گەشمەرڎەیە پەڕ کەرمۍ".

'گەشمەرڎەکێما ناستشا پلانەکێشا دژوو شەنگالی بیاوا ئەنجام'

عەلی خدر ئاماژەش بە حۊڵەکا ئاردەیۆ وەروو باسوو پەیماننامەو ٩و تشرینوو یووەمی کەرد و ئی پەیامشە ئەرەیاۋنا، "دەوڵەتوو تورکی ئەرەگیری، عێراق و بنەیانەو بارزانی گەرەکشانە پەیمانەکۍ جابەجێ کەرا، گەشمەرڎا ئێمە ڕاشا نەڎا کە ئا پەیمانۍ جابەجێ کریۆ. ئانۍ جە کۆکوشیەکەنە ئێمەشا ورەت، حەجگیز شەنگالەنە ڕاشا مەبۆوە. تا ئێزدیێوە مەنەبۆ، پەیمانەو ٩و تشرینوو یووەمی جابەجێ مەکریۆ".

' عێراق ڕا ۋەروودەم و هجوومەکا دەوڵەتوو تورکینە کەرۊوە'

ئەڎێوە بە نامۍ وەڵات جانۆی واتش، سەعدون میرزا عەلی تا ڕۊو گەشمەرڎە بیەیچش پەی خاکوو شەنگالی کۊشیان و پی جۆرە بەردەوامە بیە: " فرۆکەو جەنگی دەوڵەتوو تورکی سەروو ئاسمانوو عێراقیرە سوڕیۊوە، رۆڵەکاو ئێزدی ۋەروودەم و یانەکاشانە گەشمەرڎۍ کەرا. ئێمە عێراقیچ شەرمەزار کەرمۍ، کە ڕا ۋەروو دەم و ئا هجوومانە کەرۊوە. ئێمە ئانەی نە جە دەوڵەتوو تورکی و نە جە دەوڵەتوو عێراقی قبوڵ مەکەرمۍ. ئا رۆڵێما شەرەف و خاکوو ئێمە پارێزنا. دەوڵەتەکۍ گرڎ مزانا ئانۍ رۆڵۍ ئێمەی ئێزدینۍ. جەنازەو گەشمەرڎا کۊکوشیەکەی تا ئیسەیچ ئینۍ بەغڎانەو رادەسما مەکەراوە".

وەڵات جانۆ ویرش ئاوردۆ کە سەعدون میرزا برێوەیچش بۊنەو خاکوو شەنگالیۆ گەشمەرڎە بیەن و هەڵوێسوو گلێرگەو ئێزدیش پی جۆرە وست ڕووە، "ئێمە چنڎەیچ گەشمەرڎۍ بەخشمۍ، بەقوەتتەرۍ بیمۍ. ئێمە ۋەرا ۋەر بە دوژمنیما مردمێوە و ئێمە جوابشا مڎەیمێوە".

'حەقەو گەشمەرڎە سەعدونی کەرمێوە'

ئەنداموو ئەنجومەنوو گەلوو خانەسۆری یوسف جوان ئانەش وست ڕووە، کە سەعدون میرزا جە وەختوو کۊکوشیەکەینە تا ڕۊو گەشمەرڎەبیەیش پەی گلێرگەکەیش خەباتش کەردەن و پی جۆرە دوا: "نزیکەو یەرۍ ساڵا دلۍ یەبەشەینە ئەرکوو وەرگیریش جە گلێرگەکەسەنە یاونا مەنزڵ، جە کار و خەباتوو ئەنجومەنوو گەلینە بەشداربۍ، چی دماییایچەنە پەی بنەیانەو گەشمەرڎا هەرمانە کەرۍ. برێوەیچش بەنامۍ گەنجۆی گەشمەرڎە بیەبۍ. گەشمەرڎە سەعدونیچ ئەنداموو بنەیانەو گردیمانە، گرڎما عال ئاڎیی ئشناسێنمۍ. حەقەو گەشمەرڎە سەعدونی کەرمێوە و نمازمۍ ئانە سەروو دوژمنیرە ۋییەرۆ".