رۆنامەوانۍ گوڵستان تارا و هێرۆ بەهادین کە ٢٣ۍ ئابی جە ناوچەو سەیسایەقی سەر بە پارێزگاو سلێمانی جە لایەنو دۆڵەتو تورکیوە بە درۆنی هجومکەر تیرۆرۍ کریۍ، جە لایەنو یونسکۆ (ئەرەمەرزیای کولتوری، زانسی و پەروەردەیی سەر بە نەتەوەیۆگێرتەکا)وە نامێشا جە لیستو رۆنامەوانە تیرۆرکریاکانە تۆمارە کریا.

لیستە ئاماژە پنەکریاکە جە ساڵۆو ١٩٩٣ێوە نامۍ و زانیارییەکا ئا رۆنامەوانا وەڵا مکەرۆوە کە جە کاتو ۋییەرنای ئەرکەکاشانە تیرۆرۍ مکریا.

جە لیستەکەنە زانیارییەکۍ پېسە شۆنەماو تیرۆرکریای، ئا دەزگاو ئەرەیاۋنۍ کە هەرمانەشا چنەکەرڎەن، ئاماژەش پنەدریان. سەرەڕاو ئانەی گوڵستان تارا و هێرۆ بەهادینە جە ناوچێوە مەدەنی نشین و دوور جە جەنگی کریۍ ئامانج، بەڵام جە لیستەکەنە پا جۆرە نیشانەدریان، کە جە ناوچێوەنە کە جەنگش چنە بۆ هرووژمشا کریان سەر.

رێکوزو گرڎیی یونسکۆی ئۆدری ئازۆلای جە بارەو مژارەکەیۆ جە ماڵپەڕی ڕسمی یونسکۆینە پەیامێوەش وەڵاکەردەنۆ و تیرۆرکەردەی گوڵستان تارۍ و هێرۆ بەهادینیش شەرمەزارکەردەن.

ئۆدری ئازۆلای قەرارو ژمارە ٢٢٢٢/٢٠١٥و ئەنجومەنو ئاسایشو نەتەوە یۆگێرتەکاش یاڎ ئارڎۆ و دەسنیشانش کەردەن کە مشۆم رۆنامەوانا و کۆششکارا میدیای پېسە مەدەنییەکا پاڕێزگاریشا ۋنە بکریۆ.

ئۆدری ئازۆلای ئاماژەش پانەیچ کەرڎ کە گوڵستانە و هێرۆ جە کۆمپانیاو چەتر پرۆدێکشنینە هەرمانە کەرێنۍ، کاتێ پەی هەرمانۍ رۆنامەوانی کۆتێبێنۍ ڕا جە ڕاو درۆنێوە تیرۆرۍ کریۍ. هامکات داوایچش کەردەن کە ۋنەپەرسایۆیۍ ورد و قەوەت سەرو مژارەکەی ئەنجام بڎریۆ.

بەپاو ئامارەو یونسکۆی، جە مابەینو ساڵەکا ٢٠٠٦ پەی ٢٠٢٤ زیاتەر جە هەزار و ٧٠٠ ڕۆنامەنوویسا جە سەرانسەرو جەهانینە کوشیێنۍ و چا ژمارەیچە ٩٠٪ و ئی کوشتاریە نەتاوییان بە شێوێوە یاسایی چارەسەر بکریا یاخود بکوژەکۍ بە سزا بیاوا، یونسکۆ بە ئاماژەدای پانەی کە بێ سزایی مەبۆ بە مەڵامەتوو کوشتەی زیاتەری، ئەرەیاۋنانش: "ئی ئاژە فرەو قەختی نیشانۍ خراپتەربیەی ملەملانێ و وڕای سیستەمی یاسایی و دادوەرییا".