مېیانو هێزەکاو سوریای دیموکراتیکی (قەسەدە) ئامارەو ٢٤ سەعاتی ۋېیەردەو هرووژمە ئەرەگیریەکا دۊڵەتو تورکی و چەتاکاش، وە ۋەرپەرچدایۆ ڕەواو مڎرامانو جەنگەواناشا وەڵا کەرڎۆ و ئاماژەش پانەی کەرڎ جە ئاکامو ۋەرپەرچدایۊکانە چوار درۆنۍ دۊڵەتو تورکی وزیێنێرە واری، وە ترۊمبێلێوە سەرواز فاڕایۆ و دووۍ سیستەمۍ ڕاداری دلێنە بریێنۍ.

ئەرەیاۋناکەو قەسەدەی پی جۊرەنە:

"ماوەو یەرۍ مانگان بە دڕندەتەرین شێوە هرووژمە ئەرەگیریەکۍ دۆڵەتو تورکی ئەرەگیری و چەتەکاش پەی سەرو هەرێمەکاو سەرنیشت و ۋەرکۊتوو سووریای بەردەوامێنۍ، چا هرووژمانە گرڎ چەکێوە قورس، فڕۆکەی جەنگی و بێفڕۆکەوان بەکارۍ بریا.

جە قۆڵو بەندواو تشرینی؛ هێزی (یەرە شەممە) سوپاو تورکی ئەرەگیری و چەتەکاش بە چەکی قورس دەگایەکۍ دەرووبەرو بەنداوو تشرینیشا بۊمبواران کەردۍ، هامکات فڕۆکەی جەنگی دەگاو خربەت ئەل زەمالایش جە سەرنیشتوو بەنداوەکەینە بۊمبواران کەردە و جە ئاکامەنە زەرەرۍ ماددی فرە بە ناوچەکەی یاوا.

چەتە ئەرەگیرەکۍ هەوڵشا دا بە فڕۆکەی بێفڕۆکەوان دژو سەنگەرو هێزەکاما هرووژم ئەنجام بڎا، جە ئاکامەنە هێزەکېما چوار چا فڕۆکە بێفڕۆکەوانێشا وستێرە واری.

جە قۊڵو قەرەقۆزاقی؛ فڕۆکەی جەنگی دەوروبەرو سردەو قەرەقۆزاقی و دەگاو خەسەقیش بۊمبوارانۍ کەردۍ، جە ئاکامەنە زەرەرۍ ماددی فرە بە ناوچەکەی یاوا. هەرپاسە سوپاو تورکی ئەرەگیری و چەتەکێش دەگایەکۍ ئەل تینا، جەدا، بیر حسۆ، خەسەق، دیکان، مەلحە و سەنە و گردی سێڤێ و قەرەقۆزاقشا بە زیاتەر جە ٨٠ هاوەنا بۊمبوارانۍ کەردۍ و زەرەرۍ ماددی فرە بە موڵک و یانەو دەگانشینا یاوا.

جە دژو هرووژم و بۊمبوارانەکا دۊڵەتو تورکی ئەرەگیری و چەتەکاش، جەنگەوانەکېما هرووژمشا کەرڎ سەرو بارەگێوە سوپاو دۊڵەتو تورکی ئەرەگیری جە دەوروبەرو سردەو قەرەقۆزاقی، جە ئاکامەنە ترۊمبێلێوە سەروازی دلېنەبریا، کە پەی فاڕایۆ سەروازا بەکار ئۍ. هەرپاسە جە دژو بارەگێوە تەرو دۊڵەتو تورکی جە ۋەرنیشتوو سردەکێنە چالاکیشا ئەنجامدا، چا چالاکییەنە ٤ سەروازۍ ئەرەگیرۍ زامڎارۍ بیۍ و دووۍ سیستەمۍ ڕاداریچ دلېنە بریۍ.

بە درێژای ڕۊی فڕۆکەی بێفڕۆکەوانو سوپاو تورکی سەرو ئاسمانو هەرێمو دێر حافرینە خولیێنێوە."