دماو یەری ڕوا جە پێشکەش کەردەی زنجیرێوە شانۆیۍ سەرو جاڎەی جە زانیشتگە و یاگە گردییەکا شارو کەرکوک و پانیشتوو کوردەسانی، بە ئامادەبیەی ٢٥٠ مێمانا جە ١٤ ووڵاتا جیاوازینە، شەوەی ویەردۍ هۆڵو شاهانەی بۆلیڤاردینە، هەشتەمین فێستیڤاڵو میاننەتەوەی شانۆی سەروجاڎەو کەرکوکی چێرو نامونیشانو (پێوەرە ژیوای) دمایش بە چالاکییەکاش ئارڎ.

دماتەر مەڕاسیمو خەڵات بەخشای دەسش پنەکەرد و جە دمادمایی فێستیڤاڵەکەینە جەلایەنو لوجنێوە دادوەری خاستەرین شانۆکارەکێ هورچنیێ و سەوقاتیشا پنە دریا.

یاگێ باسیا، خەڵاتو خاستەرین بەرهەمو فێستیڤاڵەکەی پێشکەش بە شانۆو "کەرگەو هامساکەیما قازە نیەنە" کریا، کە شارو ئیلامو وەرکەوتو کوردەسانیوە بەشداریشا کەردەبێ.

 شانۆکارا فێستیڤاڵەکەی فرە وەلێکەوتۍ و ئەکادیمیۍ بێنێ

 گوڵستان تاهیرە ژەنە ئەکتەرێوە شانۆییەو خەڵکو وەرنیشتوو کوردەسانینە کە نامێ هونەرییەش "سۆباری"یەنە، گوڵستانە جە ئیسەنە ووڵاتو ئەڵمانیاینە مژیۋۆ، پێسەو ئاکتەرێوە شانۆکارۍ بەشداریش جە هەشتەمین فێستیڤاڵی میاننەتەوەی شانۆو سەروجاڎەو کەرکوکینە کەردەن و سەبارەڎ بە فێستیڤاڵەکەی پەی ئاژانسو هەواڵو فوڕاتی (ANF)ی واتش: "ماوەو یەرێ ڕوا ویەردەینە فرە ئیسفاڎەم چی فێستیڤاڵەینە کەرڎەن و بەشدارەو وۆرک شۆپی بێنا و ئەکتەرێ فرە بەتوانێم ئشناسێ، ئی فێستیڤاڵە فرە دڵگیرا و چێوی تازە بۍ پەی من پۆکەی یاگێ وەشحاڵی بێ کە بەشدارەو ئی فێستیڤاڵەیە بێنا، بەڕاسی ئەکتەرێ بەشدارۍ شانۆیۍ فێستیڤاڵەکەی فرە وەلکەوتێ و ئەکادیمیۍ بینێ ئینەیچ یاگێ وەشحالیا".

 واتیچش: "من ئەکتەرێوە وەرکەوتوو کوردەسانینا و ئەڵمانیاوە ئامێنا پەی کوردەسانی تا بەشداری چی فیستیڤاڵەینە بکەرو، هیواو سەرکۆتەی پەی فێستیڤاڵی میاننەتەوەی شانۆی سەروجاڎەو کەرکوکی موازونە، هومێڎەوارەنا ساڵۆو ئاینڎەینە پێسەو ئەکتەرێوە بەوە شانۆ پێشکەش پی فێستیڤاڵەیە بکەرو تا بتاوو ملەملانۍ چنی ئی ئەکتەرە بەتوانایا و ئەکادیمیا بکەرو، ئێمەیچ نمایشێوەما جە جۆرو نمایشی بێ دەنگی پێشکەش کەرڎ کە باس جە ئاژەو کوردەسانی مکەرێ کە جەنگ و زەحمەتی بۍ بەڵام دماتەر یۆگێرتەی و یەکڕیزی وەش بی، هەرپێسەو ئی ئاژەیە کە ئیسە کەرکوکەنە گوزەرمکەرۆ".