هێزە ئەمنییەکاو پەدەکەی جارێوەتەر رۆنامەنوویس ئومێد بەرۆشکیشا گێرتۆ
هێزێوە ئەمنیی هورشا کوا سەروو یانەو ڕۆنامەنوویس و چالاک ئومێد بەرۆشکی جە دهۆک و گێرتشا و فاڕاشاوە پۍ زینڎانوو زرکای.
فشارەکۍ پەدەکەی پۍ سەروو رۆنامەنوویسا و چالاکا بەردەوامێنۍ و چا چوارچێوەنە ئارۆ، جارێوە تەر، هێزە ئەمنییەکاو پەدەکەی دهۆکەنە هورشا کووا سەروو یانەو ڕۆنامەنوویس و چالاکی ئومێد بەرۆشکی.
بە پاو زانیارییەکا، هێزە ئەمنییەکۍ دهۆکی بە شەکواو زینڎانوو چاکسازی زرکای، سەعات ١٠:٣٠ دەیەقۍ ئارۆ سەعبۍ ، هۊرشا کوان سەروو یانەو ئومێد بەرۆشکی و گیڕتەنشا.
دماو هورکوای سەرش، ڕاسەوخۆ ئومێد بەرۆشکی فاڕیانۆ پۍ زینڎانوو چاکسازیی زڕکای جە دهۆک.
ئینە جە وەختێنە، ئومێد بەرۆشكی جە ساڵەو ٢٠٢١ چنی زیاتەر جە ٩٠ چالاکا و ڕۆنامەنوویسا تەروو بادینانی جە تەرەفوو هێزەکاو پەدەکەیۆ گیریا و جە ٢٢ۍ شوباتوو ساڵەو ٢٠٢٢ ێنە ئازاڎ کریا، جارێوەتەریچ جە ٢٠و تەمووزوو ساڵەی ویەردێنە پۍ ماوۍ کەمی گیریاوە.
