حەفتەی ئاینڎە جە تورکیا و سەرنیشتوو کورڎسانی ئیمتیحانەکۍ زانشتگای ملاڕاۋە. ژمارەو ئا ۋەنەرا کە بەشڎاری جە ئیمتیحانەکا ئېساڵینە کەرا بەراۋرد بە ژمارەو ساڵەی ۋیەرڎەی زیاتەرا. جە ئامەڎ ١٢٠ هەزار کەسۍ ۋېشا پۍ ئېمتیحانەکا ئاماڎە کەرا. ٤٠ هەزار کەسېشا ناچارکریېنۍ کە جە شارە دوورەکاوە بەشڎاری جە ئیمتیحانەکانە کەرا.

ڕاوەبەرو گرڎی ئەزمونەکا سەرەڕاو ئانەی جە ئامەڎ بیناو فەرمانگەی حوکمی، ۋەننگە و شۊنەی هامشێۋۍ ئاڎیشا پۍ ئیمتیحانەکا هەن، بەڵام ئەرەیاۋنانش کە  ئا ۋەنەرۍ مشۊ جە ئەنقەرە، سێواس، دیلۆک، قبرس و شارە دوورەکای تەرینە پېسە ئاڎیشا بەشداری جە ئیمتیحانەکانە کەرا.

ڕاوەبەرو لقو دوۋۍ سەندیکاو خەباتکارا زانستی و پەروەردەی (ئەیتم سەن) جە ئامەڎ، فەسیح زیرەک باسش چانەی کەرڎ کە دژ پا ستەم و نا داڎیە ئاڎۍ هەنگامەی پەنەوازشا نیېنە پۍ چارەسەرکەرڎەی ئا قۊرتۍ سەردای وەرپەرساشا کەرڎەن. زیرەک ۋاتش "جە ئامەڎ زیاڎ جە ٤٠ هەزار هامڕۍ ۋەنەرېما جە شارە جیاجیاکانە بەشڎاری جە ئیمتیحانەکا زانشتگاینە مکەرا دلۍ ئا هامڕایامانە بڕېشا مشۊ قوبرس بەشڎاری ئیمتیحانەکا کەرا. ئینە ناحەقی و ستەمێوە دیارا.".

جە بارەو ٥ هەزار کەساوە دەسوەردای کریا

زیرەک ئانەیچش وست ڕووە کە ئەزمونەکۍ زانشتگای کاریگەری فرە کەرانە سەرو ژیای ئینسانەکا و ۋاتش، "ڕېوەنە کە جۋانەکېما هیواو هومېڎەکۍ ۋېشا چنە ۋیناوە. ئەزمون و ئیمتیحانەکېچ کریۊ بە جیا هۊرسەنگنایشا پۍ کریۊ، ئینە مژارېوە جیان، بەڵام گرڎو ۋەنەرا دماناوەنڎی بە پاو ئەنجامو ئیمتیحانەکا جە زانشتگەکانە ورگیریا. بەڵام ئاژەو سایکۆلۆژی و سۆسیۆلۆژی ۋەنەرەکاما بەمەڵامەتو بومەلەرزەکەیۊ ڕۊشنا و ئینا وەرو چەماوە. پۊکای چی ئاژەنە قبوڵما نەکەرڎ کە ئا بارگرانیە سەرو ۋەنەرەکاماوە زیاڎ کریۊ و سەبارەڎ پانەی ئێمە سەردای پەروەردەی نیشتمانیی شارەکەیما کەرڎ. جە ئاکامیچەنە قەرارەکە پۍ پەنج هەزار ۋەنەرا چەمخشکنایۊش پۍ کریا، بەڵام ئانە وەسۍ نییا. دماو سەرۋنە داکەو ئێمە ٢٣ ۋەننگۍ جیاجیۍ جە ئامەڎ سەرجەنۊ پېسە میانگەو ئیمتیحانی ئەرەیاۋیۍ. ئیمتیحانەکۍ چا کریا، بەڵام ئینە وەسۍ نیا".

هـ . ش