کۆمیتەی ئیدارەی قوتابخانەکانی شاری چلاغای کانتۆنی جەزیرە بەبۆنەی ٤٦ هەمین ساڵیادی دامەزراندنی پەکەکە ئاهەنگێکی لە هۆڵی ناوەندی کەلتوور و هونەری شارەکە ئەنجامدا.

خەڵکی شاری چلاغا و ناوچەکانی دەوروبەری و بنەماڵەی شەهیدان و ڕیش‌سپی عەشیرەتەکانی کورد و عەرەب و ئەندامانی ڕێکخراو و مەجلیس و پارتەکان بەشداربوون.

ئەندامی ڕێکخستنی پەیەدە، ساڵح سەفۆ ساڵیادی دامەزراندنی پەکەکەی پیرۆز کرد و گوتی: "بۆ گەلی کورد کە ئازاری بندەستی و قڕکردن و نکۆڵی دەچێژا، دەرکەوتنی پەکەکە ژیانێکی نوێ بوو".

بەڕێوەبەری کۆمیتەی ژنانی ئیدارەی قوتابخانەکان نەزهەت سەیفەدین یادەکەی لە ڕێبەر ئاپۆ و بنەماڵەی شەهیدان و گەریلا و وڵاتپارێزان و گەلانی جیهان پیرۆز کرد و گوتی: "تەڤگەری ئازادیی کوردستان بۆ تەواوی گەلان، دۆزی ژنان و ئازادییان تێدەکۆشێت".

جەختی کردەوە: "پێویستە بەگوێرەی فیکر و فەلسەفەی ڕێبەر عەبدوڵا ئۆجالان و درووشمی "ژن ژیان ئازادی" تێکۆشانمان مەزن بکەین".

لەکۆتاییدا، گۆرانی و شانۆ و شیعر و هەڵپەڕکێ پێشکەش کران.

تربەسپی

بەهەمانشێوە لە هۆڵی ڕۆژی شاری تربەسپی ئاهەنگێک بەڕێوەچوو.

لە دەسپێکی ئاهەنگەکەدا، گوێ لە دەنگی ڕێبەر ئاپۆ گیرا دەربارەی دامەزراندنی پەکەکە و قۆناغەکانی تێکۆشان. بەڕێوەبەری مەجلیسی بنەماڵەی شەهیدان زەیور عەلی قسەی کرد و گوتی: "دامەزراندنی پەکەکە بۆ گەلی کورد و گەلانی بندەست ژیانەوەیە، چونکە لە سایەی تێکۆشانی پەکەکە، ئێستا دۆزی کورد لە قۆناغێکی پێشکەوتوودایە و گەلی کورد بووەتە سیمبولی ئازادی و تێکۆشانی جیهانی ".

ئاهەنگەکە بە گۆرانی بەردەوام بوو.

دەرباسیە

لە هۆڵی ئیڤان لە دەرباسیە ئاهەنگێک سازکرا.

لە ئاهەنگەکەدا بەڕێوەبەری کۆنگرەی ستاری کانتۆنی جەزیرە، بەرچەم بۆتان دامەزراندنی پەکەکەی پیرۆز کرد و گوتی: "پەکەکە گەلی کوردی لە تاریکی دەرهێنا و داستانی سەرکەوتن و تۆڵەسەندنەوەی نووسییەوە".

لە ئاهەنگەکەدا گۆرانی پێشکەشکرا.

هەروەها کوڕ و کچێک بەڵێنیاندا بچنە نێو ڕیزەکانی گەریلا، جەختیان کردەوە شوێنکەوتەی شەهیدان و فیکری ڕێبەر ئاپۆ دەبن.