سۆیدان ئاکای تەمەن ٤٩ ساڵ ساڵۊو ١٩٩٣ بە تۆمەتو ئانەی ۋەرپەرسو هەرێمو ئیجەو پارتو کرێکارا کوردەسانی (پەکەکە)ین جە ئیزمیرەنە باڵبەس کریا، دادگای ئەمنی دۊڵەتی سزاو زینانی هەتاهەتایش سەرەرە سەپنا، ئاکای ماوەو ٣٢ ساڵا جە زینانەکا تورکیاینە چانیشا ئیزمیر، ئایدن، نازلی، کرکلار، سێرت، ئامەد، ماڵ تەپە و سیلیڤرینە زینانی کریا.

ساڵۊو ٢٠١٨ ی زینانەنە تووشو وەرهەمو پرۆستاتی بۆ و هەرپاسە تووشو نەوەشی ڕۆماتیزمی و ماسای یەهەری و نەوەشی دڵی بیەن. پا مەڵامەتۆ نامێش جە لیستوو زینانییە نەوەشەکا جەمەو مافو مرۆڤینە بې.

قەرار بې ساڵۊو ٢٠٢٣ بە شێوۍ مەرجدار ئازاڎ بکریۆ، بەڵام کۆمیتەو چەمڎاری و ئیدارەو زینانی بە شێوې هەڕەمەکی چوار جار ئازاڎکەردەکەیشا دماوست. ئاکای ١٢و ئایاری جە زینانو سیلیڤرینە ئازاڎ کریا.

ئاکای سەرەڕاو نەوەشیەکاش، بە هیوا و ئیرادێوە بەهێزۆ پەی بەردەوامیدای بە ئەوەکۊشای ئینا دلې گەلینە و سەبارەت بە ئاژەو زینانیا نەوەشی و پرۆسەو ئاشتی کە بە بانگەوازو ڕابەر ئاپۆی دەسش پنەکەردەن، قسێش پەی ئاژانسو هەواڵو فوراتی (ANF)ی کەردې.

'دۊڵەت بە ئەنقەس پرسەکەی درێژ مکەرۊوە'

ئاکای ئەرەیاۋناش کە پرسو زینانیا نەوەشی پرسێوە ئەخلاقی و مرۆییا و جەختش چانەیە کەرڎۆ کە پەی چارەسەرکەردەی پەنەوازش بە حیچ هەموارکەردەیۆیې یاسایی تازەی نییا. ۋەرو ئانەی ئی مژارە بە تەمامی پېوەسا بە جابەجێکەردەیۆ، ئەر دۊڵەت مەبەسش بۆ بە دووې ڕوې ئی گرفتەیە چارەسەر مکەرۆ، بەڵام دۆڵەت بە ئەنقەس ئی پرسەیە درێژ مکەرۆوە."

'پرۆسەو ئاشتی مژارێوە نییا کە جە چوارچێوەو زینانیانە هۊرسەنگنایش پەی بکریۆ'

بە قسې ئاکای، دۊڵەت گەرەکشا پرسو زینانیا نەوەشی بکەرۆ بە مژارو سەودا و مامەڵەی و واتش: "دۊڵەت سەرو ئی مژاریە بڕې حیساباتې ۋێش مکەرۆ، بە ۋېیەرنای کاتی گەرەکشا ئی مژاریە پېسە ئامرازێوە سەودای و مامەڵەی دژو کوردی و هێزە دیموکراتیکەکا جە کاتو هۊرچنیەینە بەکاربارۆ، جە کاتێنە ئازاڎکەردەی زینانیا نەوەشی هەنگامێوە ئەساسیەنە و نمەبۆ پرۆسەو ئاشتی تەنیا جە چوارچێوەو ئی مژارەینە هۊرسەنگنایش پەی بکریۆ، بەڵام دۊڵەت ئی مژارەشە پېسە ئامرازێوە جیاوازی بەکار بەرۆ و گلېرگەش پۊوە سەرحاڵ کەردەن."

'مەشۆم ڕۆحو مڎرامانوو زینانیا نیشانە بڎریۆ'

ئاکای ئەرەیاۋناش کە ئاژەو زینانەکا فرە خراپا و ئینەیچ بۆ بە مەڵامەتو نەوەشی و جەختش چانەیە کەرڎۆ کە مەشۆم ڕۆحو مڎرامانوو زینانییەکا نیشانە بڎریۆ و واتش: "لایەنێوە هەڤاڵا کە پەنەوازا جەختش سەر بکریۆوە لایەنو ئەوەکۊشایشانە، ئاڎې ئینسانې بەهیوا، بەجۆش و بەهێزێنې، دلې چوار دیوارانە. گرڎو زینانیا سەرەڕاو نەوەشیەکاشا، هەڵوێسێوە شکۆمەندانە و بەهێز پەیڕەو مکەرا، ئاگە مېڎانوو ئەوەکۊشاین، نەوەشې با یان نا، گرڎ گەرەکشانە بە کەرامەتۆ بژیۋا، بەردەوام سەرەنج و شۊنیرەلوایەکێشا سەرو سیاسەت و گلېرگەین، ئانې جە زینانەکانە مەیانە جبەر بە ڕۆحێوە بەرزۆ مەیا بەرۆ، بە حیچ جۊرې تەسلیمیەت قبووڵ نمەکەرا."

'مەشۆم هێزە کۆمەڵایەتییەکې ۋێشا بە ۋەرپەرس بزانا'

ئاکای ئاماژەش پانەی دا کە پەنەوازا پرۆسەو ئاشتی بە ڕوانگێوە ۋەرفراوانتەر جە دیموکراتیزەکەردەی هۊرسەنگنایش پەی بکریۆ و واتش: "دۊڵەت گەرەکشا بە تەمامی سەرنج وزۆ سەرو زینانیا نەوەشی، پینەیچ پرسی سەرەکی پەردەپۆش مکەرۆ. هەرپاسە ڕوانگێوە دلې گەلینە وەش بکەرۆ کە ئەر زینانیې نەوەشې ئازاڎې بکریا، پرسەکە چارەسەر و ئاشتی بەرقەرار بیەن، جە کاتێنە ئینە تەنیا بەشێوەن جە ئەوەکۊشایې گۆرەی، پۊکەی چی ڕوانگۆ پەنەوازا هێزە کۆمەڵایەتییەکې جیای چەمەڕایی دۊڵەتی مەشۊم ۋێشا پڕۆژە وەش بکەرا، ئەرنا ئی پرسە چا ئاستەنە مەنۆوە.

جە بنەڕەتەنە دۊڵەت گەرەکشا مژارو دیموکراتیزەکەردەی شارۆوە. پرۆسەو ئاشتی بە گرڎیی نیا چوارچێوەو زینانەکانە. نمەبۆ تانیا جە چوارچێوەو زینانیا نەوەشینە هۊرسەنگیۆ. بەڵکم ئینە پرۆسێوە ئەوەکۊشاین."