دماو ۋیەرناو شش مانگا سەرو ئەرەیاۋناو یۊگېرتەیۊ دوۋۍ تەرەفا جەمی (کۆمەڵە)، جە یاۋنەریېۋەنە جەمەو زەحمەتکێشانو کورڎسانی ئەرەیاۋناش، پرۆسەکە بەمەڵامەتو نەلای ڕاوەو رێککۊتەکا و لادای جە ئامانجەکا یۊگېرتەیۊ بە ئەنجام نەیاۋان.
مانگەو تشرینی دوۋەمو ساڵەی ۋیەرڎۍ دماو ۋیەرناو ١٥ ساڵا سەرو جیابیەیۊیشارە، هەواڵو یۊگېرتەیۊ جەمەو شۆڕشگێڵی زەحمەتکێشانو کورڎسانو ۋەرکەوتی و جەمەو زەحمەتکێشانو کورڎسانی ئەرەیاۋیا، بەڵام دماو نزیکەو شش مانگا ئا یۊگېرتەیۊ بە ئەنجام نەیاۋا.
جە یاۋنەریېۋەنە جەمەو زەحمەتکێشانو کورڎسانی ئەرەیاۋنانش: " دماو ۋیەرناو چن مانگۍ جە ئەرەیاۋناو سەرەتاو پرۆسەو یۊگېرتەیۊ پۍ یۊوستەی ڕیزەکا حەر دوۋی لای و ئاماڎەکاری پۍ گېرتەو کۆنگرەی هامبەشو جەمەو زەحمەتکێشانو کورڎسانی و جەمەو شۆڕشگێڵی زەحمەتکێشانو کورڎسان و ۋەرکەوتی، مشۊم ۋاچمۍ کە بە مەڵامەتو نەلای ڕاوەو ڕێککۊتەکا و لادای جە ئامانجەکا یۊگېرتەیۊ و ملەملانۍ سیاسی، ئی پرۆسە بە بەئەنجام نەیاۋا".
ئەرەیاۋنانیچش: "جەمەو زەحمەتکێشانو کورڎسانی پەی یەکڕیزی و یۊوستەیۊ ئی دوۋە بەشەو جەمی بە هەست کەرڎەی بە وەرپرسیاری و دڵفراوانیوە ئاما مېڎان و حۊلی بێوچانش دا، بەڵام پاسە بەرکۊت ئی پرۆسە پۍ ئا هامڕایا تەنیا حۊڵا پۍ دلېنەبەرڎەو جەمەو زەحمەتکێشانی پەی مەبەسە سیاسییە تەسکەکا ۋېشا".
جە بەشېۋە یاۋنەریەکەینە جەمەو زەحمەتکێشانو کورڎسانی باسش چانەی کەرڎەن؛ "ڕێک جە وەختېنە کە ئاخېزو ژینۍ بە دوروشمەو ئەساسی" ژەنی، ژیای، ئازاڎیی" سیما و هێزێوە تەرش بە جمیەرو کورڎسانی و ڕەوتو چەپی و یەکسانیوازی بەخشابۍ، گېرتەینە وەرو سیاسەتی غەڵەتی و دوور جە ئاواتەکا خەڵکو کورڎسانی و ویست و دلېنەو ئاخېزەکەی جە تەرەفو ئا هامڕایاۋە، لادایۍ ئاشكرا بۍ جە مەسڵەحەتە گرڎیەکا نەتەوەو کورڎی".
جە دمادمایچنە ئەرەیاۋنانش: " سیاسەتۍ چانە و فاڕیایۍ قبووڵ نەکریۍ و ئا سیاسەتۍ نەتاۋېنۍ نوێنەرایەتی ڕوانگەو ئێمە پۍ جمیەرەکەی و ئاخېزو ژینۍ کەرا" و چا روانگۊ ئاشکراش کەرڎەن: " بە وەرو چەما گېرتەی ئی ڕاسیا پی جۊرە ئەرەیاۋنمېش جە ئارۊوە جەمەو زەحمەتکێشانو کورڎسانی ژیای سیاسی ۋېش درێژە پنە مڎۊ".
هـ . ش
