جنێڤەنە جە ١٤ەمین شەوەو کەلتوور و هونەری کوردیینە ئاماژە پانەی کریا هونەر زوانو مڎرامانیا. ئەندامو دیوانو هامسەرۆکایەتی کەجەدەکە-ئەی موسا فارسئۆغولار واتش: "هونەر مشۊم سیاسەت بۆ، مشۊم گەل بە هونەر ۋێش بە ڕێکوستەی بکەرۆ."
١٤ ەمین شەوەو کەلتوور و هونەری کە بە مڎرامانو سیاسەت و کەلتوورو گەلو کوردی بە بەرهەمی هونەری گلېرکەردۆ، جە جنێڤ ئەنجام دریا.
مەراسیمەکە جە لایەنو گلېرگەو کوردی دیموکراتیکی جنێڤیوە ئەنجام دریا، ئاماژە پانەی کریا کە ئەوەکۊشای ئازادی و بیەو گەلو کوردی، جە مېڎانو کەلتوورینە بەردەواما.
مەراسیمەکە بە بەشداری کوردی و دۆساشا جە تەلارەو سال دیس فێتس ئەڤانشێت-سالێڤی جە شارو ڤێرنێری جە کانتۆنو جنێڤی ئەنجام دریا.
بە مەبەسو ویرئاردەیۆ گەشمەرڎا ئەوەکۊشای ئازادی کوردەسانی دەیەقێوە ڕێز گیریا، دماتەر بە نامۍ مېیانو گلېرگەو کوردی دیموکراتیکی جنێڤی سدقی دەمیر قسێش کەردۍ و جەژنۊو قوربانیش جە بەشدارا پیرۆز کەردە و واتش: "تا ڕابەر ئاپۆ ئازاد نەبۆ، ئی ئەوەکۊشایە نمەمردۆ. مدرامانما بەردەوام بۆ."
هەرپاسە سەرۆکو کانتۆنو جنێڤو پارتو سەوزو سویسرای و سەرۆکۊو شارەوانی هەرێمو ئۆنێکسو کانتۆنەکەی مەریەم یونس عەنبەرە بەشدارەو مەراسیمەکەی بۍ، عەنبەرە پاڵپەشتی ئەوەکۊشای گەلو کوردیش کەرد و واتش: "عەبدوڵا ئۆجالان مشۊم ئازاد بۆ. مشۊم گرڎو گەلا بە شێوێوە ئازاد بە زوان، کەلتوور و شوناسو ۋێشاوە بژیوا. ئا ئەوەکۊشایەی گەلو کوردی جە چوار بەشۍ کوردەسانینە ئەنجامش مڎۆ، ئەوەکۊشای ڕەواو ئازادییا."
'گرڎ وڵاتپارێزنێوە مشۊم بە شێوێوە چالاک بەشدارو پڕۆسەکەی بۆ'
ئەندامو دیوانو هامسەرۆکایەتی کەجەدەکە-ئەی موسا فارسئۆغولار ئاماژەش پانەی دا گەل بە مڎرامانو کەلتووری تاریخێوە تازە وەش مکەرۆ و واتش: "فەلسەفەو ڕابەر ئاپۆی شۆڕشێوە ئەخلاقی و کەلتوورییا. هەرپاسە ژیۋای بەبێ ستاتۆ قبوڵ نمەکریۆ. گرڎ وڵاتپارێزنێوە مشۊم بە شێوێوە چالاک بەشدارو پڕۆسەکەی بۆ و گرڎو مېڎانەکا فاڕۆ پەی سەنگەرێوە مڎرامانی."
هامسەرۆکو ئینستیتو کوردی سویسرای دڵبەر هێما، سیمینارێوەش سەرو نەریتی قەڎیمی ڕازگێڵنەرا کوردی پێشکەش کەرد. جە لایەنو بەشداربیا و تایبەت زاوڵاوە بە جۆشوخرۆشۆ بە چەپڵۍ پێشوازیش ۋنە کریا.
مەراسیمەکە بە گۆرانیۍ و هۊرپڕای دمایش ئاما.
