هامسەرۆکایەتی کۆنسەو ڕاوەبەری کەجەکەی جە ئەرەیاۋنێوەنە بەڕێز و وەشەسیایۆ جە حۊتەمین ساڵیاڎو گەشمەرڎە بیەیشەنە یاڎو عەلی حەیدەر قەیتانیش کەرڎۆ کە جە ٣ې تەمموزو ٢٠١٨ینە گەشمەرڎە بی.

ئەرەیاۋناکەو کەجەکەی پی جۊرەنە:

"جە ١٢و ئادارو ٢٠٢٥ینە گەشمەرڎەبیەو کادرا سەرمەشقې تەڤگەریما هەمڕا فواد-عەلی حەیدەر قەیتانی و ڕەزا ئاڵتوونی جە لایەنو دیوانو کۆنگرەو ١٢ـەمینو پەکەکەیۆ ئەرەیاۋېیا. هەمڕا فواد پېسە سیمبوڵو 'دڵسۆزی بە ڕابەرایەتی، ژیۋای پیرۆز و حەقیقەت'ی و هەمڕا ڕەزایچ پېسە سیمبوڵو 'هەمڕایی ئازادی' ئەرەیاۋېیا بې. دماو ئانەی تەڤگەرما ئەرەیاۋناش، گەلەکەما جە چوارپارچەو کوردەسانی و جبەرو وڵاتی بەشێوێوە جەماوەری بە شکۆ، وەشەسیایی و پنەزانایۆ هەردووە هەمڕێماشا یاڎې کەردێوە.

ئارۆ ٣ې تەممووزو ٢٠١٨ ی حۆتەمین ساڵیاڎو گەشمەرڎەبیەو هەمڕا فوادین. جارێوەتەر بەڕێز و پنەزانایۆ یاڎو ڕێوگارو سەرەتاو ئەوەکۊشای ئازادیما کە چنی ڕابەر ئاپۆی هەنگامەش هۆرگێرتە و جەنگەوانی سەرکۊتە هەمڕا فوادی مکەرمېوە و بە ڕێزو ئیحترامۆ سەرەما ئاستو یاڎکەردەیۊیشەنە منامنمېرە.

بێگومان گەشمەرڎەبیەو هەڤاڵ فوادی پەی تەڤگەر و گەلەکەیما ئێشێوە گۊرە بې. بیەو ئاڎیی پەی ئەوەکۊشایما سەرچەمەو ڕۆشنۋیری، ڕێکوستەی و زیهنییەتێوە گۊرە بې. بە ڕاپیماو شۆڕشگێڵنی نیم سەدەیۆ پەی تەڤگەری و گەلەکەیما بەها گەلێوە گۊرێش خوڵقنې. پېسە ئینسانێوە، هەمڕێوە، شۆڕشگێڵنێوە ئانەی تاوابیێش بکەرۆش جە بەرزتەرین ئاستەنە کەرێش. هەمڕا فواد یۆ چا هەڤاڵا بې هەمڕایی سەرەتاو ڕابەر ئاپۆ، حەقی قەراری و کەمال پیریش کەرڎ. چا ڕوۆ کە ڕابەر ئاپۆ سڵامش ۋنە کەرڎ و تا ساتو گەشمەرڎەبیەیش بە باوەڕی، بڕیاڕداری، جۆشێوە گۊرۆ، بەبێ مردای وەشەسیایې فرەش ئامېتەو ئەوەکۊشای ئازادی کەرد و تەمەنو ۋێش بەخشا. گرڎ ساتێوە ژیۋایش بە ئەوەکۊشای، ڕەنج، قوڵبیەیۆ، وردبیەیۆ، پەروەردەکەردەی و سەرمەشقایەتیکەردەی هەمڕایاشۆ بەرد سەر. هەمڕا فواد کە زاناو کەشی بې، هێزو ماناڎاری کە بە کەڵەکەکەردەی، هێزو فیکری و قوڵبیەیۆ بێکۆتایی هەستەوەریش گرڎ کاتێ بی بە هێز و ئەوەکۊشای پەی هەمڕایاش. بە قوڵبیەیۆ ماناڎاریی و ئەنەیاوایش جە ڕابەر ئاپۆی، مۆراڵ بەخشې بە هەمڕایاش و ڕاش نیشانە دۍ. کاتێ ڕابەر ئاپۆ هەواڵو گەشمەرڎەبیەیش ئەژنی واتش، 'هەمڕێوە بې کە جە ۋێم عالتەر جە من یاوێنە'.

جە وەڵېکۊتەی و زیاڎکەردەی ئاستو ئەنەیاوایما جە ڕابەر ئاپۆی هامکارییەکې هەمڕا فوادی فرە فرێنې. هەم ئینسانێوە فیکری و ڕێکوستەی گۊرە بې، هەمیچ پەروەردەکارێوە گۊرە بې. چی ڕوۆ هەوڵدای، ڕەنج و قوڵ بیەیۆکێش فرې بێنې. جە ۋەرا ۋەرو گرڎو ئا چێوانە کە ئینسان و گلېرگەی جە ئازادی گێرێوە، توڕەی و هەستیارییەکېش فرې بێنې. گرڎ کاتې ئی توڕەییەشە چنی بې، وە  فاڕێش پەی هێزو ئەوەکۊشای و فیکری.

هەمڕا فواد کە نمەتاومې بە چن وشێوە باسو شۆڕگێڵنی و ڕەنجەکاش جە ئەوەکۊشای ئازادینە بکەرمې، بەڕاسی سیمبوڵێوە گۊرەو ژیۋای پیرۆزی و حەقیقەتی بې. هەمڕێوە بې لایەق پانەین پی جۊرە بیاومێشەنە و یاڎ بکریۆوە. داوا جە گەل و دۆساما مکەرمې جە حۊتەمین ساڵیاڎو گەشمەرڎەی گۆرەیما هەمڕا فوادینە بە خاوەنداریکەردەی جە یاڎەوەرییەکاش یاڎو هەڤاڵ فوادی بکەراوە. جارێوەتەر بە شکۆ، وەشەسیای و پنەزانایۆ یاڎش مکەرمېوە. بە جابەجێکەردەی سۆسیالیزمو گلېرگەی دیموکراتیکی جە کەسایەتی هەمڕا فوادینە ئامانجو ئازادی پیرۆزو گەشمەرڎا ئازادی و شۆڕشی پێکمارمې. بۆنەو ئی ڕووەیۆ جارێوەتەر ئی قەولەیما واوەی مکەرمېوە."