کەجەکە هجوومە دڕندانەکەو مۆسکۆو پایتەختو ڕووسیایش بەتندی شەرمەزار کەرد و واتش: "ئانە دەوڵەتو تورکی و حکومەتو ئاکەپە-مەهەپەینێ، کە مەشق و ئەرەئاردەی بە داعشی مکەرا. حکومەتو ئاکەپە-مەهەپەی داعشی دژو گرد لایێوە بەکار مارانێ."
هامسەرۆکایەتیی کۆنسەو ڕاوەبەریی کەجەکەی بەیاننامێوەنە هجوومە تیرۆریستییەکەو مۆسکۆیش شەرمەزار کەرد.
ئەرەیاونای هامسەرۆکایەتیی کەجەکەی ئینەنە:
"بە پاو زانیارییە گردینەکا، هیزی مۆسکۆو پایتەختو ڕووسیاینە، میانەو کۆنسێرتێوەنە هجوومێوە ڕووەش دا و دەیان کەسێ هجوومەکەنە مەردێ و بریندارێ بیێ". بۆنەو ئی ڕوودایۆ و کە دەیان کەسێ مەردێ و بریندارێ بیێ، فرە خەمگینێ بییەیمێ. وەڵێ گرد چێوێوەنە ڕۆحوو مەردەکا شاد بۆ، سەرەوەشی وەنەو بنەیانەکاشا مکەرمێ. هومێدوو زوو خاسبییەیۆ پەی بریندارەکا موازمێ. ئێمە وێما بە هامبەشو ئازارەکاو گەلو ڕووسیای مزانمێ، سەرەوەشیما ئاراسەو گردو گەلو ڕووسیای مکەرمێ. ئی هجوومە دڕندانەو داعشی بەتندی شەرمەزارمکەرمێ. ئی هجوومە جارێوە تەر دوژمنایەتیی داعشیش دژو گەلا و ئینسانیەتی نیشانە دا.
ئانە داعش گرد بارێوەر پاڵپەشتییش مکەرۆ و کەرۆش گژێ وەڵاتارە دەوڵەتو تورکیاین
ئانە دەوڵەتو تورکی و حکومەتو ئاکەپە-مەهەپەین، کە خەریکو ئەرەئاردەین بە داعشی و دژو گرد لایێوە بەکارش مارۆ و هەڕەشێ وەنەو گرد لاێوە مکەرۆ چا ڕێوە باج ورمگێرۆ. دژو تەڤگەرو ئازادیی کوردی، گەلو کوردی، سوریای، عێراقی، ئەورووپای، دژو گرد لاێوە بەکارش مارۆ. پینەیچە سیاسەتو ستەمکاری و کۆکوشییەکاش مدۆقبووڵکەردەی. دەوڵەتو تورکیای بە عەقڵیەتو عوسمانیی تازەیۆ مامەڵە مکەرۆ و داعشی پەی بەیاگەیاونای ئا سیاسەتا بەکار مارۆ. پێویسا ئیساتێنە ئی ڕاسییە بوینیۆ و گرد لایێوە پاسە مامەڵە بکەران.
فرە ڕۆشنا کە هجوومەکەو مۆسکۆیچ سەرو ئی بنەمێ کریان. حکومەتو ئاکەپە-مەهەپەی ئی هجوومەشە کەردەن تا ڕووسیا داواکاش قبووڵ بکەرۆ. وەڵتەرێچ هجوومێوە هامشێوەش ئێراننە کەردەن. ئانە کە ڕاو داعشیوە هەردووە هجوومەکێش کەردێنێ دەوڵەتو تورکیاین.
جارێوە تەر ئی هجوومە دڕندانەیە شەرمەزار مکەرمێ، ئێمە پێسەو جمیەرێوە کە فرەتەرین کۆشیایما دژو دڕندەیی داعشی و فاشیزمی کەردەن و باجی فرەما دان، جارێوە تەر ماچمێش، کە هەمیشە ئینایمێ بەرەو گەلینە و واوەی سەرەوەشی وەنەو سەرجەمو گەلاو ڕووسیای مکەرمێ.
