کۆمیتەو پەروەردەیی کۆما جڤاکێن کوردەسان (کەجەکە) بۆنەو ١٥و ئایاری ڕۊو زوانی ئەڎایی کورییوە ئەرەیاۋنێوە نویسیاش وەڵا کەرڎۆ و بە فەلسەفەو "هەر پەیڤێوە کوردی دۆزێوەمانە" بانگەوازش جە گرڎ لایۍ کەرڎ خاوەنداری جە زوانی ئەڎایی کوردیی ۋێشا بکەرا.

ئەرەیاۋناکەو کۆمیتەو پەرەوەردەیی کەجەکەی پی جۊرەنە:

"بە تایبەت چی سەدەو دماینە گەلو کوردی هەم جە ڕوو بەڎەنی، هەمیچ جە ڕووو زوان و چاندیوە ڕوبەڕو قڕکەردەیۍ وەرفراوانی کریاوە. دۊڵەت-نەتەوەکۍ کە سەرو بنەماو نەژادپەرسی و یەکپەرسی ئەرەمەرزیێنۍ، بیەو گەلو کوردیشا پېسە مەترسی پەی سەرو بیەو ۋێشا دیەن و پەی دمایئاردەی پی "مەترسیەیچە" سیاسەتەکاو قڕکەردەی، تاونایۆ و پەراوێز وستەیشا جە دژو گەلو کوردی و زوانو کوردیی ڕاوەبەر کەرڎەن. جە چوار پارچەو کوردەسانی گەلو کوردی دووچارو چەرخو قڕکەردەی کریاوە. دۊڵەت-نەتەوە کە کوردەسانش وست چێرو ئەرەگیریوە، گەرەکشا بۍ قەڎیمیتەرین گەلو میزۆپۆتامیای و قەڎیمیتەرین زۋانو جەهانی چېرو نامۍ 'یەک لایەن، یەک زوان، یەک میللەت، یەک دۊڵەتینە' سڕاوە.

گەلو کوردی بە سەرمەشقایەتی ڕابەر ئاپۆی هۊرئێستۆ

دژو سیاسەتەکا قرکەردەی و دلېنەبەردەی جە چوار پارچەو کوردەسانی، گەلو کوردی پەی پارېزنای جە بیەو ۋێش، ئەوەکۊشای گۊرەش دەسپنەکەرڎ و قوربانی فرەش دا.

بە تایبەت جە سەرنیشتوو کوردەسانی گەلو کوردی کە سیاسەتەکاو نکۆڵی، دلېنەبەردەی و ئەسڕیەیۊیش سەرەرە سەپیۍ، پا هێزەی کە جە چاندی قەڎیمی ۋێشۆ هۊرش گێرۍ بە سەرمەشقایەتی ڕابەر ئاپۆی جارێوەتەر ېۊرئێستۆ و کەفەنو مەردەیش جە ۋێش کەرڎۆ. جە سەرمەشقایەتی پەکەکەینە بە ڕەنجو هەزاران گەشمەرڎا ئازادی کوردەسانی پارێزنایش جە بیەی و مسۆگەرکەردەی گەلو کوردی کریا. تەڤگەرو ئازادی کوردەسانی جە پارېزنای بیەی، چاند، شناسنامەی و زوانی کوردیینە بە شێوێوە سەرکۊتانە ئەرک و ۋەرپرسیاری تاریخی ۋێش پێکئاورد. ئەوەکۊشای بیەی و ئازادیش پڕناوە پەی قۆناغێوە تازەی!

دەیان ساڵۍ بە مەڵامەتو ۋنەپەرسایۆ جە بیەو گەلو کوردی، بە شێوێوە دڕندانە هەوڵدریا چاند و زوانی کوردیی سڕاوە. جە ئاکامو ئەوەکۊشای ئازادی کوردەسانینە ئی هەوڵۍ جەبەین بریۍ.

ئەسڕیەیۆ سەرو زوانی کوردییرە سەپیا

ئەسڕیەیۆ و ناستەی زوانەکا تاوانێوە گۊرێنە جە دژو مرۆڤایەتی. هەڵایچ زوانی کوردی جە ئاستۍ ڕەسمینە قبوڵ نمەکریۆ؛ بە ڕا و ڕێبازی جیاواز قەڎەغەکەردەی، گەمارۆدای و پەرواێزوستەی سەرو زوانی کوردیی درێژەش هەن. سەپنای زوانو دۊڵەت-نەتەوەی جە هەرچوارپارچەو کوردەسانی و جە هەر یاگێنە کە کوردش ئینا چنە بەردەوامیش هەن. بە سیاسەتو یەکپەرستییوە گەرەکشانە کورد لا وزیۆ، زوانی کوردی تاویۊوە و چنی کاتی بیەیش نازا.

زوانی کوردی یۆن جە قەیەمیترین و دەوڵەمەندتەرین زوانو جەهانی، بە سەدان ساڵێ جە دژو فشاری و ڕاگیرییەکا مردانۆ. زوانو ئەحمەدی خانی، فەقێی تەیران، مەلای جزیری، جەلادەت عەلی بەدرخان، فرەو گۆرانی واچا، نوویسەرێ و گۆرە ڕۆشنویرێ تەرێ، کە بە بەرهەمە سەنگدارەکێشا میراتێوە زارەکی، نویسین، وێژەیی بێهامتاشا پەی گەلوو کوردی جیائاستەن.

زوانی کوردی بەتەنیا زوانێوە نییا، بەڵکوم ڕووحو گەلوو کوردین. زوانما ناسنامەو بییەی و موبارەکترین بەهامانە. جە وێشەنە چاند و تاریخما پارێزنانش، زوانما مەرجی بییەو پێشینەین، گۆرەتەرین قەڵاو وێ بییەین کە گلێرگەما پنە پارێزنان. پۆکەی جە تاریخو دووژمنا گەلوو کوردینە کاتێک گەرەکشا بییەن دمای بە کوردی بارانە، یوەم چێو هرووژمشا کەردەن سەر و زوانی و قڕکەردەیشا دەسپنەکەردەن، گرڏ و ڕێکێشا وەڵێ زوانو کوردی وستێنێرە و گەرەکشا بێ دلێ زمانەکەو وێشانە زوانی کوردی تاوناوە و دمای بە گلێرگەی کوردی بارانە. بە ئیسەیشۆ جە کوردەسانەنە ئی سیاسەتو تاونایۆ و پەراوێز وستەیە جە دژو زوانەکەیما بەردەواما. قەدەغەکاریێ سەر و زوانی کوردی لانەبریان. تاوەکو ئیسە زوانی کوردی نەبییەن زوانێ فەرمی پەروەردەی.

مافو پەروەردەی بە زوانی کوردی ڕەواتەرین مافا

ڕابەر ئاپۆ ئاسو وەڵکەوتەو زوانی پێسەو ئاستو وەڵکەوتەو زوانی پێناسەکەردەن و ماچۆنە، 'گلێرگێوە چن پەرەش بە زوان و ئەڏایاو وێش دابۆ، ئانە بەماناو ئانەی مێ پەرەش بە ئاستو ژیوای وێش دان.'.

پەی ئانری زوانی کوردی بۆنە بە زوانێوە ڕەسمی، بۆنە زوانی پەروەردەی پەنەوازیش بە ئەوەکۆشای و هەوڵدای جدیین. زوان جەسەن، چاند جەسەن، خاوەنداری جە جەسەو وێتانر بکەردێ. پەی ئانەی جارێوە تەر هیچ هێزێ نەتاوۆ گەلوو کوردی وسۆ چێر "چنگەکێ قڕکەردەو چاندی" پەنەوازی بە هۆشیاریێ بەرز مکەرۆ. پەنەوازا ئانەی بزانمێ پارێزناو زوانی هەڵوێسا جە دژو پەراوێز وستەی، پارێزناو زوانی پارێزناو چاندییا، پارێزناو زوانی پارێزناو کوردەسانیا. پارێزناو زوانی پارێزناو ئایندەین. گرڏ نەتەوێوە زوانو وێش هەن. پێسە چنین دار سەرو کرۆکو وێش سەوز بۆنە، گەلوو کوردیش سەرو زوان و وێش گۆرە بۆنە.

مافو پەروەردەی بە زوانی کوردی مافێوە ڕەوا و سروشتییا، پەنەوازا گرڏ کەسێ خاوەنداریش چنە بکەرۆ و ئەوەکۆشایش بەرز بکەرۆ پەی ئانەی زوانی کوردی بۆنە زوانێ فەرمی. زوانو ئەڏێ؛ جەسە و بییەو ئینسانین، پەنەوازا ئیناسان جەسەو وێش جە گرڏ هرووژمێ  و نەوەشیێ پارێزنۆ.

 جە گەلوو کوردەسانی موبارەک بۆ

چی سەردەمە تاریخییەنە، بە بۆنۆو ١٥ـو ئایاری ڕۆو زوانو  کوردی بە ڕێزداریی و شکۆوە جە ئاستو گرڏ و گەشمەرڏا ئازادی کوردەسانی منامنمێرە. جارێوە تەر بانگەوازی جە گەلەکەیما مکەرمێ بە فەلسەفەو "حەر وشێوە کوردی دۆزێوەمانە" خاوەنداری جە زوان و وێتا بکەردێ، زاڕۆڵەکێتا فێرو زوانو کوردی بکەردێ و پێسەو دۆزو نەتەوەیی خاوەنداری جە دۆزو زوانی بکەردێ.

پێسەو کۆمیتەو پەروەردەی کەجەکەی، ڕۆو زوانو کوردی جە گەلوو کوردەسانی، ڕەنجدەر و خەموەرا زوانو کوردی پێرۆز مکەرمێ."